عاقبت

ہر  طرف  پھر  ایک  شور سا  اُٹھا  تھا،  سیمی  آپا  تو  سانس بھی  لیتیں تو  اُسے  ایک خبر  بنا  دیتیں کہاں وہ  اب  اپنے  اکلوتے  بھائی  کے  لئے  لڑکیاں  ڈھونڈ رہی  تھیں، خبر تو  بڑی  ہی تھی  ۔۔ جو  لوگ  آپا کے  وسیع  و عریض حلقہء  احباب  میں  شامل  تھے  وہ  بقول  آپا  کے  احمد سے  اپنی  بہنوں  بیٹیوں  کی  شادی  کرنے  کے  لئے  مَرے جا رہے  تھے،  اُنکے  نزدیک  وہ  لڑکی  قابلِ رشک  ہوگی  جو آپا  کے  خاندان  کا  حصہ  بنے  گی،  لیکن  جو  لوگ  حقیقتاً  آپا  کے  قرابت  دار  تھے  وہ  یہ سوچ  سوچ  کے  افسوس  کررہے تھے  کہ  جانے  کس  بے چاری  کی  قسمت  پھُوٹنے  والی  ہے،  جس  کو  گلشن آراء  جیسی  سخت گیر ساس  اور  سیمی  آپا  سمیت ۴ اور  نندیں  میلں  گی، گو  کہ  فطرتاً  سب  کی سب  آپا  جیسی  نہ  تھیں،  مگر  وقت  پڑنے  پر  وہ آپا  سے بھی  چار  چھ  ہاتھ  آگے  جانے  کی صلاحیت  رکھتی  تھیں۔

جس  وقت ماہم  کے  لئے  احمد  کا  رشتہ  آیا  ماہم  کی  امّی  کو  بھی  یہی  فکر تھی  کہ  ۵  بہنوں  کے  اکلوتے  بھائی  سے  کیسے  اپنی  اکلوتی  بیٹی  کی  شادی  کردیں،  ہمارے  معاشرے  میں  یوں بھی  ایک  عام  فہم  ہے  کہ  شادی  دو لوگوں کی نہیں   دو خاندانوں  کی  ہوتی  ہے،  مگر  اِن دو  خاندانوں  میں  برابری  کی  رشتہ داری کا آپ  تصور  بھی  نہ  کریں،  اِس  میں کسی  ایک  کا  پلڑہ  ہمیشہ  بھاری ہوتا  ہے،  اسی  لئے  اِس  تعلق  میں  برداشت، در گزر  اور  ایثار  کی  اہمیت  کو نہیں  سمجھا  جاتا،  اکژ  بہت  سے  رشتے  خاندانی  چپقلش کی نذر  ہو  کے  رہ جاتے  ہیں۔

ماہم  کے  معاملے  میں  سیمی  آپا  کی  شہرت  بہت  کام  آئی،  گلشن آراء  نے  ویسے  ہی  سارے  معاملات  اور  اپنی  عقل  اُنہی  کو  سونپی  ہوئی تھی  سو  اُنکی  ہر  صدا  پر  گھر میں  لبیّک  کی  آواز آتی  تھی۔ 

ماہم  کی  امّی  گلشن آراء کی خوش اخلاقیوں کے  بارے  میں کتنے  ہی  جھوٹ  بول  کر راضی  کر لیا  گیا

 آنٹی  آپ  یقین  نہیں  کریں  گی ہماری  امّی  نے  تو  ہم  پانچ  بہنوں کی تربیت  اور  شادی  بیاہ کے  لئے کیا کیا نہیں  کیا۔۔ اسی  لئے  وہ  سمجھتی  ہیں  کہ  بیٹیاں کتنی  قیمتی  ہوتی  ہیں،  اور  احمد  ہمارا  اکلوتا  بھائی  ہے،  اُسکی  بیوی  تو  سب  سیاہ  سفید  کی  مالک  ہوگی،  اللہ  کا شکر  ہم  سب  تو اپنے  گھر کے ہیں  ہمارے  سسرال  بھی ماشاءاللہ  اتنے  بھرے  پُرے  ہیں۔۔ کسی کو  فرصت  نہیں کسی  کے  معاملے  میں پڑنے  کی،  انشاءاللہ ماہم  خوشی  سے رہے گی۔  آپا  نے  ماہم  کی  امّی  کو  گھیرنے  کی  اچھی  پریکٹس  کی  تھی۔

نہیں  بیٹا  معاملے  میں  بولنے  والی  کیا  بات،  تم  سب  اُس  س  بڑی  ہو  اُسکی  بہت  موقعوں  پر  رہنمائی  کر سکتی  ہو۔۔ امید  کے  مطابق  ماہم  کی  امّی  باتوں  میں آچکی  تھیں۔ 

شادی  ہوگئی،  آپا  کی  ناک  مزید  اونچی  ہوگئی  تھی اور زبان  مزید لمبی۔۔ 

اماں  بلکل  سَر  مت  چڑہائیے  گا  ورنہ  سَر  چڑھ  کے  ناچے  گی  آپکے،  سب  کو  کونے  سے  لگا دے  گی خود  راج  کرے گی، آپ اگر  اِس عمر میں  بے  سہارا ہوگئیں  تو  کہاں  جائینگی۔  سیمی  آپا  نے  اب  اماں  کی  ساس ٹریننگ  شروع  کردی۔

اے  میں  کیوں سَر  چڑھانے  لگی،  سسرالوں  میں  سَر  نہیں  چڑھتا  کوئی،  میکے  کے  لاڈ  وہیں  چھوڑ  کے  آئیں،  گلشن آراء تو  ویسے  ہی  جلتی  بجھتی  چنگاری تھیں  بیٹیوں کی  شے  پر  تو  شعلہ  بن  کے  لپکنے  لگتی

ماہم  کے  لئے  یہ  رویے  اِسلئے  بھی  زیادہ  پریشان  کن  تھے  کیونکہ  اُسے  اِنکی  توقع  نہیں  تھی،  وہ  ایک  پر سکون گھر کا  خواب  لے  کر آئی  تھی  مگر  جس  گھر میں  وہ  رہ رہی  تھی  وہاں  ایک  عجیب  قسم  کا  تناؤ  تھا،  یعنی  ایک  سرد  خاموشی،  ایک بلاوجہ  کی  سی  ناراضگی  جسکا  اُسے  ہر  وقت سامنا تھا۔ 

ایک  مرتبہ  اُس  نے  ہمت  کر  کے  سیمی  آپا  سے کہہ  دیا۔

امیّ  مجھ  سے  زیادہ  بات نہیں کرتیں ، اُنہیں  میرا  کیا  ہوا  کوئی  کام  بھی  پسند  نہیں  آتا۔

شاید  اُنہیں  تمہاری  بات  بری  لگ  گئی  ہو،  دیکھو  شکایت  کرنا  آسان  سے  دل  جیتنا  مشکل  ہے ،  ہم نے  بھی  اپنی  سسرالوں  میں  اپنی  ہستی  مٹائی  ہے  تب  جا  کے  ایسا  مقام ملا  ہے کہ  سب سیمی سیمی  کرتے  ہیں۔  سیمی  آپا  نے  اُلٹا  اُس  ہی  کو  سنانے  والے  انداز میں  کہہ دیا،  ماہم  اپنا  سا  منہ  لے  کر  رہ  گئی۔

اور  آپا  کے  لئے  اتنا  کافی  نہیں  تھا۔

امّاں  کیا  چل  رہا  ہے  گھر میں؟  بہو  کے  دل  میں اتنی  نفرت  ہے کہ  بیٹیوں  سے  ماں  کی  شکایتیں  ہورہی  ہیں۔

اور  پھر گلشن آراء  نے  بھی  حسبِ  استطاعت  ماہم  کے  لتّے  لئے۔  

ماہم  نے  بہت  بجھے  دل  سے  سیمی  آپا  سے  کہا  کہ  اُس  نے  تو  اِس  انداز  میں  کچھ  نہیں  کہا  تھا  تو  سیمی  آپا  نے  بہت  سہولت  کے  ساتھ  الزام  یہ  کہہ کر خود  پر  سے  ہٹا  دیا،  میں  نے  تو اماں کو  سمجھانا  چاہا  وہ  غلط  سمجھ  گئیں۔۔ ماہم  خاموش  ہوگئی  اور  کیا  کرتی۔۔ وقت  گزرتا  گیا  خلش  بڑھتی  گئی،  سیمی  آپا  اور  اُنکی  بہنوں  نے  خوب  کردار ادا  کیا۔  پہلے   گلشن آراء  کو  اُسکے  کام  سے  مسئلہ  تھا  اب  وہ  اپنے  سب  کام  خود  کرنے  لگی  تھیں۔ ہر آنے  جانے  والا  ماہم  کو  چبھتی  ہوئی  نظروں  سے  دیکھتا  کبھی  کبھار  کوئی  موقع  دیکھ  کر  فرض  شناسی  اور  بزرگوں  کی  خدمت  پر حسبِ توفیق  سنا  بھی  دیتا۔۔ اب وہ کیا  بتاتی  کہ  بزرگوں  نے  خود  ہی  ٹھانی ہوئی  ہے  کہ  چھوٹوں  پر  شفقت  نہیں کرنی۔۔ گلشن آراء اس  قدر  بد دل  ہوتی  گئیں  کہ  تکلیف  اور بیماری  میں  بھی  ماہم  کو نہ  پکارتیں۔۔ اُسکو  کسی  نہ  کسی  بات  پر  کچھ  نہ  کچھ  کہتی  رہتی۔۔ وہ  خاموش  ہوتیں  تو  یہ  فرائض  سیمی  آپا  اور  دیگر  نندیں  پورے  کرتیں۔۔ بیٹیاں  آتیں  ماں  کے  کان  بھرتیں اور  چلی  جاتیں،  اُنکے  پیچھے اُنکی  ماں  کسی  کی  ناحق  دل  آزاری  کرتی  رہی،  کسی  کے  آنسوؤں  کی  وجہ  بنتی  رہی،  اور  جو  خدمت اس  عمر  میں  اُنکا  حق  تھی  وہ  اُنہیں  نہ  ملی۔۔ اس  لگائی بجھائی  کی  وجہ  سے  ایک  بہو  کتنے  ہی  سالوں  تک  سسرال  میں  سکھ  کا  سانس  نہ  لے  سکی،  ہر  رات  اِس  تکلیف  کے  ساتھ  سوئی  کہ  وہ  ایسے  گھر  میں  آگئی  ہے  جہاں  اُسکی  کوئی  وقعت  نہیں ہے۔  ماہم  کی  امّی  خود  کو  کوستی رہتی  کہ  کیوں  اُسکی  شادی  کی۔۔  وہ  اپنی  ماں  کو  یہی  کہہ  کر  تسلی  دیتی  کہ  یہی  میرا  نصیب  تھا۔۔ نصیب  تو  بلاشبہ  احمد  ہی  تھا  لیکن وہ  جس  طرح  کے  حالات  میں رہ  رہی  تھی  وہ  انسانوں  کی  تنگ  دلی  کے  سبب  تھا۔  ہم  لوگ  سروں پر  چادریں  اوڑھ  کر،  سر  کو  زمین  پر  مار  مار  کے  سجدہ  کر  کے، سمجھتے  ہیں  کہ  اتنا  کافی  ہے  یہ  بھول  جاتے  ہیں  کہ  اللہ  دلوں  میں  رہتا ہے ،  حق  تلفی  اور  دل  آزاری  کو  پسند  نہیں  کرتا۔ 

وقت  گزر  جاتا ہے  لیکن  ہر  برا  فعل  رقم  ہوجاتا  ہے  کراماً  اور  کاتبین  کچھ  نہیں  چھوڑتے۔۔ اور  حقوق العباد  تو  ہرگز  نہیں۔۔ وقت  اپنی  رفتار  سے  چلتا رہا  سالوں  بیتے  ماہم  کو  اب  اس  سب  کی  عادت  ہوگئی  اور اُس  نے  اپنا  دل سب  کی طرف سے  سخت  کرلیا۔۔ اُسکو  اب  کوئی  فرق  نہیں  پڑتا  تھا،  گلشن  آراء  کی  سخت  سست  لعن  طعن  میں  بدل  گئی ،  سیمی آپا  اور  دیگر  بھی  کھُل  کر  سامنے  آ چکی  تھیں،  گھر  کی  بہو  سے  کب  تک  پردہ  رہتا۔۔ 

گلشن  آراء  کے بڑھاپے  نے  اُنہیں  بہت  حد  تک  کمزور  کردیا تھا  مگر اپنے  کام  کے لئے  ماہم  کو  پکارنا  اب  انا  کا  مسئلہ  تھا۔  اِسی  انا  نے  اُنہیں  بستر  پر  پہنچا  دیا۔ چند  دن  تو بیٹیاں  بھاگی  بھاگی  آئیں۔۔ اور یہی  کہتی  رہیں  کہ  اِس  عمر  میں  بھی  اماں  کو  سب  خود  کرنا پڑتا  ہے  اسلئے  یہ  حال  ہوا۔  ماہم  خاموش  رہی  وہ  بس یہی  کرسکتی  تھی،  پتھروں  کے  ساتھ  کیا  سر  پھوڑتی ۔۔ ہلکے ہلکے  آمد  و  رفت کم  ہوگئی،  سب  کے  اپنے  گھر  تھے  سب  کی ذمہ داریاں ۔۔ ماہم  نے  وہ  سب  کیا  جو  پچھلے  کئی سالوں  کر سکتی  تھی  اور  سب  ایک  اچھی  زندگی  گزار  سکتے تھے  گلشن آراء  کئی  اور  سال  تک  صحتمند رہ  سکتی  تھیں  لیکن  کسی  نے  اُسے  موقع  نہ  دیا۔ اُس  نے  اُنکی  خدمت میں کوئی  کسر  نہیں  اُٹھا چھوڑی  مگر  شاید  اب  اُن  کے  پاس  وقت  نہیں  بچا تھا۔   ۸۵  سالہ زندگی  اُنہیں نہ  سکھا  سکی  مگر چار  مہینے  ۱۷  دن  کی  اس  طویل  علالت  نے  اُنہیں  صحیح اور  غلط  کی  تفریق  سکھا  دی،  لیکن  جو  نقصان  اُن کے  ہاتھوں  ہوگیا  تھا  اُسکا  خمیاضہ  ناممکن  تھا اُنہوں  نے  ۱۲ سال  اپنے  رویے  اور  اپنے  الفاظوں  سے  کسی  کو  تکلیف  دی تھی  اپنے  افعال  سے  اُسکی  حق  تلفی  کی تھی  اُسکو  لوگوں  کے  سامنے  بغیر  بات  کے  شرمندہ  کئے  رکھا  اور  اُس  نے  پھر  بھی  بیٹیوں  سے  زیادہ  اُنکی  خدمت  کی۔۔ 

اتوار  کا دن  تھا  سب  ایک  ہی  وقت  پر آ  موجود  تھے  اور  کھانا  کھائے  بغیر  تو  جاتے  نہیں،  ماہم  کا  کام ایک دم  سے  بڑھ  گیا تھا۔ ساری  نندیں  ساس  کے ساتھ  باتوں میں  مصروف  تھیں جب  اُنہوں  نے  ماہم  کو  آواز  دی،  اور  اُس  سے  اپنے  کئے  کی  معافی  مانگی،  ماہم  کے  لئے  یہ  بلکل  غیر  متوقع  تھا  اُس  نے  اِس  نیت  سے  کچھ  کیا  بھی  نہیں  تھا۔

ساری  نندوں  کو سانپ  سوُنگھ  گیا  تھا۔  گلشن  آراء  کی  ایک  معافی  نے  اُنہیں پوری  زندگی  کے  لئے  اُسکے  سامنے  شرمندہ  کر  دیا تھا۔      

اُس  دن  پانچوں  نندیں  کھانا  کھائے  بغیر  ہی  چلی گئیں  اور  اگلے پانچ روز  تک  خبر  لینے  نہیں آئیں  اور  چھٹے  دن  خبر  خود  اُنہیں  لینے  پہنچ  گئی  کہ  گلشن  آراء  دنیا  سے  چلی  گئیں۔۔ 

بہت  سے  لوگ  ماہم  کی  خدمت  گزاری  کا  گن  گان  کرتے  نظر  آئے  تو  کوئی  کوئی  اُسے  لعنت  ملامت  کرتا  بھی  سنائی  دیا۔۔ ماہم  بے حد  دکھی  تھی، لوگوں  کو  علالت  چڑچڑا  کردیتی  ہے  لیکن  گلشن  آراء  کی  علالت  نے  اُنہیں  کم  از کم  ماہم  کے  ساتھ  کتنا  خوش اخلاق  کردیا  تھا۔  وہ  خوش  تھی اور  پرامید  کہ  وہ  جلد  ہی  ٹھیک  ہوجائیں  گی  اور  پھر  وہ  دونوں  ایک  خاندان  کی  حیثیت  سے  خوشحال  زندگی  بسر  کریں  گے۔۔ لیکن  انسان  کو  اپنی  اگلی  سانس  کی  بھی  خبر  نہیں مگر وہ  زندگی  ایسے  گزارتا  ہے  جسے  اُسے  خدا  کا کبھی  سامنا  نہیں کرنا۔

پُرسے  کے لئے  آنے  والوں  کے  جانے  کے  بعد  سیمی  آپا  کی  چھوٹی  بہن  شاید روتے  ہوئے  شدتِ  جذبات  میں  بول  اُٹھی،  ماہم  ہم سب  نے  تمہارے ساتھ  برا  کیا اور  تم  نے  پھر  بھی  ہماری  امّی  کی  خدمت کی۔

ماہم  نے  بہت  سال  کی  خاموشی  کو  توڑ  کر  بولا

آپ  لوگوں  نے  میرے  ساتھ  کچھ  برا  نہیں  کیا،  آپ  سب  نے  اپنی  ماں کے  ساتھ  برا  کیا،  اُن  کو  میری  حق تلفی  اور  دل  آزاری  کا  ذریعہ  بنا  کر  اُنکی  عاقبت  خراب  کردی!  اُنہیں دنیا  میں  بھی  دق  اُٹھانا  پڑا  اور  آخرت میں  بھی  اللہ  کی  پکڑ  کا  ڈر  ہے،  پھر  بھی  میں  نے اپنی  طرف  سے  اُنہیں معاف  کیا تاکہ  اللہ  میری  کوتاہیاں  بھی  معاف  کرے۔

نوٹ:  ایسے  انجام  صرف  کہانیوں  میں  ہوتے  ہیں، اصلی  زندگی  میں لوگوں  کو  موت  کا  فرشتہ  دیکھ  کر بھی  اپنی  غلطیوں کا  احساس  نہیں  ہوتا،  البتہ  باقی  کہانی  ہر  دوسرے  گھر  کی  حقیقت  کا  آئینہ  دار ہے۔ 

رضاکار

مئی  کی  تپتی  دھوپ  تھی،  رشید مسجد  کے  نل  سے  بوتل  بھر  لایا  اور رکشہ  میں  بیٹھ  گیا،  گرم  پانی  پینے  سے  طبیعت  مزید  بے چین  ہوگئی  لیکن  اس  وقت  پیاس  بجھانے  کو  اور  کچھ  میسر  نہیں  تھا،  دوکانوں  سے  ۲۵  روپے  کی  ٹھنڈی  بوتل  وہ  خرید  نہیں  سکتا  تھا، اور  گھر  میں بھی  برف  نہیں تھا۔ اور  برف  لا  کر  وہ  کرتا  بھی  کیا!  رشید  شہرِ کراچی  میں جگہ  جگہ بے ڈھب طریقے  سے بنی  کچی آبادیوں یعنی  جھگی  بستی  میں  سے  ایک  کا مکین  تھا۔  پتہ  نہیں یہ  اس  شہر کی  بد قسمتی  ہے  یا  یہاں  بسنے  والے  لوگوں  کی  کہ  جہاں  یہ  کچی  آبادیاں  شہر  کو  بدصورت بناتی  ہیں وہیں یہ  رشید  جیسے  کتنے  لوگوں  کے  لئے  سر  چھپانے  کا  سامان  کرتی  ہیں،  صوبائی  حکومت  کے  نظم  و  ضبط  کا ناقص  نظام  ہر  طبقے  کے  لوگوں  کے  لئے  ایک  اذیت  ہے۔   رشید ابھی صرف ۱۹  سال  کا تھا  مگر اس  نے  کرائے  پر  ایک  رکشہ  لیا  ہوا  تھا  جسے  چلا  کر  وہ  اپنا  گزر  بسر  کرنے  کی  کوشش کرتا تھا،  گزشتہ  کئی دنوں  سے اُسکے  علاقے  میں  پانی  والے  نل  میں سے گندا  بدبو دار  پانی  آرہا  تھا۔ شاید  کراچی  واٹر  بورڈ  کی  لائینیں ،  نکاسی  یعنی  سیویج  سے  جا  ملی تھیں، جھگی  کے  ایک  بزرگ اکرم  چاچا  نے  اُسے  یہی  سمجھایا تھا۔ 

علاقے  کے  لوگ  اس  شدید گرمی  میں پانی  سے  محروم  ہوگئے  تھے۔۔ رشید کی  اماں  روز  پوچھتی تھیں  کہ  پانی  کب  ملے  گا۔۔  اکرم  چاچا  شہر  کے  بارے  میں  بہت  جانتا  تھا  وہ  کہتا  تھا  پانی  کا  مسئلہ  اب  پورے  شہر  کا  مسئلہ  ہے  امیر طبقہ  بھی  پانی  کے  ٹینکر خریدنے  پر  مجبور  ہے ،  چاچا  قریب  ستّر  برس  کا  تھا  جب  وہ  کراچی  آیا  تھا  کراچی  ایسا  نہیں  تھا  وہ  کہتا  تھا  اُس  نے  کراچی  کو ایک  معصوم  چڑیا جیسا  دیکھا  تھا  لیکن  پچھلی  دو  دہائیوں  میں  کراچی  ایک خطرناک  اژدھے  جیسا  ہوگیا ہے، رشید کو   شہر کے بارے  میں  ایسی  باتیں  سمجھ  نہیں آتیں،  چاچا  کہتا  ہے جن لوگوں  نے  شہر  سے  اِسکا  سکون  چھینا  ہے  ایک  دن  یہ شہر  اُنہیں  نگل  جائے  گا،  اور  تب  افسوس  کرنے  کو  کچھ  نہیں  بچے  گا۔۔ 

اِنہی  سوچوں میں گم  وہ  رکشہ کو صدر  تک  لے  گیا۔۔۔ وہ  زینب  مارکیٹ  سے  پہلے  والے  سگنل  پر  کھڑا تھا  کہ  اُسے  دور گلی  کے  موڑ  پر ایک  ممکنہ  سواری  نظر  آئی۔۔ 

جی  باجی  کہاں جائینگی؟  اُس  نے  قریب  لے  جا  کے  پوچھا

لڑکی  کا میک اپ  سے  تھُپا چہرہ  دھوپ  کی  شدت  سے  سُرخ  پوچکا  تھا،  رشید نے  دیکھا موڑ  پر  اُسکے  ساتھ  دو  کمزور  لڑکے  بھی  ہاتھ  میں مائیک کیمرہ  اور  اسٹینڈ  جیسی  چیزیں  اُٹھائے  کھڑے  ہیں اور  پیچھے  ایک  وین  کھڑی  ہے۔ 

میں اب  رکشہ  میں  جا  رہی  ہوں،  تم  دونوں وین ٹھیک  کروا  کر  آجانا ۔۔ میں اسفند  کو  کال  کردوں گی۔ اُس  نے  اُن  دونوں  کو  کرخت  آواز میں  کہا  اور  پھر  رشید  سے  مخاطب  ہوئی 

ہاں  بھائی !  گلشنِ اقبال  جانا  ہے۔

بیٹھیں  باجی!

رکشہ  میں  بیٹھتے  ہی  اُس  نے  کال  لگا  لی،  اور  اگلی  طرف  کال  اُٹھا  لی  گئی

ہیلو اسفند!  یار  سب  میس اَپ  ہوگیا۔۔ اسٹوری  نہیں  ملی ۔۔ اور  وین  بھی  خراب  ہوگئی  ۲۰  منٹ دھوپ  میں  کھڑی  رہی ۔۔ یار  اُنکے  ایریا  میں بلدیاتی  انتخابات  شروع  ہوگئے ۔۔ اُس  سالے  امیدوار  نے  بجلی  کے  مسئلے  پر  پتہ  نہیں  کیا  کیا  کروایا اور  میڈیا کوریج  بھی  ہوگئی، اب میں  کیسے  اُس  مسئلے  پر  اسٹوری  بناتی۔۔ ہاں وہ  دونوں  وین  لے  کر آجائیں  گے  ۔۔ اوکے۔۔ اُس  نے  منہ  بنا  کے  فون  رکھ  دیا ۔۔

رشید  کو  لگا  کہ  وہ  عورت غریب علاقوں  کے  مسائل  پر  کام  کرتی  تھی۔۔

باجی  آپ  ہمارے علاقوں  کے  مسائل  پر کام  کرتی  ہیں۔ اُس نے  سادگی  سے  پوچھا

لڑکی  نے  ابرو اُچکا  کر  اُسے  دیکھا۔۔  کیا  مطلب؟

نہیں  وہ  اصل  میں  ہمارے علاقے  میں  بھی  پانی کی  جگہ  نالے  کا  پانی  آ  رہا ہے۔۔

آ  ۔۔ اچھا۔۔ کہاں  ہے  تمہارا گھر۔۔  اُس  نے پوچھا۔۔

رشید نے  اُسکو  اپنے  علاقے  کا  مکمل  پتہ دیا اُس  نے  بیگ  سے  نوٹ  پیڈ  نکالا  اور  تیزی  سے  لکھنے  لگی،  پھر اپنے فون  پر  کچھ  لکھنے  لگ  گئی۔۔ 

اُسکو  اپنی  منزل  پر  اُتار  کر  رشید  پھر  سے  اپنی  روزی  کے  لئے   شہر  بھر میں رکشہ  دوڑاتا  رہا۔ 

*********

 اِس واقعے  کے  دو دن  بعد تک  بھی  پانی  کا  مسئلہ  جوں  کا  توں  تھا۔۔ صبح رشید  کام  پر  جانے  کے  لئے  نکل  رہا تھا  کہ  گلی  سے  عجیب  شور کی  آوازیں  آنے  لگیں۔۔ اُس نے  باہر  جھانکا  تو  بچے دوڑتے  بھاگتے  جا رہے  تھے  اور  عورتیں  گھروں  سے  نکل  نکل  کر  دیکھ  رہی  تھیں،  رشید نے  دیکھا  وہی  لڑکی جو غریبوں  کے  مسائل  پر  کام  کرتی ہے۔۔  اُنہی  دو  لڑکوں اور  مزید دو چار لوگوں  کے  ساتھ  وہاں  موجود  ہے۔۔ رشید  بہت  خوش  ہوا اب  باجی  ہمارا  مسئلہ  حل  کرادیں  گی۔۔ اور  میں  سب  کو  بتاؤں  گا  کہ  باجی  کو  میں لایا  تھا۔۔ وہ  یہ  سوچتا  ہوا اُس ک ے قریب  بڑھا۔۔  وہ لڑکی  بھی  رشید  کو  پہچان  گئی ۔۔

 ہاں  بھائی!  لڑکی  نے اُسے  مخاطب  کیا۔۔ پانی  ابھی  بھی  گندا  آرہا  ہے؟

جی  باجی!  اُس  نے  تیزی  سے  سَر  ہلایا

ٹھیک  ہے  تم  ہمیں  اپنے  علاقے  کا  نل  دکھاؤ۔۔ اور  تم  ٹی وی  پر  بتانا  یہ  سب  کہ  کتنے  دن  سے  یہ  مسئلہ  ہے۔۔ ٹھیک  ہے؟ وہ  جلدی  جلدی  ہدایت  دے  رہی  تھی۔۔

وہ  پیچھے  پیچھے  چلتا  رہا۔۔ 

اکرم  چاچا  بھی  آگئے۔۔ اُس  نے  خوشی  نے  اُنکا  تعارف  کروایا  لڑکی نے  بے  دھیانی  سے  سُنا۔ اب  وہ  اپنے  ساتھ  آئے  لڑکوں  کو کچھ  سمجھا  رہی تھی  

پھر  وہ  مائیک  ہاتھ  میں  پکڑ  کر پلٹی۔۔ ایک  لڑکا  کیمرہ  اُسکے  آگے  آگے  لئے  چلتا  رہا

اسلام علیکم ناظرین  میں ہوں  سنعیہ اکمل  اور  آپ  دیکھ  رہے  ہیں  پروگرام  رضاکار ۔۔  ناظریں  جیسا  کہ اب  تک  کہ  ہمارے  متعدد شوز  میں  ہم  شہرِ کراچی  کے  مسائل  کو  نہ  صرف حکومت  کی  نظروں  میں  لا  چکے  ہیں بلکہ  ہم  اُن  سب  کو حل  کروانے میں  بھی  ہمیشہ  کامیاب  رہے  ہیں ،  ہم  نے  رضاکارانہ  طور  پر خود  اپنی  اور  اپنے  شہر  کی  حالت  کو  سدھارنے  کا  بیڑا  اُٹھایا  ہے ۔۔ ناظرین  اسی  حوالے  سے  ہم آج  موجود  ہیں  ناظم آباد  میں  موجود ایک  کچی  آبادی  میں  جہاں  کہ  مکین  پچھلے  کئی  دن  سے  صاف  پانی  سے  محروم  ہیں! شہر  میں  لوگ  اِن  بستیوں  میں  کیسی  زندگی  گزار  رہے  ہیں آئیں  انہی  سے  پوچھتے  ہیں ۔۔ اُس  نے  مائیک  پہلے  رشید  اور  پھر اکرم  چاچا کی  طفر  بڑھایا  اور  کئی  سوال پوچھے  چاچا کو  اپنی  معلومات  کا  رعب  جھاڑنے  کا  اچھا  موقع  مل  گیا  اور  وہ  اپنا  ستر  سال  پرانا  کراچی  نامہ  پڑھنے  لگے  البتہ  رشید نے  بتایا کہ  اس قیامت  کی  گرمی  میں  پانی  کی  عدم  دستیابی  نے اس  چھوٹی  سی  بستی  کے  کتنے  ہی  لوگوں  کی  زندگیوں  کو  متاثر  کیا  ہوا  ہے۔۔

ناظرین  آپ  نے  دیکھا کس  طرح  یہ  شہری  اس تکلیف میں زندگی  گزارنے  پر  مجبور  ہیں ہم  حکومتِ وقت  سے  اپیل  کرتے  ہیں  کہ  نہ  صرف  اِس  بستی  بلکہ  ایسی  تمام  بستیوں  کی  حالت  کو  سدھارا  جائے  انہیں پکی اور  قابل  رہائش  جگہوں  میں  تبدیل  کیا  جائے  تاکہ  یہ  شہر  کی خوبصورتی  کو  متاثر  نہ  کریں،۔ اور  صرف  یہی  نہیں ناظرین  ہمیشہ  کی  طرح  اس  بار  بھی  ٹیم  رضاکار ان  رہائشیوں  کے  مسئلے  کو  خود حل  کرنے  کی  سعی  کرے گی جب تک  کہ  صوبائی  حکومتیں  اس  پر  نظرِ  ثانی  کرتی  رہیں۔۔ اسی  امید  کے  ساتھ  کے  ہم  جیسے  رضاکار  ایک  دن  بنائیں  گے  کراچی  شہر کو ایک  مثالی  شہر۔۔ اگلے  ہفتے  پھر  ملیں  سے  ایک  نئے  مسئلے  اور  اُس  مسئلے  کے  حل  کے  ساتھ جب  تک  دیکتھے  رہیں رضاکار!

پروگرام  ایک  دن  بعد نشر  ہوگیا۔۔ 
سنیعہ  اکمل  کے  یوٹیوب  چینل  پر  سبسکرائبر  کی  تعداد  بڑھ  گئی ،  فیسبک  پر  لائک  اور  کمینٹ  بھی  بہت  زیادہ  ہوگئے  تھے،  لوگ  اُسے  ’’انسپریشن‘‘  کہتے  تھے  اُسکے  جیسا  نیک  کام  کرنے  کے  لئے  مر رہے تھے

نل  میں گندا  پانی  اب  تک  آرہا  تھا۔۔

چاچا  وہ  باجی  کب  آ  کے  پانی کا  کام  کروائے  گی۔  کسی  نے پوچھا

اے  مجھے  کیا  پتہ۔ چاچا  نے  چڑ  کر  کہا۔۔

پندرہ  دن  بعد  تک  بھی نل  میں گندا  پانی  آتا  رہا، 

مائی  صغرا  کی  پوتی  بیمار  پڑگئی تھی،  اُسکو  حیضہ  ہوگیا  تھا  شاید  اُس  نے  غلطی  سے گندے  پانی  سے  منہ  ہاتھ  دھو لیا ہوگا۔۔ 

گرمی  نے  حشر  برپا کررکھا  تھا۔۔ 

رشید  کو سمجھ  نہیں  آرہا تھا  کہ اتنا وقت  لگا  کر  ہمارا  مسئلہ  دنیا  کو  دکھانے  والی وہ  باجی  آخر  کہاں رہ  گئی۔۔

اُسے  کیا  معلوم  کہ  باجی  کو  اُسکے  مسئلوں  سے  کبھی  کوئی  سروکار  نہیں تھا،  وہ  کیوں  اپنے  پلّے  سے  کچھ  کرتی  اُس کو  سروکار تھا  اپنے  شو  کی  ٹی آر پی سے  جو  رشید  نے اور  رضاکاری  کے  ٹیگ  نے  اُسے  دلوادی  تھی!

شناخت

سڑک  لمبی  تھی،  سنّاٹا چھایا تھا،  دور کہیں سے   اسٹریٹ لائٹ   کی  ہلکی  سی  روشنی  اندھیرے  سے  مصروفِ جنگ  تھی،  اتنی  روشنی  تو تھی  کہ  راستہ  معلوم  کرلیا  جاتا،  رات  کے  ساڑھے  تین  بج  رہے  تھے  تمام  گھروں  کی  بتیاں  بجھ  چکی  تھیں،  میرا  تو یہی  معمول  تھا،  روز  اِسی  وقت  آتا  تھا اب  تو  اِس  اندھیرے  میں  راستہ  ڈھونڈنے  کی  عادت  سی  ہوگئی تھی، سارا  سارا  دن گھر  سے  باہر تفریحاں  کرتا  پھرتا  تھا، رات  کو  اِسی  پہر میرا  دوست احسن  مجھے  گلی  کے  کونے  تک  چھوڑ  جاتا  اور پھر  یہ  لمبی  گلی  عبور کر کے  میرا محلہ  شروع  ہوتا،  اِس  دس  منٹ کی  واک  میں  میَں  خود  سے  بہت  باتیں  کرلیا  کرتا  تھا، اپنا وقت ضائع  کرنے  پر خود  سے افسوس  کرتا،  آئندہ  سے  روٹین  کو  بہتر  بنانے  کا  وعدہ  کرتا،  اپنے  مستقبل  کے  لئے  آسمانوں  پر  محل بنانے  جیسے  عزائم  کا  ارادہ  کرتا،  اور  پھر  گھر  پہنچ  کر  جب  بستر  پر  گِرتا  تو ایسی  غفلت  کی  نیند  مجھ  پر طاری  ہوتی  کہ  میرے  جاگنے  کے  ۱۸  گھنٹے  بعد  تک بھی  میرے  اندر  کا  علی  حسن سویا  پڑا  رہتا،  اور  پھر  علی  حسن  سے فرق  بھی  کسے  پڑتا  تھا،  بڑے  بھیا  سعودی  عرب  میں  ڈاکٹر  تھے، بڑی  باجی  کی شادی  لندن  میں ہوئی تھی،  میرے  پاس  خوبصورت اور قیمتی اشیا  کا  انبار  لگانے  والے  یہی دونوں  تھے،  جب  بغیر  مانگے  سب  کچھ  مل  جائے  تو بھی  انسان کی  شخصیت  پر  کچھ  ویسے  ہی  برے  اثرات  پڑتے  ہیں  جو  مجھ  پر  پڑے،  پھر  ابا  کو  لگا  کہ  مجھ  پر  سختی کرنی  چاہیے  لیکن  تب  تک  بہت  دیر  ہوچکی  تھی میں اچھا  خاصا  بےحس  ہوچکا  تھا،  ابا  نے  مجھے سبق  سکھانے  کے  لئے  بائیک  اور  گاڑی سے  محروم  کردیا میَں  نے  اِسکا  بدلا سارا  سارا  دن  باہر  رہ  کر  نکالا، ہاں  کبھی  کبھی  میں یونیورسٹی  بھی  چلا جاتا تھا  کیونکہ  ابا  اور  بھیا  نے  لاکھوں روپے لگا کر  میرا  ایڈمشن  کروایا تھا،  کیونکہ  سرکاری  یونیورسٹی  میں  تو  وہ  بیرون ملک  سے  تعلیم  یافتہ  فیکلٹی  آتی  نہیں۔۔ اِس  ملک  میں تو  سرکاری  یونیورسٹی  کے  اساتذہ  تک محفوظ  نہیں،  تو  میں  کیسے  رِسک  لیتا۔۔  مجھے  اِس  ملک  اور  یہاں  کی  زندگی  سے  سخت  چڑ  تھی،  جب  تک  بھیا  یہاں  تھے  ہمارے  گھر میں  وہ سب  نہیں  تھا  جو اب  ہے،  اور  اُنہیں  یہ  آزادی  نہیں  تھی  جو  اب  ہے۔  مجھے  کچھ  بھی  کر  کے  یہاں  سے  نکلنا  تھا۔۔ تاکہ  میں بھی  آزادی  سے  رہوں  یہاں تو  ویسے  ہی  آئے  دن دہشت گردی اور بم  دھماکے  ہی  ہوتے  ہیں،  اور پولیس  والوں  کا  سارا  بس  ہم  جیسوں  پر  چلتا  ہے،  رانگ وے  نہیں آسکتے،  وَن  ویلنگ  نہیں  کرسکتے ، زرا  گھر  سے  باہر  نکلو  تو  راستے  میں  کھڑے  تمام  ’’ٹلُوں‘‘  کو عیدی  دے  کر  جاؤ۔۔ مجھے  یہاں  ہر  ایک  شے  سے  نفرت ہے۔۔ پتہ  نہیں وہ  جو  قائداعظم  تھے  اُنہوں نے  پاکستان  کیوں  مانگا، جب  مانگ  ہی  رہے  تھے  تو  امریکہ  مانگ  لیتے۔۔ اور  اِنہی  سوچوں میں ایک  دم  مجھے  ٹھوکر  لگی  اور  میں  گِر  گیا۔۔ اوفوہ!  ہاتھوں کے بل  میں سنبھل تو  گیا  مگر ہاتھ  چھِل  گئے۔  

 بیٹا چوٹ  تو نہیں لگی ‘‘  ایک  نحیف سی آواز  میرے  قریب  سے  آئی،  ایک  عجیب  سا  خوف  میرے  اندر  دوڑ  گیا،  رات  کے  اِس  وقت  یہاں  کون۔۔  

میں  نے  ایک  جلتی  بجھتی اسٹریٹ  لائٹ  کی  روشنی  میں  دیکھنے  کی  کوشش  کی  ۔۔ ایک  بوڑھا  شخص  دیوار  سے  ٹیک  لگائے  بیٹھا  تھا ۔۔  کون ہو  تم؟ یہاں کیا  پڑے  ہو۔۔ میں  نے ساری  ہمت  جمع  کر کے سختی سے  پوچھا  کہیں کوئی  چرسی  یا  ڈکیت  نہ  ہو! 

 یہاں کیا  کر رہا  ہوں؟  شاید میں خود  بھی  نہیں  جانتا،  شاید  یہاں پہنچا  دیا  گیا ہوں‘‘  بوڑھے  نے  آزردہ  لہجے  میں  بولا 

میری  ہمت  تھوڑی  بحال  ہوئی، اُسکی  آواز  سے  لگا کہ  وہ  نشے  میں  نہیں تھا،  اور  اتنا  نحیف تھا  کہ چور بھی  نہیں  ہوسکتا  تھا  لیکن  پھر  وہ  یہاں  کیوں۔۔ کہیں  یہ  اُن  لوگوں  میں  سے  تو  نہیں  جن  کے  بچے  اُنہیں گھر  سے نکال  دیتے  ہیں۔۔ لیکن  ماں  باپ ایسی حرکتیں  ہی  کیوں کرتے  ہیں  میں  نے  خود  سے  خود  سوچا،  پھر  ذہن  میں  کچھ  خیال  آیا  تو  اُن کے  رو برو وہیں  بیٹھ  گیا اور  پوچھا،  بتائیں  آپ  کیسے  پہنچے  یہاں  اور  کیا  کررہے  ہیں ایسے  بیٹھ  کے۔ 

بس  بیٹا  نصیب  میں  تھا  یوں  ٹھوکریں  کھانا  تو  کھا  رہا  ہوں۔

میرا  اشتیاق  بڑھا

کیا  آپکے  بچوں  نے  آپکو  نکال  دیا؟ میں  نے خود  سے  سوچی  ہوئی  بات  کہی  

نہیں  بیٹا۔  میَں نکالا  نہیں گیا۔۔ میں  اِس  سے  بھی  بد  تر  کیفیت  میں  ہوں  نہ  جی  رہا  ہوں  نہ  مر رہا  ہوں،  نہ  مر  سکتا  ہوں،  جنہیں اپنا  سمجھتا  تھا  اُنہوں  میرا  سب  کچھ  لوٹ  لیا، مجھے  مار  مار  کے  بے جان کردیا،  اور  پھر  دنیا  میں عزت  سے  بڑھ  کر  کیا  ہے۔۔ میرے اپنے  تو  میری  عزت  کے  دشمن  ہیں

مجھے  لگا  کہ  آنسو  اُنکے  حلق میں  اُترے  ہیں

ایسا  کیا  ہوا؟ میری دلچسپی  بلاوجہ  ہی  بڑھ  رہی  تھی

سنُو  گے  میری  کہانی؟  بوڑھے  نے  پراسرار  انداز  میں  کہا

ہاں۔ میں نے  برجستہ  جواب  دیا۔۔

ہوا  کا  ایک جھونکا  سا  آیا  اسٹریٹ  لائٹ  ہلی ،  روشنی  نے  اپنے  زاویے  بدلے،  بوڑھے  شخص  پر  روشنی کی  ایک  لہر  آئی  اور  گئی  اور  میری  حیرت  کی انتہا  نہ  رہی،  اُنکا  ایک  بازو  نہیں  تھا

آپکا  ایک  ہاتھ؟  جملہ  میرے  حلق میں رہ  گیا۔ 

جب  میں  ۲۵  سال  کا  تھا  تب  کٹ  گیا تھا۔۔ مجھ  سے  کچھ  بولا  نہیں  گیا۔ اُنہوں نے  تھوڑے  سے  توقف  کے  بعد  خود  ہی  بولا۔

اصل میں میَں  بڑی  منتوں  مرادوں  کے  بعد  حاصل  کئے  جانے  والی  اولاد کی  طرح تھا  مجھے  لگتا  تھا  میرا  مستقبل  بہت  روشن  ہوگا، لیکن  میرا باپ  مجھے  وجود  میں  لانے  کے  ایک  سال  بعد  ہی  مجھے  لاوارث  چھوڑ  گیا۔  خیر زندگی  اور  موت  تو  اللہ  کے  ہاتھ ہے، اللہ  نے  مجھے  وجود  دیا تھا اور  اللہ  ہی  میرا نگہبان ہے۔۔ بابا  کے  جانے  کے  بعد  میں  بس  ایک مالِ غنیمت  کی  طرح  کی  لوُٹا  گیا ہوں،  میرے  سرپرست  بدلتے  رہے  مگر  موقف  سب  کے  ایک  ہی رہے،  میرے  حصے  میں  اللہ  کی  طرف  سے  آئی  ہر  دولت  وہ  لوٹتے  رہے،  میں اندر  سے  کمزور  ہوتا گیا۔۔ اپنے  مفاد  کے  لئے  میری  پہچان  کو  استعمال  کر  کے  میرا استحصال کرتے  رہے،  اسی  لئے  میری  حیثیت لوگوں کی  نظر میں ہمیشہ  کمزور  رہی۔۔  اُنکا  لہجہ  مکمل  بھیگ  چکا  تھا،  مجھے لگا وہ  بہت  زیادہ  رو  رہے  ہیں،  مجھے  دل  ہی  دل  میں اُن  سے  ہمدردی  ہوئی۔۔ میںَ  اب  بہت  زیادہ  ہی  ادب  کا مظاہرہ  کرنے  لگا

پھر  جب  میں  ۲۵  سال  کا  تھا  میرے  چند  سرپرستوں  نے  مجھے  مزید  کمزور  اور  ناکارہ  بنانے  کے  لئے  میرا  ہاتھ  کاٹنے  کی سازش  کی،  اور  کامیاب  ہوگئے،  کیسے  نہ  ہوتے،  ایک  کمزور  یتیم  کے  لئے کون  آواز  اُٹھاتا،  اور  پھر  آواز  تو  اپنے  اُٹھاتے  ہیں  جب  غیر  سازش کرتے  ہیں ،  میرے  تو  اپنے  ہی۔۔ 

وہ کہتے  کہتے  رُک  گئے۔۔ شاید  کچھ  سوچ  رہے  تھے۔۔ ایک  ہوا  کا  جھونکا  آیا،  اسٹریٹ لائٹ  پھر  جھولنے  لگی،  اُنکے آنسوؤں  سے  تر چہرے  پر روشنی  پڑی،  خون بہہ رہا  تھا شاید  چوٹ لگی  تھی۔۔

آپ  زخمی  ہیں؟ 

ہاں بیٹا۔۔ میں  زخمی  ہوں بہت  زیادہ،  سانس  لے  رہا ہوں کیونکہ  اللہ  میرا  نگہبان ہے،  وہ  جانتا  ہے میری اہمیت  وہ  جانتا میری  زندگی  ضروری  ہے،  اِسلئے  جئے  جا  رہا  ہوں،  لیکن  بیٹا  اِس  بےچارگی  کی  زندگی  کا  کوئی  فائدہ  نہیں  ہے،  روز  نفرتوں کے گرد  سانس  لینے  کا  کوئی  فائدہ  نہیں  ۔۔ بیٹا میرا  کوئی  نہیں

وہ  پھوٹ  پھوٹ کر  رونے  لگے۔

آپ  روئیں  نہیں! دیکھیں  پلیز۔۔ میںَ  ۔۔ میَں  رکھوں  گا آپکا  خیال۔۔ بے  اختیار  ہی میرے  منہ  سے نکلا۔۔ میں  غیر  ذمہ دار  اور بے فکر ضرور  تھا  مگر بے حس  نہیں تھا۔۔ جانے  کیوں  مجھے  اُن  کے  سچے  لہجے  سے  اُنسیت  سی  ہوگئی  تھی۔۔ ٓاُنکا  درد  میرا اپنا  لگنے  لگا  تھا۔۔        

تم؟ اُنہوں  نے  حیرت  سے  دیکھا۔۔ 

نہیں  بیٹا؟ تم بھی  اُنہی  میں  سے  ایک  ہو؟  اُنہوں  نے  دکھ  سے  کہہ  کر  سر  جھٹک  دیا

کیا؟ میں  نے  بے  یقینی  سے  بولا میَں  کیسے۔۔

فجر  کا  وقت  ہو  گیا۔۔ فضا  میں  اللہ  اکبر  کی  پہلی  صدا  گونجی

ہاں  تم! 

مجھے  اُنکی  ذہنی  حالت پر شک  سا  ہوا۔۔ اُنہوں  نے  سامنے  رکھی  اپنی  لٹھ  اٹھائی اور  اُسکا  سہارا  ٹیک  کر  اُٹھنے  لگے۔۔ 

بابا  کہاں  جارہے  ہیں  آپ ؟  میں  بھی اُٹھتے  ہوئے  بولا

کہیں  نہیں ۔۔ تم جو جھوٹی  آس  مجھے  دینا  چاہ  رہے  ہو بس اُس  سے دور  جا  رہا  ہوں۔۔

کیسی  باتیں  کررہے  ہیں۔۔ 

وہ  اپنا لاغر  وجود  لٹھ  کے  سہارے  گھسیٹ  رہے  تھے۔۔ وہ  شاید  ۷۰ ۔  ۶۸  کے  سال  کے ہوں ۔۔ مگر  اُنکا  کمزور  جسم دیکھ  کر مجھے  واقعی  دکھ  ہو رہا  تھا۔۔ اور  مجھے  ایسا  لگا  جیسے  وہ  مجھے  کھلنڈرا  سا  سمجھ  کر  میری  بات  ٹال  گئے۔۔ میں  نے  یکدم  جوش  میں  آ کر  اُنہیں  آواز  دی۔۔

بابا  رُکیں  تو۔۔ اپنا  نام بتائیں  مجھے۔۔ میں اُن  سب ظالموں  کو  ڈھونڈ  لوں  گا  اور  اُن  سے  بدلا  لوں  گا  ۔۔ آپ  میرا  یقین  کریں

سورج  کی  پہلی  کرن  پھوٹ  گئی۔۔ رات کی  سیاہ دھاری  صبح  کی سفید  دھاری  سے  الگ  ہونے  لگی

بابا  چلتے  چلتے  رکے۔۔ میں  سانس  روکے  اُنہیں  دیکھتا  رہا  اور  وہ  آہستہ  سے  مڑے،  اُن  کے  چہرے  پر  جو  کرب اور  بے  بسی  تھی  وہ میرے  جیسے  خوشحال  طبقے  کے  لوگوں  کو  اپنی  زندگیوں  اور  اپنے  آس  پاس  کے  لوگوں میں  کم  ہی دیکھنے  کو  ملتی  ہے۔۔ 

میرا  نام؟ ۔۔۔ علی  حسن۔۔ میرا  نام  تم  جانتے ہو۔۔  بابا نے  رُک  رُک  کر  کہا۔

مَیں  آپکا  نام؟ اور۔ آپکو  کسیے  پتہ  کہ  میرا  نام۔۔ 

میں  حیرانی  سے کہہ  رہا تھا کہ  وہ  میری بات  کاٹ  کر  بولے۔

میرا  نام  پاکستان ہے۔۔

 سورج  کی  کرن زمین  تک  پہنچ  گئی  تھی  روشنی  ایکدم اتنی  تیز  ہوگئی  تھی 

 کہ  علی  کی  آنکھیں  چندھیا  گئیں۔۔ اُس  نے  گھبرا  کے  منہ  پر ہاتھ رکھا۔۔ 

اور ایک  جھٹکے  سے  وہ  اُٹھ  کر  بیٹھ  گیا۔۔ پسینے  سے  اُسکا  جسم  شرابور  ہورہا  تھا۔۔ سامنے  دیوار پر  کلینڈر لٹکا تھا ۔۔ آج  ۱۴  اگست  تھی۔۔ آج  کے  دن  پاکستان  وجود  میں آیا  تھا۔۔ اور آج  کے  دن  شاید علی  حسن بھی اپنے اصل وجود میں آگیا  تھا۔۔ اُس  نے  زندگی  میں  شاید  کچھ  اچھا نہیں  کیا تھا۔۔ لیکن  اللہ  نے  اسکے  لئے  کچھ  اچھا  منتخب  کر رکھا  تھا۔۔ اُسکی  آئندہ  زندگی اُس بزرگ  کی  نذر  تھی جو  اُسکی  اصل پہچان  تھا!  اور  وہ  اِسلئے  اُسکے  خواب میں  آیا  تھا  تا  کہ   علی کو  اپنی  شناخت  مل  جائے! وہ  خوابِ  غفلت  سے  جاگ گیا  تھا۔۔ ہمیشہ  ہمیشہ  کے  لئے

اللہ  ہمارے  ملک  کے  نوجوانوں کو  سچے  دل  سے  اِس  نعمت  کی  قدر  کرنے  کی  توفیق  دے! کاش ہم  کبھی اپنے  اچھے  افعل  سے  اُن  کا  قرض  چکا سکیں جنہوں  نے  ہمیں  ایک  آزاد  ریاست  دینے  کے  لئے  اپنی  زندگیاں  قربان  کردیں ۔ اللہ  ہمارے  ملک  پر  اپنا  کرم  بنائے  رکھے۔۔ آمین  ۔ پاکستان زندہ باد  

حسّاس

آپ  ایک  مرتبہ  پھر سوچ  لیں  آپ  کو نہیں  لگتا  ک  وہ ابھی بہت  چھوٹی  ہے؟ فریدہ  بیگم  فکرمند  تھیں

چھوٹی؟ اِس  عمر میں  تم  اُسکی  ماں  بن  چکی  تھیں۔۔  اکبر صاحب حیرانی  سے  بولے

لیکن  وہ  زمانہ  اور  تھا۔  اُنہوں  نے  جرح کی

بیگم! زمانہ  کوئی  بھی  ہو،  انسان  تو وہی  ہے،  اُسکی مذہبی اور سماجی ضروریات بھی  وہی  ہیں، اُنہوں  نے سمجھانا  چاہا

بس یہ  باتیں آپکی  کتابوں  میں  ہی  بھلی  لگتی  ہیں  اکبر صاحب،  فریدہ بیگم  نے  ناراضگی  سے  کہا

دیکھو!  کتابوں  میں ہمیشہ  صحیح  باتیں  ہی  لکھی  جاتی  ہیں۔۔ اور  یہ  بھی  تو  دیکھو  کہ  کتنا  اچھا  رشتہ  ہے،  ورنہ  بخدا  میں  ایسا سوچتا  بھی  نہیں پھر بھی  تم  چاہو تو  گڑیا  سے  پوچھ  لو،  اگر  وہ  راضی  ہے  تو  بہت  اچھی  بات  ہے  اور  اگر  نہیں  تو میں اُسے  سمجھاؤں گا۔  

کیا  مطلب؟ میں سمجھاؤں گا؟ یعنی  آپ  اُسے  کوئی  آپشن  ہی  نہیں  دیں  گے،  اُنہوں  نے  پریشانی  سے  شوہر  کو دیکھا

آج سے  پہلے  تم  نے  میری باتوں کی  اِس  طرح  تفتیش  نہیں کی،  تم  اتنے  تحفظات  کا شکار  ہورہی  ہو۔ کیا  تمہیں  میری  ہی  بیٹی  کے  معاملے میں  میری  نیت  پر  شک  ہے۔ اکبر صاحب  نے  بیگم  کو  عینک  کے  پیچھے  سے  گھورا

فریدہ  بیگم  نے  نظریں  چرا  لیں۔

کیا ہوا؟  اکبر صاحب کی  پریشانی  میں مزید  اضافہ  ہوا

مجھے  وہی  تحفظات  ہیں جو  ایک  لڑکی  کی  ماں  کو  ہونے  چاہیئے۔  اُنہوں  نے  سوچ  میں  ڈوبے  ہوئے  کہا

مجھے  لگتا  ہے  کہ  جن  خواتین  کی  ازدواجی  زندگی  اچھی ہوتی  ہے  اُنہیں تو ایسے  خیال چھو کر  بھی نہیں گزرتے۔ اکبر صاحب  نے تسلی  دینے  والے  انداز  میں  کہا

لیکن  جواب  میں  فریدہ  بیگم  کی  معنی  خیز  مسکراہٹ  دیکھ کر  وہ  بے  چین  ہوگئے  

آج  تو  تم  مجھے  حیران  کئے  جا  رہی  ہو؟ کیا  تم  اپنی  پچھلی ۲۲ سالہ زندگی  سے مطمئن  نہیں  ہو۔ 

نہیں مطمئن  ہوں  کیونکہ  میرے  پاس  اِسکے  علاوہ  کوئی  راستہ  نہیں  تھا۔  فریدہ بیگم  نے  آزردہ  لہجے  میں  کہا

فریدہ؟ اکبر صاحب  نے  عینک  اُتار کر  غور  سے  اپنی  شریکِ حیات  کو دیکھا  جس  کے  بارے  میں  اُنہیں  یہ  زعم  تھا  کہ  وہ  دنیا  کی  خوش قسمت  ترین  عورت ہے  جس  کو  ایک کامیاب مشہور ادیب  اور مزاجاً نفیس شوہر  ملا  اور  جس  کو  زندگی  میں  کسی  چیز  کی  کمی  نہیں  ہے۔ اور  وہ  آج  اُن  سے  یہ  کہہ رہی  ہے  کہ  اُسکے  لئے  اطمینان  ایک  جبر  ہے 

فریدہ  بیگم  نے  اپنے  مجازی  خدا  کی  آنکھوں  کا تحیر  دیکھا،  اور  اُنکے  شوہر  نے  اپنی  شریکِ سفر  کی  آنکھوں میں آج  پہلی  بار  نمی  دیکھی

********** 

اُسے  یاد  تھا جب وہ اٹھارویں  سال  میں  لگی  تھی،  تب  زمانہ  ایسا  نہیں  تھا  جیسا  اب  ہے،  تب  لوگوں  پر  اعتماد  کرنا  بہت  آسان  تھا، لوگ  بیٹی  دیتے  وقت  شبہات  کا شکار نہیں  ہوتے  تھے ، خاندانوں میں عزت  اور  لحاظ  بہت  زیادہ  ہوتا  تھا،  تب  ہی  ایک  دن  اچانک  اُسے  پتہ  چلا  کہ  اماں  ابا  نے  بھی ایسے  ہی  بغیر سوال  جواب  کئے  اُسکو  کسی  اور  کو  سونپنے  کا  فیصلہ  کردیا  تھا۔  ابّا  فریدہ  سے  بہت  پیار  کرتے  تھے  آخر  وہ  اُنکی  اکلوتی  اولاد  تھی۔  اُنہیں  بے حد  عزیز  تھی، اور  پھر  وہ  تھی بھی محبت  اور  خیال  کرنے والی لڑکی، اُسے  تو  پتہ بھی  نہیں  چلا کب  گھر میں  شادی  کے  ہنگامے  شروع  ہوگئے ،  ابّا  نے  کوئی  کمی  نہیں  چھوڑی تھی،  اُنکا  بس  چلتا  تو  شاید  تاڑے  بھی  توڑ  کر  ساتھ  بھیج  دیتے  مگر بیٹیوں  کو نئی  زندگی  میں کامیابی  کے لئے  چاند  تاروں کی  نہیں بس  نصیب  کی  ضرورت  ہوتی  ہے،  ابّا  نے  رخصتی  سے ایک رات  پہلے  اُس  سے  ڈھیروں  باتیں کیں 

’’فریدہ! تمہیں  یاد  ہے  جب  میں  تمہیں اسکول  سے  واپس  لینے  آتا  تھا  اور جب مجھے دیر  ہوجاتی تھی  تم  کتنا  ناراض  ہوتی تھیں  کبھی  کبھی  تو وہیں دروازے  پر  بیٹھ  جاتی تھیں کہ اب  مجھے  نہیں  جانا،  اُنکے  چہرے  پر  ایک  عجیب  سی  مسکراہٹ  تھی، فریدہ  کھلکھلا  کے  ہنسنے  لگی،  کیا  ابّا؟  آپکو  ابھی تک  یاد  ہے

ہاں  یاد  تو  ہے،  ایک  بار  تمہاری  سہیلی شاہانہ  کے  ابّو  نے  مجھے  بولا  تھا ،  جاوید  بھائی، ہماری  فریدہ  بیٹی  تو  بڑی  ضد  کرتی  ہے  آپ  سے۔

تو  میں  نے اُنہیں  کہا،  نہیں  خیر  ضد  تو  میری بچی  کبھی  نہیں کرتی،  اباّ نے  اُسکی  طرف  دیکھا،  بس  مجھ  سے  پیار  بہت کرتی  ہے، جو  پیار کرتا  ہے  وہ غیر  محسوس  طریقے  سے  بڑا  حسّاس ہوجاتا  ہے۔۔ میری  بچی  حساس  ہے  اُس  سے  میرا  انتظار  نہیں کیا  جاتا

اِس  لئے  ناراض  ہوتی  ہے، فریدہ  کو  لگا  کہ  ابا  رو  رہے  ہیں ۔۔ اُس  نے  ابا  کے  کندھے  پر  سر  رکھ  دیا۔ ایک  انجانا سا  خوف  اُسکو  محسوس  ہوا۔۔ جیسے  کسی  محافظ  سے  دور  جانا  ہو،  جیسے  سائبان  سے  نکل  کر  دھوپ  میں جلنا  ہو
ابّا  نے  اُسکا  گال  تھپتھایا  اُسکے آنسوؤں  سے  ابّا  کی  اُنگلیاں  بھیگ  گئیں!  آنسو  کبھی  کبھی انسان  کی  زبان  بن  جاتے  ہیں۔۔  اور  یہ کتنی  مناسب  زبان  ہے،  گناہ  پر  ندامت ہو  تو  خدا  کے  سامنے  معافی  کی  صورت  نکل  آتے  ہیں، دل  کو  کوئی  ٹھیس  پہنچے تو  شکوہ  بن  کر بہنے  لگتے  ہیں  یہاں  تک  کہ  خوشی  کے  موقعے  پر  بھی  آنکھ  سے  چھلک  جاتے  ہیں،  ابّا  نے  اُسے  ٹوکا  نہیں  رونے  دیا!
فریدہ، تم  دنیا  کی  سب  سے  پیاری  بیٹی  ہو، اللہ  کرے  تم  بہت  خوش  رہو  بس  کبھی  کسی  کی  بات سے  دل  دکھے  تو  یاد  رکھنا انسان  کو  کوئی  چیز  نہیں  مارتی  بس  اُسکی  حساسیت  مار  دیتی  ہے،  یہ فیصلہ  تمہیں  کرنا  ہے  کہ  کونسی  چیز تمہیں کس طرح متاثر کرے گی ۔۔ اللہ  کرے  تم  بہت  ثابت قدم  رہو۔
ابّا  نے  اُسکو  لمبے  چوڑے  لیکچر  نہیں  دیے  تھے،  اپنی  عزت  اور داڑھی  کی  لاج  رکھنے  کو  نہیں  کہا  تھا ابّا  نے  بہت  مختصر  الفاظ  میں  اُسے  یہ  کہہ دیا  تھا  کہ  اُسے  خود  کو  اور  اپنے  دل  کو  مضبوط   رکھنا  ہے، جانے  ابّا  کیسے  جان  گئے  تھے کہ اُسے  اُن  کی  اِس  ہی  ایک  نصیحت  کی  ضرورت  عمر  بھر  پڑنی تھی،  میکے میں ماں  باپ  کی  محبتوں میں پلی  ایک معصوم  اور حساس  لڑکی کا  مان  سسرال  میں کون  رکھتا  ہے؟ سسرال  تو وہ  بورڈ کا  امتحان  ہے  جس  میں  سال  بھر  محنت  کرنے  والے  طالبعلم  کی  بھی  ایک  چھوٹی  سی  غفلت  سے  سب  برباد  ہوجاتا  ہے۔

اکبر صاحب  فطرتاً شریف  اور  نفیس  ہونے  کے  ساتھ  ساتھ  نرگسیت کا  بھی  شکار  تھے ،  اِس  مرض  کے  لوگوں  کو  یہ  پتہ  نہیں  ہوتا  کہ وہ  اِس  کے  مریض ہیں۔۔ وہ  حد درجہ  خود پسند  تھے  اور  اُنہیں  یہ  گمان  تھا  کہ  وہ  کئیرنگ  ہیں، اور  اُنکا  تکیہ  کلام   یہ  تھا  کہ  وہ  بہت  حساس  ہیں۔
شادی  کے  تیسرے  دن  اُنہوں  نے  فریدہ  کو کہا  کہ  ’’ آج  تم  ۹  بجنے  کے  بعد  اُٹھی  تھیں  اماں  کو  یہ  بات اچھی  نہیں  لگی، سارا  دن  اُنکا  مزاج  چڑچڑا  رہا ،  فریدہ  نے  نا سمجھ  آنے  والے  انداز  میں اُنہیں  دیکھا تو  وہ  مزید  گویا  ہوئے،  دیکھو  میں  بہت  حساس  ہوں  گھر  کے  ماحول  میں  کھنچاؤ  ہو  تو  میرا  دم  سا  گھٹنے  لگتا  ہے،  تم  خیال  رکھا  کرو، پھر  فریدہ  نے  خود  کو  ساس کے  اشاروں کا تابع  کرلیا
شادی  کے  پندرھویں  دن  ساس  نے  فریدہ  کا  ہاتھ  کھیر  میں ڈلوا دیا ،  اکبر صاحب نے  ایک  بار  چکھا  تو بے  دلی  سے بولے، میٹھا  بہت زیادہ  ہوگیا،  ’’تھوڑی  سی  تو  کھا  لیں‘‘ ، فریدہ  نے  ملتجی  نظروں  سے  دیکھا  نہیں  بیگم  میں  اپنی  زبان  کے  ذائقے کے  معاملے  میں  بہت  حساس ہوں، میری  طبیعت  بے  چین  ہوجائے گی،  فریدہ  نے  سارے  آنسو  حلق  میں اُتار  لئے۔۔ شاید  میری  ہی  غلطی  ہے  مجھے  میٹھا  کم  ڈالنا  چاہئے  تھا!  وہ سوچ  کے  رہ  گئی۔
شادی  کے  بعد  پہلی  عید  آئی  تو  اکبر  صاحب  بھی  فریدہ  کے  میکے  کو  رونق  بخشنے  گئے،  سارا  دن  سب  چھوٹوں  بڑوں نے  مل کر  خوش گپیاں  کیں۔  فریدہ  آج  اتنی  خوش تھی  کہ اُسے  احساس  ہی  نہیں  ہوا  کہ اکبر صاحب  تو سسرال  سے  ناراض  ہو  کے  لوٹے  ہیں، اُس  نے  ناخوشگواری  کی  وجہ  پوچھی  تو نرم  لہجے  میں  بولے،  تمہارے  میکے  میں  تو سب  پھوپھا ، چاچا  ایسے  رہتے ہیں  جیسے  ایک ہی  گھر  ہے،
کیا مطلب؟ فریدہ  کو  اُنکا اعتراض  سمجھ  نہیں آیا
نہیں  کچھ  خاص  نہیں بس  ایسا  لگتا  ہے  کہ  میرے  ایک  نہیں سات  سسر  ہیں،  اصل  میں گھر میں  میَں  بڑا  ہوں،  اور  ابّا کے  بعد  سے  تو۔۔  میرا  مطلب ،  تمہیں تو  معلوم  ہی  ہے  فریدہ  میں بہت  حساس  طبیعت کا  ہوں  مجھے  مذاق  وغیرہ  بلکل  نہیں پسند ، میرا  ذہن الجھ  جاتا ہے  اِنہی  باتوں میں  کہ  کہیں  مجھ  پر کوئی  طنز  تو  نہیں۔۔
اُس  دن  فریدہ  کو  اکبر صاحب  کا  مرض  سمجھ  آگیا،  دکھ  تو  ہوا  لیکن  سہنے  کے  علاوہ  کوئی  چارہ  نہ  تھا،  اکبر  صاحب شاید  بچپن  میں  یتیمی  کی وجہ  سے  جن  محرومیوں  سے  گزرے  تھے  اُنہوں نے  اُنکی  شخصیت  کو  کسی  حد  تک  متاثر  کیا تھا اُنہوں نے  خود  پر خود  پسندی  کا  خول  تو  چڑھا لیا  تھا  اور اِس  میں  وہ  اسلئے  بھی  کامیاب  رہے  کیونکہ  اللہ  نے اُنہیں ادب  کے  شعبے میں  مقام  دیا تھا  مگر  وہ  خود  اپنے  اندر  کی  محرومیوں  سے  باہر  نہ نکل  سکے  ۔۔ اُنہوں  نے  ایک  لفظ  ’’حساس‘‘  کو  اپنی  ڈھال  بنا  کر  رکھا اور  لوگوں کی  توقعات  سے  بچنے  کے  لئے  استعمال  کرتے  رہے۔۔ جس دن  فریدہ  کو  یہ سب سمجھ  آیا اُسکا  دل  چاہا  کہ  وہ  ابّا  کو  بتائے  کہ  کبھی کبھی وہی  حساسیت  جس  کے  بارے میں اُنہیں یہ  خوف  تھا  کہ  اُنکی  بیٹی  کی  کمزوری  بن  جائے  گی  آج  وہی  حساسیت  اُسکی  سب  سے  بڑی  طاقت  بن  گئی  کیوںکہ  اصل  معنوں  میں حساس  وہ  ہے  جو  دوسرے  کے  درد  کو  سمجھے  اور  اُسکے  درد  کو  اپنے  آرام  پر  فوقیت  دے۔

**********

فریدہ بیگم؟ اکبر صاحب  کی  آواز  سے  وہ  چونکیں اور اُنہیں احساس  ہوا  کہ  وہ  انیس  سالہ  فریدہ  نہیں ۴۰ سالہ  فریدہ بیگم  ہیں،
کہیے  آپ  نے  ایسا  کیوں  کہا؟  اکبر  صاحب  کی  آنکھوں میں ایک  دبی  دبی  وحشت  تھی
آپ  ایسے  سوال  پوچھیں گے  تو اور  کیا  کہوں  آپ  نے  مجھے  ہمیشہ  خوش  رکھا  کبھی  دکھ  دیتے  تو  کوئی اور  راستہ  ہوتا  نا! وہ  ایک  دم  ہلکے  پھلے  انداز  میں کہہ رہی  تھیں
اکبر  صاحب  نے  ایک  لمبی  سانس  خارج کی،  آپ  نے  تو مجھے   ڈرا  ہی  دیا میں  نے  جانے  کیا  کیا سوچ  لیا۔ جانتی  بھی  ہو  کہ میں کتنا  حساس  ہوں۔ وہ  نروٹھے پن  سے  بولے

Sincere!

 تمہیں  مجھ  پہ  اتنا  شک  ہے؟‘‘ میَں  نے  بے  حد  محبت  سے  سوال  کیا

ہاں  ہے‘‘  انعم  بہت  غصے  میں  تھی  ’’ مجھے  شک  ہے،  تمہاری  حرکتیں  ہی  ایسی  ہیں۔

ہائے  اللہ !  میںَ  نے  ایسا  کیا  کِیا ؟؟  میںَ  نے  کمال  معصومیت  سے  کہا

کیا  باتیں   کر  رہے  تھے  مریم  ہے  ہنس ہنس  کرـ  انعم  نے  پوچھا

 اُف  میں  تو  صرف  اُسکی  مدد  کررہا  تھا،  اُسکو  مارکیٹنگ  سمجھ  ہی  نہیں آرہی۔’’

ہاں  اور  تمہیں  تو  بہت  آتی ہے، اِس  بار  اسائنمنٹ  میں شاید  ۲۰  میں  سے  ۲  ملے  ہیں تمہیں۔’’

ہا ہا ہا۔۔  تو  تم  نے  کونسا  تیِر  مارا  ہے؟’’

کم از  کم  تم  سے  اچھے  آئے  ہیں’’

اچھا بھئی !  جھگڑا  کس  بات  کا  ہے؟’’

 شایان تم  میں  سنسئرٹی  نام  کی  چیز  نہیں  ہے۔  انعم  نے  دکھ  بھرے  لہجے  میں  کہا’’

 ہمممممم۔۔۔ انیلا  بھی  یہی  کہتی  تھی‘‘  میَں نے  کسی  سوچ  میں ڈوبے  ہوئے  کہہ  دیا’’

کون  انیلا؟‘‘  انعم  کا لہجہ پھر  تیز  ہوا’’

 تھی  ایک ۔۔۔ لیکن  یہ  بہت  پرانی  بات ہے ،  پچھلے  سال  جولائی  میں  اُسکی  شادی بھی  ہوگئی’’

شانی!  آئی  ہیٹ  یو! ‘‘ انعم  نے  غصے  میں  فون  بند  کردیا’’

ارے!‘‘  میں بس اتنا کہہ کر  رہ  گیا’’

انعم  اور  میَں  چھ  مہینے  سے  ساتھ  ہیں۔ ہم  دونوں  پہلی  بار  ایم  بی  اے  کلاسس  میں  ہی  ملے  اور  اب  بھی  یونیورسٹی    کی  روز مرّہ  ملاقاتیں  ہی  اِس  تعلق  کی  وجہ  ہیں۔  وہ  خوبصورت  ہی  اور  مجھے  بہت  پسند  بھی،  لیکن  مجھے  یہ  سمجھ  نہیں  آتا  کہ  جب  لڑکیاں  چہروں  سے  ایک  جیسی  نہیں  ہوتیں  تو  عقل  سے  کیوں؟؟  میری  زندگی  میں  کوئی  زیادہ  لڑکیاں  تو  نہیں آئیں بس  انیلا ،  ماریہ ،  حیا ، ثنا ،  فریال  ،  مدیحہ  ،  عائشہ  اور  بھی چند  ایک  شاید میں  نام  بھول  رہا ہوں مگر  چہرے  یاد  ہیں  اور  اب  یہ  انعم ۔۔ مگر  سب  ایک  جیسی  تھیں !  اور  آپ  یقین  کریں  کہ  میں  اِن  کے  ساتھ   کس قدر  سِنسئیر  تھا ۔۔ یہ  ساری  خود  ہی  بے  وفا تھیں جانے  کیا  چاہتی  تھیں اور  ہر  بار ہی  قطع تعلق  اِن  لڑکیوں  نے  کیا  ،  میَں نے  تو  کبھی  نہیں  کہا  کہ  ’’میں بیزار  ہو گیا  ہوں‘‘ ۔۔ سب  ہی  مجھے  سِنسئیر   نہ  ہونے  کا طعنہ  دیتی رہیں۔۔  اللہ جانے سِنسئیر  کیسے  ہوتے  ہیں۔۔۔ جن  دِنوں  حیا  سے  میرا  میل  ملاپ  اچھا تھا  اُنہی  دنوں  فریال  کی  سالگرہ  پڑ  گئی  ۔۔ یقین جانیں شام  ۵  سے  ۹  میں فریال  کی  سالگرہ  کو  یادگار  بناتا رہا ۔۔ میں  نے  اُسکے  لئے  شاندار  تحائف  لئے  ،  اُسکی  پسندیدہ  جگہ  ڈنر  کروایا ، ساڑھے  نو  بجے  جب  میں  گھر  آرہا تھا  تھا  تب  حیا  کا  میسج  آیا  کہ  وہ  اپنے  دوستوں  کے  ساتھ  ساحلِ  سمندر  آئی  ہوئی  ہے  اور اُسکی  خواہش  ہے  کہ  کبھی  میں  بھی  اُسکے  ساتھ  ساحلِ  سمندر چلوں ۔۔ میں  نے  اگلے  ہی  منٹ  گاڑی  گھمائی  اور  ۲۰ منٹ  کی  ڈرائیو  کے  بعد  میں حیا  کے  سامنے  اور  ہم  دونوں  سمندر  کے  سامنے ،  مگر  میں نے  نہ  تو کبھی  فریال  پر  احسان  جتایا  نہ  حیا  پر ،  ظاہر  ہے میں  جو  کررہا  تھا  اپنی  مرضی سے  کر رہا  تھا! لیکن  اُن  دونوں  نے  مجھے  سِنسئیر نہ  ہونے  کا  الزام  دیا اور  چھوڑ دیا۔۔ فریال  نے  تو  اگلے  چھ  مہینے  میں  ہی  اپنے  خالہ  کے  بیٹے  کے  ساتھ  شادی  کرلی  جبکہ  حیا  کی  ابھی  صرف  منگنی ہوئی  ہے۔ اب  آپ  ایمانداری  سے  بتائیں  کہ  سِنسئیر   میں نہیں  یا وہ؟ خیر  میں  نے  اُنہیں  معاف  کیا  جہاں  رہین خوش  رہیں 

اور  ایک  میرے  سامنے  والے  گھر  میں  جو  عائشہ  رہتی  تھی  ،  جب  میں  باہر  نکلتا مجھے  ہی  دیکھتی  رہتی،  میں  نے  بلاوجہ  نیکی  کی  خاطر  اُسے  فیسبُک  پر  ریکوئسٹ  بھیج  دی ،  اُسکی  تو  دلی  مراد  پوری  ہوگئ  لیکن  میری  نیکی  گلے  پڑ  گئی  اُس  نے  چند  ایک  دن  میں  ہی  لائک  کمنیٹ  کا  ایسا  رکارڈ  توڑا  کہ  اَسما  مجھ  سے  ناراض  ہوگئی  اور علینہ  نے  مجھے  ڈیلیٹ  ہی  کر دیا،  اور  عائشہ  سَر  چڑھنے  لگی ،  مجھے  بھی  جانے  کیا  تھا  لحاظ  مّروت  میں  اُسے  سَر  چڑھاتا  رہا  لیکن  مّروت  کی  بھی  ایک  حد  ہوتی  ہے  اگر  وہ  یہ  سمجھنے  لگی  تھی  کہ  میں  اُس  سے  شادی  کر  لوں  گا  تو  یہ  میرے  ساتھ  زیادتی  تھی،  جب اُس  نے فون  پر  رو  رو  کر  مجھے  اپنے  گھر  رشتہ  لانے  کو  کہا بخدا  میرے پیروں  کے  نیچے  سے  تو  زمین  نکل  گئی۔ اور  تب  میری  عمر  ہی  کیا  تھی  ۲۳  برس  کا  تھا  اور  وہ  ۱۹۔۔ بے  وقوفی  کی  بھی کوئی حد  ہوتی  ہے  لیکن  اُسے  یہ  سب  سمجھانا  چاہا  تو  اُس  نے  بھی  یہی  ایک  لفظ  کہا  جو  میرے  لئے  کم  و  بیش  ایک  گالی  بن  گیا  تھا ’’ شایان  تم  بلکل  بھی  سِنسئیر نہیں  ہو‘‘  اب میں  اُسے  کیسے  سمجھاتا  کہ  میں  سِنسئیر ہوں  کوئی  لڑکا  پاگل  تو  نہیں ہوتا  کہ  دن  بھر  مدیحہ  کے  ساتھ  گھومے  شام میں  ماریہ  سے  فون  پر باتیں  کرے  اور دیر  رات  عائشہ  سے  فیسبُک پر  چیٹینگ  کرے یہاں تک  کے  اِن  سب  کی  وجہ  سے  میں  اہنے  سب  سے  اچھے  دوست  رافع تک  کو  نظر  انداز  کردیتا  تھا  مگر  اُس  نے  تو مجھے  کبھی  نہیں  کہا  کہ شایان توُ سِنسئیر  نہیں ہے، خیر  یہ  عائشہ  ماریہ  کو میری  زندگی  سے  گزرے  ۲  سال  سے  زیادہ  ہوگئے۔ اب  تو میں  صبح  رافع  کے  ساتھ  ایم  بی  اے  کلاسس  لیتا ہوں،  اور شام  میں کبھی ابوّ  کی  فیکٹری  چلا  جاتا  ہوں اور  ویک  اینڈ  پر اکثر  انعم  کے  ساتھ  گھومتا  ہوں پھر  بھی  جانے  وہ  کیوں  خفا ہوجاتی  ہے . 

میں  نے  ایک  بار  پھر  اُسے  کال  ملائی 

اب  کیا  ہوا؟  انعم  نے  فون اُٹھاتے  ہی  کہا’’  

مجھے  کیا  ہونا تھا ؟  تم  اب  تک  ناراض  ہو؟  مان  جاؤ  نہ  جان  پلیز۔’’

تم  ہمیشہ ایسے  ہی  کرتے  ہو‘‘  انعم  کا لہجہ  پگھلنے  لگا’’

کیا  کرتا  ہوں؟’’

وعدہ  کرو  تم  مریم  سے  بات نہیں کرو  گے’’

بس  اتنی  سی  بات’’

ہاں’’

اچھا !  نہیں  کروں گا’’

سچ؟؟؟’’

ہاں  بھئی ’’

گُڈ’’

کل  ہم  ساتھ  لنچ  کریں  گے۔  میں  نے  پیار سے  آفر  کی’’

اوکے! وہ  مان  گئی  اور  فون  رکھ  دیا’’

شکرمان  گئی!  میں نے  خود  سے کہا۔۔ 

اوہ  مجھے  تو  یاد  ہی  نہیں رہا  ۔۔۔ کل  تو  مجھے  ابو  کے  دوست  فاروق  انکل کی  بیٹی  امبر  کے  ساتھ  گالف کلب  جانا  تھا ۔۔ انعم  کو  مناتے  مناتے بلا وجہ  منہ  سے  نکل  گیا

اب  میں صبح  صبح  امبر  کے  ساتھ  کلب  جاؤنگا  اور  پھر  تھک ہار  کے  انعم  کو  ڈنر  پر لے  جانا  پڑے  گا  لیکن  مجھے  معلوم  ہے آخر میں مجھے  یہی  سننے  کو  ملے  گا  کہ میں سِنسئیر نہیں ہو

خدا پرست

سال ؁۲۰۱۰

طحہٰ: تمہارا  بیٹا اب کیسا  ہے؟

صمد: اب  کافی  بہتر  ہے،  تم  بتاؤ  علی  کو  اُسکول  میں  کب داخل  کراؤگے

طحہٰ:  (مسکراتے  ہوئے)  ابھی  تو  بہت  چھوٹا  ہے  وہ  علینہ  گھر  میں  ہی  اُسکو  کچھ  نہ  کچھ  سکھاتی  رہتی  ہے۔

باتیں  کرتے  کرتے  دونوں  سڑک  کے  کنارے  پہنچ  چکے  تھے

صمد: طحہٰ  یہ  وہاں  روڈ  پر  اتنے  لوگ  کیوں  جمع  ہیں؟

طحہٰ: معلوم  نہیں  چل  کر  پوچھتے  ہیں

دونوں  نے  سڑک  کی  طرف  قدم  بڑھائے  مگر  ایک  شخص  جو اُسی  ہجوم  سے نکل  کر  اُن  کی  طرف  آرہا  تھا  اُسے  مخطب  کر  کے  پوچھا  کہ  لوگوں  کا  اس  قدر  ہجوم  کیوں؟ اُس شخص  نے خوشی  سے  کہا

 وہاں  عبدالستار ایدھی  صاحب  ،  ایدھی  فاؤنڈیشن  کے لئے  فنڈ  اکھٹا  کرنے  آئے  ہیں ،  لوگ  اُن  سے ملنے  اور  بات  کرنے  کے  لئے  جمع  ہیں‘‘  اور  آگے  بڑھ  گیا

صمد:  زبردست!  میری  تو  بہت  خواہش  تھی  بھئی  اُن  سے  ملنے  کی!  چلو  طحہٰ

طحہٰ: (غصے  سے)  چل  ہٹ

صمد:  (حیرانی  سے)  کیا  ہوا؟  عبدالستار ایدھی  ہیں  وہ

طحہٰ:  ایک  نمبر  کا  ملحد  ہے  وہ!  گردے  بیچ  بیچ  کر  اتنا  تو  کما  لیا  اب  کیا  ڈرامے  کررہا ہے  سڑکوں پر  اور  کس  کو  بیوقوف  بنا  رہا  ہے؟

صمد:  (حیرت اور  غصے  کے  ملے  جلے  جذبات  سے)  سیرئسلی  طحہٰ ؟  ملحد؟ گردہ  فروش  میں  نہیں  مانتا  کہ  تم   بھی  ایسے  لوگوں  میں  سے  ہو  جو دوسروں  کو  اس  طرح  جج  کرتے  ہیں۔۔

طحہٰ: جج  کرتے  ہیں  کا  کیا  مطلب ۔۔ سب  کو  پتہ ہے کہ  یہ  اسلام  دشمن  ہے،  قادیانیت  کی  حمایت  کرتا  ہے ۔۔ تمہیں  نہیں  پتہ  کیا ۔۔

صمد:  نہیں  مجھے  نہیں  معلوم  مجھے  بس  یہ  معلوم  ہے  کہ  وہ  انسانیت  کی  خدمت کررہے  ہیں  اور  دین  کا  پرچار  نہیں  کرتے  نہ  ہی  خود  کو  مذہبی  رہنما  کہتے  ہیں ،  ہوسکتا  ہے  وہ  دین  کے  معاملے  میں  واقعی  کمزور  ہوں  لیکن  دین  کے  بارے  میں  تو  ہر  شخص  ہی  اپنی  رائے  رکھتا  ہے  اور  اُس  ہی  کے  مطابق  عمل  کرتا  ہے۔ ایدھی  صاحب  کیونکہ ایک  معروف  شخصیت  ہیں  اسلئے  اُنکے  ذاتی  خیالات  تم  تک  پہنچ  گئے!

طحہٰ: ہونہہ! یہ  انسانیت  کی  خدمت  کے  ڈرامے  بہت  اچھی  طرح  معلوم  ہیں! اور  اِس  طرح این جی اوز  کے  پسِ پردہ  مقاصد  بھی  دنیا  جانتی  ہے

طحہٰ  کا  موڈ  بگڑتے دیکھ  کر  صمد  نے  مصلحتاً  بات  بدلی

صمد:  اچھا  چلو نہیں  مل  رہا  میں اُن  سے،  ایسا  کرتے  ہیں  سامنے  والی  مسجد  میں  عصر  پڑھ  لیتے  ہیں  ورنہ  قضا  ہو  جائے  گی۔  پھر  گھر  چلتے  ہیں

طحہٰ:  نہیں، تم  جاؤ! یہ  میرے  مسلک  کی نہیں۔  میں  گھر  میں  ہی  پڑھ  لونگا۔ 

یہ  کہہ  کر  طحہٰ  نکل  گیا  اور  صمد  اُس  جیسے  باشعور  انسان  کی  سطحی  سوچ  پر  دل  ہی  دل  میں  افسوس  کرتا  رہ  گیا۔  

**********

سال ؁۲۰۱۳

ملکی  حالات  عجیب  تباہی  کا  شکار  تھے ،  ملک  بھر میں  ہونے  والے  الیکشن  کی  وجہ  سے  ہر  طرف  عجیب  سا  خوف  و  ہراس  پھیلا تھا۔ مقامی  پارٹیاں  ہر طرح  کا  زور  لگا  رہی  تھیں۔  ملک  میں  بارود  اور  اسلحہ  کی  بھاری  مقدار  اسمگل  ہوئی  تھی۔  شہریوں  کے  حالاتِ  زندگی  اور  ذہنی  کشمکش  بیان  کرنے  کے  قابل  نہ  تھے۔ ہر  دوسرے  دن  شہر  کے  کسی  حصے  میں  بم  دھماکہ  ہوتا  جس  کی  گونج  آدھے  شہر  میں  سُنی  جاتی  تھی ،  اُنہی  دِنوں  خبر  چلی  کہ  کسی  سرچ  آپریشن  کے  تحت  کسی  مقامی  پارٹی  کے  کارکنان  کو  گھروں  سے  اُٹھا  لیا  گیا  ہے  اور  اُن  پر  شدید  تشدد  کر  کے  بیان  ریکارڈ  کروایا  جا  رہا ہے،  بس  پھر  کیا  دیر  تھی  نام  نہاد  سیاسی  رہنما  اپنی  فرعونی  لبادوں  میں  جلوہ  افروز  ہوئے  اور  شہر  کو جلا  کر  راکھ  کرنے  میں  کوئی  کسر  نہیں اُٹھا  چھوڑی!  

اُس  دن  صبح  صبح  بائیک  سٹارٹ  نہیں  ہو  رہی  تھی  اور علی  کا  اسکول  میں  پہلا  دن  تھا۔ طحہٰ  پرجوش  بھی تھا  اور  اپنی  بائیک کی  ڈھٹائی  پر  مایوس  بھی  جو  اِتنے  اہم  دن  ساتھ  نہیں  دے  رہی  تھی!  

علینہ:  ہم  رکشہ  میں  چلتے  ہیں  طحہٰ،  دیر  ہوجائے گی،  میں  علی  کو  اسکول  یونیفارم  میں  بس  میں  نہیں  چڑھانا  چاہ  رہی۔ میں  واپس  اکیلے  بس  میں  آجاؤنگی  اور  آپ  آفس  چلے جائے گا،  پھر  شام میں  دیکھ  لیں  گے  آپکی  اِس  گدھا  گاڑی  کو! 

طحہٰ: (عجلت  میں)  ہاں  یہی  ٹھیک  ہے  ابھی۔۔ چلو  نکلتے  ہیں!

شام  میں  طحہٰ آفس  سے  واپسی  پر بس  میں  بیٹھا صبح  ہونے  والے  واقعے  کے بارے میں  سوچ  رہا  تھا،    سوچ  رہا تھا  کہ  آج  لازمی  بائیک  کو  ٹھیک  کروانا  ہے،  علی  کو  صبح  اُٹھانے  سے  اسکول  پہنچانے  تک  کا  ایک  ایک  لمحہ  ذہن  میں  فلم  کی طرح  چل  رہا تھا،  اُسکو معلوم  بھی  نہیں  چلا  کہ  وہ  سوچ  سوچ  کر  مسکرانے  لگا  تھا  کہ  ایک جھٹکے  سے  بس  رُکی  اور  اور  اُسکو خیالوں  کی  وادیوں  سے حقیقت  کی  دنیا میں  لا  پٹخا،  پیچھے  کچھ  مسافر  بس  ڈرائیور  کو سخت  سست  کہنے  لگے،  مگر  ڈرائیور  کے  چہرے  پر  عجیب  سا  خوف  تھا وہ  ایک  چھلانگ  لگا  کر  بس  سے  نیچے  کود  گیا،  جب  تک  مسافر  اُٹھے  اُنہیں  اندازہ  ہوا  کہ  بس  کے  دروازے  باہر  سے  کَس  کے  بند  کردئے  گئے  ہیں  اور  باہر  چند  لڑکے  بس  کو آگ  لگانے  کی  تیاری  مکمل  کر  چکے  ہیں،  

ذہن  ماؤف  ہوگیا  تھا

لوگ  چیخ  رہے  تھے چلاّ  رہے  تھے  

آہ  و  بکا  کر  رہے  تھے  

اللہ  رسول  کے  واسطے  دے  رہے  تھے

لیکن  اُس  وقت  دین  اور  دھرم  کے  واسطے  کون سنتا

  ہے

بس  کے  پچھلے  حصے  نے  آگ  پکڑ  لی  تھی اور  آس  پاس  ٹائر  جلائے  جا  رہے تھے۔ 

کچھ  مسافروں  نے  بس  کے  جکڑے ہوئے  دروازے  کھولنے  کی  کوشش  کی

آگ  پھیل  رہی  تھی!  موت  بلکل  سامنے  آ  کھڑی  ہوئی  تھی 

تنفس  گھٹ  رہا  تھا

آگ کے  تھپیڑے  طحہٰ  کے  جسم  کو  محسوس  ہونے  لگے  تھے

بس  کا  دروازہ  کھل  گیا  تھا

آگ  طحہٰ  کے  کپڑوں  سے  لپٹ چکی  تھی

چیختے  چلاتے  مدد کو  پکارتے  ،  آگ  سے  جھلستے  مسافر  بس  سے  باہر  گر رہے  تھے۔۔ 

حدِ  نظر  آگ  ہی  آگ  تھی ،  طحہٰ ہوش  کھو  رہا  تھا  وہ  پہلا  اور آخری  چہرہ  جو  اُسکے  ذہن  کے  پردے  پر  اُبھرا  تھا  وہ  علی کا  تھا۔ 

پتہ  نہیں  وہ  جی  رہا  تھا  یا  مر  گیا  تھا  ایک آواز  سی  کان  میں  گونجی  تھی  جو  آہ و  بکا  سے  الگ  تھی  لیکن  کیا  تھی  یہ اُسکا  ذہن  اُسے  نہیں  سمجھا  پا  رہا  تھا۔

  کتنے  مردے  ہیں انور؟‘‘  ایک  آواز  آئی’’

اسکو  ملا  کر  ۱۸  ہیں بھائی‘‘ جواب  آیا’’ 

ٹھیک  ہے  تو  تم  اِنہیں لے  جاؤ،  میں  زِندوں  کو اسپتال   پہنچا  کر  آیا. حکم  صادر  ہوا۔  حکم  کی  بجا  آوری  ہوئی

وہ  ایک  جگہ  سے  دوسری  جگہ  منتقل  ہوا  تھا اُسکی  آنکھوں  کو  روشنی  اب  تک  محسوس  ہورہی  تھی۔

انور!  اسکو  دیکھ  یہ  تو  جِِندہ  معلوم  ہوتا  ہے‘‘  کسی  نے  بولا

کہاں؟‘‘  کوئی  بھاگتا  ہوا  آیا

 چل  جلدی  اِسکو  اسپتال  لے  کر  چلیں ۔  یہ  جرور  بچ  جائے گا

اُس  نے  آنکھیں  کھولنے  کی  کوشش  کی تھی!  آگ  کی  جلن  شاید  وہ  بھول  گیا  تھا،  لیکن  دل  اُسکا  آج  اپنی  نفرت  کی  آگ  سے  جل  بجھ  گیا  تھا!  جس  ایدھی  کو  اُس  نے  ملحد اور  قادیانی  کہہ  کر  ساری  زندگی  گالیاں  دی  تھیں! اُنہوں  نے  اُسکے  اَدھ جلے،  اَدھ  موئے  اور  تعفن  زدہ  جسم  کو  اپنے ہاتھوں  میں  لیا  ہوا  تھا۔۔ اور  وہ  اُسکی  زندگی  بچانے  کی  ایک  آخری  کوشش  کر رہے  تھے۔  

                                                                                                                   **********

سال ؁ ۲۰۱۶

آج  علی  کے  اسکول  کا  سالانہ  فنکشن  تھا ،  علی  کا  رزلٹ  بھی  آج  ہی  معلوم  ہونا  تھا،  پھر  وہ  پہلی  جماعت میں  چلا جاتا۔   اُسکو  اسکول  میں  بتایا  گیا تھا  کہ  چونکہ  وہ  اب  بہت  بڑی  اور  اہم جماعت  میں  آگیا  ہے  تو  اُسکو  بہت  ذمہ دار ہوجانا  چاہئے۔  علی  خود  اپنے  اور  گھر کے  معاملے میں  ذمہ دار  تو  ہوگیا  تھا  لیکن  اُسکی  ضروریات بھی  اِس  حیثیت  سے  بڑھ  گئی  تھیں! علی  نے  اپنی  ماں کو  تنگ  کیا  ہوا  تھا اُسکو  نیا اُسکول  بیگ،  نیا  یونیفارم،  اور  اپنے  سالانہ  فنکشن  کی  تیاری  کے  لئے  بھی جانے  کیا کیا چاہئے  تھا۔  اور  طحہٰ ۔۔۔ وہ  اس  سب  میں  کہاں  تھا؟

وہ  بہت  زیادہ  پرسکون،  خوش اور  بے حد  شکر گزار  تھا۔ وہ  موت  کے  منہ  سے  واپس  آگیا  تھا  وہ  اپنے  بچے  کو  اپنے  سامنے  بڑھتا ہوا  دیکھ  رہا تھا  اُسکی  بیوی  مطمئن  تھی۔  جس  کو  وہ  ساری  زندگی  بے  دین  کہتا  رہا  اُس  نے  اُسکو  دین  سکھا  دیا  تھا  اب  وہ  مسجدوں  میں  مسلک  نہیں  خدا  کو  ڈھونڈتا  تھا ، اُسکو سمجھ  آگیا  تھا  کہ  انسانیت  کیا  ہے  اور  مرتے  ہوئے  آدمی  کے  لئے  سب  سے  ضروری  چیز  زندگی  ہوتی  ہے،  پیاسے  کو  پیاس  کے  وقت  یہ  نہیں  پوچھا  جاتا  کہ  تمہارا  دین  کیا  ہے؟   کسی یتیم  کے  سر  پر  ہاتھ  رکھنے  کے  لئے  کوئی  مذہب  نہیں چاہئے  انسانیت  چاہئے۔۔ اور  ہمارے  ملک  کا  المیہ  یہ  ہے  کہ  دین  کے  کچے  ایک  شخص  نے انسانیت  کی  ایک  ایسی  مثال  قائم  کی  کہ  ہر  مکتبِ فکر  کا  شخص  اُس  کی  خدمت  کی  مثال  دیتے  نہیں  تھکتا  اور دین  سکھانے  والے  بس  آپس  میں  مقابلہ  بازی  کرتے  رہ  گئے ۔  اگر  ایدھی  قادیانیت  نواز  تھے  تو ہم  جیسا مسلمان  کیوں  نہیں  اُٹھا  لیتا ایسی  خدمت  کا  بیڑا ۔۔۔ اگر  وہ  لادین  تھے  تو  ہم  جیسے  دین دار کیوں  نہیں  پیدا  کرلیتے اُن  سے  بڑی  کوئی  مثال۔۔ سوچتے  رہ  گئے  نہ !!  بس  اسی  لئے  نہیں  کر سکتے۔۔ ہم  سب  اُنگلیاں  اُٹھا  سکتے  ہیں، تعریف  کر  سکتے  ہیں، چندہ  دے  سکتے  ہیں  لیکن  ایدھی  نہیں  بن  سکتے۔۔ خود  اپنے  پیروں  میں کانٹے  چبھو  کر  دوسروں  کے  راستوں  سے  خار  ہٹانے  والے  بس  وہ ہی  تھے،  اُنہیں  فرق  نہیں  پڑتا  تھا  کوئی اُنہیں کیا  کہتا  ہے  کیونکہ  اُنکا  معاملہ  انکے  خدا  کے  ساتھ  تھا

کیونکہ  ایدھی  نے  خدا  کو  پہچان  لیا  تھا!  وہ  خدا  پرست  تھے!  وہ  فرشتے  نہیں تھے،  انسان  فرشتہ  نہیں  ہوتا ، انسان تو مسجودِ ملائک  ہے

  لیکن  ایدھی  جیسے  لوگ   مسجود  ہونے  کو  جسٹفائی  کر 
گئے۔

فرشتے  تو ہم  ہیں  جو  لوگوں  اعمال  کا  احتساب  کرتے  ہیں ہم  کروڑوں فرشتوں  میں  بس  ایک وہی انسان تھے۔  

ہال تالیوں  سے گونج  رہا  تھا ،  بچوں  کا  ایک  گروپ  ایک  زبردست  ٹیبلو  کر  کے  اساتذہ  اور  والدین  کا  استقبال  کر  کے  گیا  تھا۔  اور  اب  علی  کی  کلاس  کا  گروپ  اسٹیج  پر  تھا  پہلی  جماعت میں  جانے  والے  ملک  کے  مستقبل  کے  معمار اپنے  اپنے  مستقبل  کے  آئینہ  دار  بن  کے  کھڑے  تھے،  ایک  بہت  پیاری  اور  نازک  سی  بچی  لیب کوٹ  اور  اسٹیتھوسکوپ  کے  ساتھ  کھڑی  بول  رہی  تھی  کہ  وہ  ڈاکٹر  بنے  گی،  اگلے  بچے  کو  دیکھ  کر  تو  سب  ہنس  پڑے  وہ  بے  انتہا  گول مٹول  بچہ  پر  جوش  ہو  کر  بولا  میں بیٹ  مین  بنوں  گا اور  قہقہے  بلند  ہوگئے۔ 

علی  نے  اپنی  ٹوپی  ہاتھ  سے ٹھیک  کی  وہ  شاید  گھبرا  گیا  تھا  یا  شاید  وہ  اپنے منہ  پر  لگی  اتنی  بڑی  نقلی  داڑھی  سنبھال  نہیں  پا  رہا  تھا  اُس  کی  آنکھوں  میں ایک  عجیب  سی  بے  چینی  تھی  اُس  کی  نظریں طحہٰ  کا  تعاقب  کر رہی  تھیں،  جیسے  ہی  اُسے  اپنے  باپ  کا نصف جھلسا  ہوا  چہرہ  دکھا  اُسکی  آنکھیں  اپنے  باپ  کی  آنکھوں  سے  ملیں  تو  علی  کی  آنکھیں  چمک  گئیں  اُس  نے  اپنی ساری  ہمت  کو  متجمع  کر کے  کہا

‘‘ میَں  عبدالستار ایدھی  بنوں  گا ’’

ہال  میں  موجود  تمام  والدیں  کرسیوں  سے  کھڑے  ہو  کر  تالیاں  بجانے  لگے۔  

طحہٰ اور  علینہ  نے  ایک  دوسرے  سے  کہا  انشااللہ