ہم سفر

لوگ  اکثر  کمپیٹیبیلٹی (مطابقت)  پر  بحث  کرتے  نظر  آتے  ہیں۔  اِس  لفظ  کی  تعریف  تو  ایک  ہی  ہے  لیکن  یہ متعدد زاویوں  اور  نظریوں  کی  کسوٹی  پر  پَرکھا جاتا  ہے۔  اِسکی  وجہ  بہت  واضح  ہے  اور  وہ  یہ  کہ  ہر شخص اِسے  اپنے  نظریے  سے  دیکھتا  ہے اور  اپنے  تجربات  کی  بناؑ  پر  نتائج  اخذ  کرتا  ہے۔  
رشتے  ناطے  ویسے  بھی  ایک  نازک  معاملہ  ہوتے  ہیں  خاص  کر  کہ  ازدواجی  رشتے  اور  اکثر  دیکھا  گیا  ہے کہ  برسوں  کی  مسافت  اِکھٹے  طے  کرنے  کے  باوجود  بھی  ہم  سفر  ایک  دوسرے  کی  رفاقت  سے  خوش  نظر  نہیں  آتے ۔  اِسکی  وجہ  اُنکی  ناسمجھی  نہیں  بلکہ  سمجھ  کی  بہت  زیادتی  ہے۔  بلاشبہ  ہر  شخص  اپنے  نظریات  رکھتا  ہے اور  یہی  ایک  صحتمند  سوچ  کی  نشانی  ہے  لیکن  اُس  ہی  نظریے  کو  صحیح  سمجھتے  رہنا  ہرگز  عقلمندی  کی  نشانی  نہیں اِن  معاملات میں  اکثر  لوگ دوسروں  کی  غلطیوں  سے  عبرت  بھی  لیتے  ہیں مگر  یہ  کثرتِ  عقل  والے افراد  یہاں  بھی  بہترین  کارگردگی  کا  مظاہرہ  کرتے  ہیں  جیسے کہ  لوگوں  کی  غلطیوں  سے  بھی  اپنی  مرضی  کے  ہی  مطلب  نکالتے  ہیں  اور  اِس  کو  صحیح  سمجھ  کر  اُسے ایمان  بنا  لیتے  ہیں۔  
میرے  ایک  دوست  کے ساتھ  ایسا  ہی کچھ عجیب  واقعہ  ہوا اُنکی  اہلیہ  جو  بہت  تعلیم  یافتہ  تھیں  اور  شہر  کے  مایہؑ  ناز  تعلیمی  ادارے  سے  وابستہ  تھیں اُنہیں مُلکی  سائنسدانوں  کے  وفد  کے  ہمراہ  کسی  تحقیق  کے  سلسلے  میں  ملک  سے  باہر  جانے کی  پیشکش  ہوئی،  اُنکے  اِدارے  کے  سربراہ  مُصر  تھے  کہ  وہی  خاتون  اِس  کے  لائق  ہیں ۔  اِس  قدر  تعریف  و  توصیف  سُن  کر  خاتون  بھی  پُر  شوق  ہوگئیں  جب  اُنہوں  نے  اِسکا  ذکر  اپنے  شوہر  سے  کیا  تو  اُنکے  شوہر  ہرگز  گوارا  نہ  کرسکے  کہ  اُنکی  عزیز از جان  بیوی  اتنے  لمبے  عرصے  کے  لئے  آنکھوں سے دور  ہوجائیں  اُنکی  اہلیہ  بے  حد  ناراض  ہوئیں،  چند  مخلص  سہیلیوں  نے  اُنکی  اہلیہ  کو  سمجھایا  کہ  ’’تمہارے  شوہر  تمہاری  کامیابی  سے  جلتے  ہیں‘‘ کسی  نے  کہا  ’’شاید  وہ  تم  پر  بھروسہ  نہیں  کرتے ‘‘ وغیرہ  وغیرہ۔۔۔  الغرض  اُنکی  اہلیہ  اپنے  مجازی  خدا  سے  روٹھ  گئیں۔۔ جانے  اُنہوں  نے  کیسے  اپنی  بیوی  کو منایا ۔۔ سننے  میں  آیا  تھا  کہ  وہ  تحقیق  کے لئے  روانہ  کر  دی  گئی  ہیں مگر  کہانی  یہاں سے  شروع  ہوتی  ہے۔۔۔ کئی  سال  بعد جب  وہ  حضرت  دفتر  میں بیٹھے  تھے  تو  اُنکے  ساتھ  دوست  کا  موبائل  بجا دسری  جانب  اُنکی  بیگم  تھیں  ، اُنہوں  نے  بتایا  کہ  میری  بیگم  بہت  قابل ہیں  اور  ایک  ملٹی  نیشنل  کمپنی  میں  ایچ  آر  مینیجر  ہیں  اُنہیں  ٹریننگ  کے  سلسلے  میں بیرونِ  ملک  جانے کی پیشکش  ہوئی  ہے۔
یہاں  میرے  دوست  نے  بڑی  فرض  شناسی  اور  ہمدردی کا مظاہرہ  کرتے  ہوئے  اپنے  کولیگ  کو  اپنی  آپ بیتی سُنائی  اور  کہا ’’میَں  تو  کہتا  ہوں  بھابی  کے  کچھ  کہنے  سے  پہلے  ہی  اِجازت  دے  دو  ورنہ  کہیں  وہ  تم  سے  بد ظن  نہ  ہوجائیں‘‘ اُن  حضرت نے  اِس  راہبری  کا  بہت شکریہ  کیا  اور  راستے  سے  پھولوں کا گلدستہہ لئے  خوشی  خوشی  بیوی  کو  مبارکباد  دینے  گھر  پہنچے
’’ مجھے  بہت  خوشی  ہوئی  کہ آپکو  اس  اعزاز  سے  نوازا  گیا  ،  آپ  بے  فکر  ہو  کر  تیاریاں  شروع  کریں‘‘  اُنہوں نے  گلدستہ  پیش  کرتے  ہوئے  کہا۔  
اُنکی  بیوی  نے  اُنہیں  خفگی  سے  دیکھا  اور  گلدستہ  زمین  ہر  دے  مارا اور آنکھوں سے  موٹے موٹے  آنسو  نکالنے  شروع  کردئے، پھر  حضرت نے بڑی  منّتیں کیں ہاتھ پیر  جوڑے  کے  بتاؤ  تو  سہی کہ  مجھ  سے  کیا  غلطی  ہوئی  تو  وہ  روئی  روئی  آواز  میں  بولیں  ’’ آپکو  مجھ  سے  ذرا  بھی  لگاؤ  نہیں  آپ  نہیں  چاہتے  کہ  میَں  آپکے  ساتھ  رہوں‘‘
بے چارے  لاجواب  ہوگئے  وہ  تو  سو  فیصد  یہی  چاہتے  تھے  مگر  کسی  ہمدردانہ  مشورے  نے  اُنکی  سوچ  کا زاویہ  بدل  دیا۔  بدقسمتی  سے  اُنکی  اہلیہ  کی  بھی  چند  مخلص  سہیلیاں  تھیں  جنہوں  نے  انکشاف  کیا  کہ  ’’شاید  تمہارے  میاں  لالچی  ہیں   سوچا  ہوگا ٹریننگ  کے  بعد  تنخواہ  بڑھ جائے  گی‘‘  ایک  نے  کہا  ’’شاید  تمہارے  میاں کی  زندگی  میں  کوئی  اور  ہے  وہ  تمہیں بھیج  کر  اُسکے  ساتھ  عیش  کرینگے‘‘  اِس  سب  کا  نتیجہ  یہ  نکلا  کہ  کئی  عرصے  کلام  بند  رہا۔۔ جانے  اُنہوں نے  کیسے  اپنی  محبت  اور صداقت  کا  یقین  دلایا  ہوگا! اِن  باتوں  کا  لبِ لباب  یہ  ہے  کہ  اپنی  زندگی  اپنے  تعلقات  اور  تجربات کا تقابلی  جائزہ  دوسروں  سے  کرنا  قطعی  صحیح  نہیں  ہمیں  اپنے  آس  پاس  ہر  شخص  کی  انفرادیت  کو  جانچنا  چاہئے  اور  اُس  انفرادیت  کا احترام  کرنا  چاہیے اِس  سے شاید زندگی  بہت  حسین  نہ  بنے  لیکن  سہل   ضرور  ہو  سکتی  ہے۔

اکثر  دیکھتے  ہیں  کہ  بازار میں  شاپنگ  بیگز  کا  بوجھ  اُٹھائے  ماں  تیزی  سے  آگے  آگے  چلتی  ہے  اور مڑ مڑ  کر  دیکھتی  ہے  کہ  بچہ  پیچھے  آ  رہا  ہے  یا نہیں اور  بالآخر  پریشانی  سے  بچنے  کے  لئے  بچے کو  ساتھ  ساتھ  چلانے   کے  لئے  اُسکا  ہاتھ  پکڑ  لیتی  ہے۔  اِس  سے  دو  چیزیں  ہوتی  ہیں اوّل  تو  بچے  کا  ہاتھ   پکڑ  کر  چلنے  سے  ماں  کو  اندازہ  ہو جاتا ہے  کہ  بچہ  کتنے  چھوٹے  قدم  اُٹھا  رہا  ہے  وہ خود  کو آہستہ  کر  لیتی  ہے،  اور  دوسرا  یہ  کہ  بچے  کو  احساس ہوتا ہے  کہ  ماں کی  رفتار  قدرے  تیز ہے  اور  وہ  کوشش کر  کے  بڑے  قدم  اُٹھانے کی  کوشش کرتا  ہے۔  اِس  طرح  رفتاروں  کا  یہ  فرق  فاصلے  پیدا  نہیں  کر  پاتا ،  رفتار  بیلنس  ہوجاتی  ہے  سفر آسان  ہوجاتا  ہے!

تو  اگر انسان  اپنے  تمام  رشتوں  میں  یہی  فارمولا  لگانے  لگے  تو  اِس  تیز  رفتار  دنیا  میں  کسی  کا  کسی  سے  ہاتھ  نہیں  چھوُٹے  گا۔  ضرورت  صِرف  اِتنی  ہے  کہ  ہم  اِس  بات  کو  سمجھیں  کہ  کہیں  ھمارے  تیز  یا سست  قدم  کسی  فاصلے  کا سبب تو  نہیں بن  رہے!

 اللہ  ہم  سب  کو  ہمارے  نیک  مقاصد  میں  کامیاب  کرے  اور  ہمیں  معاشرے  کی  فلاح  کے  لئے  فعال  کردار  ادا  کرنے کی  توفیق  دے۔  آمین

Reflective Journal ربوبیت کا

انسان  کے  لئے  دنیا  میں  جو  چیز سب  سے  زیادہ  اہم  ہے  وہ  ہے  ’’تعلق‘‘ خواہ  وہ  خونی  رشتے  ہوں،  معاشرتی  تعلقات،  یا  ارد  گرد  کے  لوگوں  سے  رسمی  علیک  سلیک۔  یہی  وہ  چیز  ہے  جو  کبھی  انسان  کو  بہت  معتبر  بنا  دیتی  ہے  اور  کبھی  ذلیل  و خوار  کر دیتی  ہے،  اور  انسان  عمر  کا  کافی  حصّہ  تعلق  بنائے  رکھنے  کی  تگ  و  دو  میں  سَرف  کر  دیتا  ہے۔  اسی  ضمن  میں ایک  مرتبہ ایک  لیکچر  سننے  کا  اتفاق  ہوا  جو بنیادی  طور پر اُن  والدین  کے  لئے  تھا   جن  کے  بچے  بچپن  سے لڑکپن  یا  لڑکپن  سے  جوانی  کے  ادوار  میں  داخل  ہونے  کو  تھے،  یہ  تعلق  ظاہر  ہے کہ  والدین  اور  اولاد  دونوں  ہی  کے  لئے  اہم  ہوتا  ہے۔  اسلئے  متعدد  والدین  اپنے  ضروری  کاموں  سے  وقت  نکال  کر  صرف  اِسی  لئے  آئے  تھے  کہ  کسی  نیک  مشورے  سے  استفادہ  حاصل  کر سکیں۔ لیکچر  کے  دوران  پروفیسر  صاحب  نے   والدین   کی  ایسی  بے شمار  غلطیوں  کی  نشاندہی  کی جس  سے  اُنکا  اور  بچوں  کا  تعلق  خراب  ہوتا  ہے،  اور  بے شمار  نصیحتوں  کے  بیچ  میں  اِس  تعلق کو  بہتر  بنانے  کے  لئے  ایک  بہت  سنہرا  مشورہ  دیا۔  دراصل تعلق  کی  تمام  حیثیت  اعتبار  سے  ہوتی  ہے۔  پروفیسر  صاحب  نے   والدین   کی  ایسی  بے شمار  غلطیوں  کی  نشاندہی  کی جس  سے  اُنکا  اور  بچوں  کا  تعلق  خراب  ہوتا  ہے،  اور  بے شمار  نصیحتوں  کے  بیچ  میں  اِس  تعلق کو  بہتر  بنانے  کے  لئے  ایک  بہت  سنہرا  مشورہ  دیا۔  دراصل  تعلق   کی  تمام  حیثیت  اعتبار  سے  ہوتی  ہے۔پروفیسر  صاحب  نے  کہا  کہ  اپنے  اور  اپنے  بچوں  کے  بیچ  اعتبارکی  فضاؑ  قائم  کریں،  لیکن  آج  کل  کی  تیز  رفتار  زندگی  میں  یہ  کس  قدر  مشکل  امر  ہے!  اِس  کے  لئے  بھی  پروفیسر  صاحب  کے  پاس  ایک  تجویز  تھی،  اُنہوں  نے  کہا  کہ اکثر  بچے والدین  سے  بہت  سے  مسائل  پر  بات  کرتے  ہوئے  کتراتے  ہیں اِسکی  کئ  وجوہات  ہیں  جیسے  کہ 
 والدین  کی  مصروفیت،  دوستانہ  ماحول  نہ  ہونا،  بچوں  کی  باتوں کو  غلط  سمجھنا  ۔۔۔ وغیرہ  وغیرہ۔
اِسلئے  اُنکے  ساتھ ایک  رفلیکٹو  جرنل  بنائیں

        بھلا  یہ  کیا  ہے؟  ہمارے  والدین  نے  کب بنایا  لیکن  ہم  بھی  خیر سے ہر  مرحلہ  با آسانی  طے  کر ہی  گئے۔۔۔ مگر  شاید  آج  کے  تکنیکی  دور  میں  شاید  ایسے  حربے  واقعی  ضروری  ہیں۔   یہ  ایک  خوبصورت  نوٹ بُک  کی  صورت  ہوتی  ہے،  جسکے  زریعے  والدین  اور  بچے  لکھ  کر  بات  کر سکتے  ہیں۔  اس طرح  والدین  بچوں  کی  بات  کو ٹھیک  طرح  سے   سمجھ  کر  اور  ہر  زاویے  سے  سوچ  کر  اس  کا  جواب  تجویز  کر  سکتے  ہیں، اب  وہ  بات  کوئی  ضرورت ،  پریشانی  یا  مشورہ  ہو  سکتا  ہے۔  تقریباً  سب  ہی  والدین  اِس  پر  متّفق  تھے۔۔
 اور  میَں؟  میَں  یہ  سوچ  رہی  تھی  کہ  مَیں  آج  یہی  سننے  کے  لئے  یہاں  لائی  گئی تھی  کیونکہ  فی الحال  میَں  والدین کے  طبقے  سے  تعلق  نہیں  رکھتی!
مَیں  اِس  سوچ  مین  تھی کہ  اگر
  تعلق  اِستوار  کرنے  میں اتنی  محنت کرنی  ہی  ہے!  تو  کیوں  نہ  ہم  اپنے  خالق  سے  کریں۔  اُس  دن  یہ  خیال  لئے  میَں  تو  گھر  آگئی  لیکن  انسان  جب  گرتا  ہے  تو  سنبھلنے  کے  لئے  اُنہی  رِشتوں  کی  طرف دیکھتا  ہے  جنہیں  وہ 
 کندھوں  پر  ستاروں  کی طرح  لئے  پھرتا  ہے

اور  کبھی کبھی  یہی  ستارے  انسان  کو  خاک  میں  ملا  دیتے  ہیں ، تعلقات  کو  زوال  آ جاتا  ہے  اور  پھر  وہی  بچتا  ہے  جو  لازوال  ہے! ’’خدا  تعالی‘‘  تو  یہ  رفلیکٹو  جرنل  بھی  ہمیں  اُس  ہی  کہ  ساتھ  بنانا  چاہیے  اور  اپنی  اولاد  کو  بھی  یہ  تعلق  بنانے  کی  ترغیب  دینی  چاہئے۔  اور  اِسکے  لئے  تو لکھائی  کر  کے  ورق  کالے  کرنے  کی  بھی  ضرورت  نہیں نہ  کسی  مراقبے میں  جانے  کی  ضرورت  ہے  یہ  تعلق   فرض  نمازوں  کے  بعد  تھوڑی  دیر  خاموشی  سے  بیٹھ  کر،  بس  کے  سفر  کے  دوران ،  اور  کھاتے  پیتے  بھی  محسوس  کیا  جا  سکتا ہے  یہی  اس  تعلق  کی خوبصورتی  ہے۔  رہی بات  اللہ  کی  طرف  سے  جواب  موصول  ہونے  کی  آیا  وہ  بھی  اس  جرنل  کا  حصہ  بنے  یا  نہیں  ۔۔۔ تو  وہ  الرحمن  الرحیم  ہے ،  وہ  تو  اُنکی  بھی  سنتا  ہے  جو  اُس  سے نہیں  کہتے  تو  اُنکو  یقیناً  جواب  دے  گا  جو  براہِ راست  اُسے  پکارتے  ہیں۔  ضرورت  اِسکی کہ  ہے  کہ  کوئی  صدقِ  دل  سے  اُسے پکارے اور  پھر  کان  لگا  کر  بیٹھا  رہے،  دل  میں  غیر  اللہ  کو  داخل  نہ  ہونے  دے  اور  اللہ  کے  جواب  کو  تلاش  کرے!

   روزانہ   ہم  سے  جیسے عام  انسانوں  کے  ساتھ  متعدد  معجزات  ہوتے  ہیں  اور  ہم  روزانہ  تباہ  حال  ہونے  سے  بچائے  جاتے  ہیں  فضاؑ میں  موجود  لاکھوں  کروڑوں  جراثیم،  وائرس  ہمیں  کسی  بھی موذی  مرض  میں  مبتلا    کر  سکتے  ہیں  مگر  ہم  محفوظ  ہیں،  ملکی  حالات  میں  اس  قدر  بد امنی  کے  باوجود  الحمداللہ  ہمارا  اہلِخانہ  محفوظ  ہے۔ یہ  سب  معجزے  ہی  تو  ہیں  بس  بصیرت والی  آنکھ   اور  ایک  شکر گزار  دل  ہونا  چاہئے  جو  اِس  ربوبیت کے  تعلق  کو  محسوس  کر  کسے۔ 
ہم  اللہ  کی  ربوبیت  کا  حق  اپنی  عبادتوں  سے ہر  گز  پورا  نہیں  کر  سکتے  لیکن  اتنا  ضرور  کر  سکتے  ہیں  کہ  کوئی  برا  گمان دل میں  لاتے  ہوئے  یا  کسی  گناہ  کا  ارادہ  کرتے  ہوئے  اُس  سے  ڈریں،  اُسکی  مخلوق  کے  ساتھ  احسان  کریں  جیسے  وہ  ہم  پر  احسان  کرتا  ہے۔  اور  یقین  کریں نفسا  نفسی  اور  جھوٹی  رشتوں  کی  دُنیا  میں  ربوبیت  کے  خالص   تعلق  کو  محسوس  کر  کے  آپکو  انتہائی  خوشگوار  احساس  ہوگا !!

 اللہ  ہم  سب  کو  ہمارے  نیک  مقاصد  میں  کامیاب  کرے  اور  ہمیں  معاشرے  کی  فلاح  کے  لئے  فعال  کردار  ادا  کرنے کی  توفیق  دے۔  آمین

خود شناسی

زگ  زگلار  نام  کے  امریکی  مصنف  کا  کہنا  ہے  کہ ’’ وہ  با  اثر  شخص  جس  سے  آپ  سارا  دن  بات  کر  سکتے  ہیں  وہ  آپ  خود  ہیں‘‘۔ 

کہتے  ہیں اِنسان  کے  لئے  دو  دن بہت  اہمیت  کے  حامل  ہوتے  ہیں،  ایک  وہ  دن  جب  وہ  دنیا  میں  آتا  ہے  اور  دوسرا  جب  وہ  یہ  جان  لیتا  ہے  کہ  اُسے  دنیا  میں  کیوں  بھیجا  گیا  ہے،  انسان  کے  لئے  یہ  جاننا بہت  ضروری  ہے  کیونکہ  اللہ  تبارک  و  تعالی  نے  ہر  شخص  میں  ایک  ایسی  صلاحیت  ضرور  رکھی  ہے  جس  سے  وہ  دوسروں  کو مستفید  کر  سکتا  ہے  اور  ایسا  ہی  ایک  مقصدِ  حیات  لے  کر  دنیا  میں  آتا  ہے۔  لیکن  بہت  سے  لوگ  اُس  مقصد  کو  حاصل  نہیں  کر  پاتے  جسکی  وجہ  سے  وہ  اپنا  کردار  پورا  کئے  بغیر  ہی  دنیا  سے  رخصت ہو جاتے  ہیں  وہی  ادھورے  اور  نامکمل  کردار  ایک  کمزور  معاشرے  کو  جنم  دیتے  ہیں۔
    ہر  شخص  کے  پاس  یہ  صلاحیت  ہونی  چاہئے  کہ  وہ  اپنی  خوبیوں  اور  خامیوں  کو  جانے اور  اُنکا  اعتراف  کرے، اِس  طرح  وہ  اپنی  شخصیت  میں  ایسا  نکھار  پیدا  کر  سکتا  ہے  جس  سے  نہ  صرف  اُسکو  فائدہ  ہو  بلکہ  اُسکے  اِرد  گِرد  موجود  ہر  شخص  مستفید  ہو  اور  ایک  صحتمند  معاشرہ  وجود  میں آئے۔
   خود  شناسی  انسان  کی  سب  سے  بڑی  کامیابی  ہے  جس  سے  وہ  اپنی  صلاحیتوں کا  بہتر  اندازہ لگا  سکتا  ہے  اِنہی  صلاحیتوں  کو  مّدِ نظر  رکھتے  ہوئے  وہ  اپنے  اہداف  کا  تعین  کر  سکتا  ہے ۔  خود  شناسی  انسان  کو  خود اعتمادی  جیسی  دولت  سے  روشناس  کرتی  ہے جس  کی  مدد  سے  انسان  جو  چاہے  حاصل  کرسکتا  ہے۔
   
خود  شناس  کیسے  بنا  جائے؟  
انسان  کے  لئے  سب  سے  زیادہ  آسان دوسروں  کی  شخصیت  کے  بارے  میں رائے  قائم  کرنا  ہے  اور  سب  سے  زیادہ  آسان  دوسروں  کی  شخصیت  کے بارے  میں رائے قائم  کرنا  ہے  اور  سب  سے  زیادہ  مشکل  کام  خود  اپنا  تجزیہ  کرنا،  اسی  لئے  وہ  خود  شناس  بننے  کی  کبھی  کوشش نہیں  کرتا  جبکہ  ایک  اچھی  زندگی  گزارنے  کے  لئے  یہ  بہت  ضروری  ہے۔  اپنی  شخصیت  میں  مندرجہ ذیل  اوصاف  کا احتساب  کرنے  سے  ہم  خود شناسی  کی  چند  اہم  منازل  طے  کرسکتے  ہیں۔

۔1.  ہماری  اقدار :  ہماری  اقدار  ہماری  شخصیت  کی  بہترین  عکاس  ہوتی  ہیں،  ہم  کس  چیز  کو اچھا  یا  برا  کہہ  کر  زمرہ  بند  کرتے  ہیں،  کن  چیزوں  سے  کنارہ  کشی  اختیار  کرتے  ہیں  یہ  سب  مل  کر  ہماری  اقدار  کے  صحیح  یا  غلط  ہونے  کا  فیصلہ  کرتے  ہیں۔  یہی  فیصلہ  ایک  اچھی  یا  بُری  شخصیت  کی  نشاندہی  کرتا  ہے۔

۔2.  مہارت:  ہمیں  اپنے اہداف  کا  تعین  کرتے  ہوئے  اپنی  بہترین  مہارت  کے  بارے  میں  ضرور  معلوم  ہونا  چاہئے۔
کیونکہ  یہی  مہارت آپکی  کامیابی  کی  دلیل ہے۔  اپنی  مہارت  کو  جاننے  کے  بعد  یہ  بھی  ضروری  ہے کہ  اُس  پر  ہمیشہ  محنت  کی  جائے  اور  اُسکو  فعال  رکھا  جائے،  جس  طرح  گلوکار  گانے  کی  صلاحیت  ہونے  کے  باوجود  بھی  مسلسل  مشق  سے  اپنی  آواز  اور  سُر  کو  بہترین  بنانے  کی  کوشش  میں  لگے  رہتے  ہیں،  اِسی  طرح  ہر  ایک  شخص  کو  اپنی اپنی  صلاحیات  پر  محنت  کرتے  رہنا  چاہئے۔

۔3. معلومات:  ہر شخص  کو  اپنے  اِرد  گِرد  موجود  زیادہ  سے  زیادہ  چیزوں  کی  معلومات  ہونی  چاہئے  اِس  طرح  اُس  کے  پاس  اِنتخاب  کے  سب  سے زیادہ  اِختیارات  ہوتے  ہیں۔ اور وہ  ہمیشہ بہترین  چناؤ  کر  سکتا  ہے۔

۔4.  اہداف:  ہم  زندگی  میں  جو  بھی  کرنا  اور  بننا  چاہتے  ہیں  وہ  ہمارے اہداف  میں  شامل  ہوجاتا  ہے۔ یہی  اہداف 

ہمارے   انتخابات ،  ہماری  شخصیت  اور  ہمارے  شخصیت  اور  ہمارے  مستقبل  کے  متوقع  حالات  کے  عکاس  بن  جاتے  ہیں،  مگر  اُن  اہداف  کو  حاصل  کرنے  کے  لئے  ضروری  ہے  کہ  وہ  ہمیشہ  مخصوص  اور حقیقت  پسندانہ  ہوں۔  جو  شخص خود اپنے  اہداف  کا  تعین  نہیں کرتا  وہ  ہمیشہ  دوسروں  کے  بنائے  ہوئے  اہداف  پورے  کرنے  میں  زندگی  سَرف  کرتا  ہے  اِس  طرح  وہ ایک  کمزور  اور  ایک  ناکام  شخصیت  کے  ساتھ  زندگی  گزارتا  ہے۔  

۔5.  خود  اعتمادی:  خود  پر  اعتماد  وہ  واحد  احساس  ہے  جسکی  بنیاد  پر اِنسان  اپنی  طے  شُدہ  منزل  حاصل  کر  سکتا  ہے۔  کبھی کبھی  ہم  خود اپنی صلاحیات  پر  شک  کرتے  ہیں اور  اپنی  منازل  کی  طرف  قدم  نہیں  بڑھاتے، 

 یاد  رکھیے!

ایک  خود  شناس اِنسان  اپنا  احتساب  بہترین  طریقے  سے  کرتا  ہے  اور  روزانہ  خود  اپنے  آپ  سے  مقابلہ  کرتا  ہے،  نتیجتاً  ایک  ایسی  شخصیت  وجود  میں  آتی  ہے جو  اپنی  مثال  آپ  ہو  اور  جو  اپنی  کامیابیوں  کو  معاشرے  کی  فلاح  کے  لئے   کام  میں  لائے۔

اِس  لئے  خود  کو  پہچانئے  تاکہ  آپ  لوگوں  کو  ویسے  ہی  نظر  آئیں  جیسے آپ  اُنہیں  دِکھنا  چاہتے  ہیں،  بجائے  اِسکے  کہ  آپ  خود  کو  ویسے  دیکھنے  لگیں  جیسا  لوگ  آپکو  سمجھتے  ہیں۔  اللہ  ہم  سب  کو  ہمارے  نیک  مقاصد  میں  کامیاب  کرے  اور  ہمیں  معاشرے  کی  فلاح  کے  لئے  فعال  کردار  ادا  کرنے کی  توفیق  دے۔  آمین