آئینہ

اِن  دنوں  بڑی  ہلچل  مچی  تھی اگلے  ہفتے  سیمی  آپا  کے  گھر  ’’استقبالِ رمضان‘‘ کا  پروگرام  تھا  جس  میں  پورے  خاندان  کی  دعوت تھی  اور  سیمی  آپا  کا  وسیع و عریض  حلقہؑ احباب  بھی  مدعو  تھا۔  سیمی  آپا  نے  دو  سال  پہلے  ایک  اسلامی  تدریس  گاہ  جوائن کی  تھی  اور  اکثر  لوگوں  کا  خیال  تھا  کہ  قرآن  کی  تعلیم  نے  اُنکی  کایا  ہی  پلٹ  دی  ہے! اُنکی  باتوں  میں  اب  اللہ  اور  اُسکے  احکامات  کا  کافی  ذکر  رہتا  اور  وہ  اکیڈمی  میں  سیکھی  ہوئی  باتیں اکثر  لوگوں  کے  سامنے  دوہراتیں یا یوں کہنا  صحیح  ہوگا  کہ  اپنی  معلومات  کا  رعب  جھاڑتیں!  مجھے  تو  بس  دیکھ  کر  یہ  حیرت  ہوتی  تھی  کہ کیا  سیمی  آپا  جیسے  لوگ بھی  بدل  سکتے  ہیں؟  سیمی  آپا  جیسے  سے میری مراد  ایسے  لوگ  ہیں جو  اپنے  اصولوں کے بہت  پکّے  ہوتے ہیں  چاہے  پھر بات  اُنکی  ہو  یا  کسی  اور  کی  لیکن  مزے  کی  بات  یہ  ہے  کہ  اُنکے  اصول  اپنے  لئے  الگ  اور  دوسروں  کے  لئے  الگ  ہیں!  سیمی  آپا  کا  تعلق  اُن  لوگوں  میں  سے  جن  کے  ذہنوں  میں بھرے  تکبر  نے  اُنکی  سوچ  کو  بہت  تنگ  کر  دیا  تھا! اور  اب  تو  تکبر  بنتا  بھی  تھا  کیونکہ  اب  وہ ’’اللہ والی‘‘  جو  ہوگئیں  تھیں! اور وہ  کتنی  اللہ  والی  تھیں  یہ  بس  اللہ  ہی  جانتا تھا۔۔ اب  ہر  سال  گھر  میں  ایک اسلامی  اجتماع  ہوتا  تھا  جو  اتنا  ہی  اسلامی  تھا  جتنا  اسلامی  جمہوریہ  پاکستان  ہے! رمضان  کے  مہینے سے  زیادہ  استقبالِ  رمضان کی  تیاری  کی  جا رہی  تھی! تمام  خاندان  والے  اپنے  اپنے  پسندیدہ  برینڈ  آؤٹ  لٹ  کا  رخ  کر رہے  تھے  اور  جو  اسکی  استطاعت  نہیں  رکھتے  تھے  وہ یہ   سوچ  رہے  تھے  کہ  لوگوں  کہ  تمسخر  سے  کیسے  بچیں  گے۔۔ سیمی  آپا  کے  خاندان  کی  ایک  بات بہت  منفرد  تھی  یہاں  لوگ  عمر  اور  رشتوں  سے  نہیں رُتبے  اور  دولت  سے  بڑے  اور  چھوٹے  تھے!  اِس  لحاظ  سے  کافی  لوگ  عمر  اور  رشتے  میں  بڑے  ہونے  کے  باوجود  حیثیت میں 

بہت  چھوٹے  سمجھے  جاتے  تھے

رسول اللہﷺ  نے  فرمایا : کیا  میں  تمہیں  جہنمی لوگوں  کے  بارے  میں  نہ   بتاؤں؟  ہر  سخت  مزاج ، بد اخلاق  اور  تکبر کرنے والا ،  جہنمی  ہے۔

لیکن  ہمارے  معاشرے میں  بد اخلاقیاں  اتنی عام  ہیں  کہ  کبھی کبھی  تو  اِنہیں  برائی  سمجھا  ہی  نہیں جاتا! ہمیں  منافقت  کی  اتنی  عادت  ہے  کہ ہمیں  لگتا  ہی  نہیں  کیسے  ہمارے  ہر  عمل  میں  ریا کاری  شامل  ہوگئی  ہے

سیمی  آپا  کے  گھر  جانے  کا  دن  بھی  آ  پہنچا۔۔ سیمی  آپا  کپڑوں،  میک اپ  اور  جیولری  کی  مشتہر  لگ  رہی  تھیں زرق  برق  کے  کپڑوں  اور  میک اپ  سے  لدی پھندی  خواتین  اے سی  والے  کمرے میں  بیٹھی  ہوئی  تھیں  کسی  ایک  کو  بھی  بیان  میں  دلچسپی  نہیں تھی! مگر  ایک  دوسرے  کو  دکھانے  کے  لئے خاموشی  سے  سر  جھکائے  سن  رہی  تھیں۔۔  سیمی  آپا  نے  وہاں  سب  کو   مصروف  دیکھا  تو  اپنی امیّ  کو  اُٹھا  کر  دوسرے  کمرے  میں  لے  گئیں، 

 اماں مجھے  نہ  آپ  کو  ایک  ضروری  بات  بتانی  ہے،  احمد  نے  آپکو  تو   پیسے  دینے  کے  لئے  منع  کردیا  تھا  لیکن  کل  مجھے  بازار  میں  فاخرہ  ملی  تھی  اُس  نے  بتایا  کہ  آپکی  بہو  نے  اُسکے  ساتھ  مل  کر  ایک  لاکھ   کی  بیسی ڈالی  ہے

فاخرہ  کہہ  رہی تھی  کہ  اُسکو  اپنے  بیٹے  کا میڈیکل  میں  ایڈمیشن  کرانا  ہے،  سچ  اماں  اتنا  دکھ  ہوا  بھاوج  ہماری  اور  اُسکے  اِرادے  ہمیں  دوسروں  سے  پتہ  چل  رہے  ہیں ، سیمی آپا  نے  روہانسی  شکل  بنا  کر  بولا

اری  فکر  نہ  کر  دیکھ  لوں  گی  اُسکو  تو میَں، اماں  نے  نفرت  سے  بہو  کے  بارے  میں  بولا

مائیک  پر  مقّرر  کی  آواز  گونجی ’’ حضرت  عبیدؓ  سے  روایت  ہے  کہ  ۲  عورتوں  نے  روزہ  رکھا  تھا،  ایک  شخص آیا  اور عرض  کیا ، یا  رسول اللہﷺ یہاں  دو  عورتیں  ہیں  جنہوں نے  روزہ  رکھا  ہے  اور  قریب  ہے  کہ  وہ  پیاس  سے  مر  جائیں ،  محمدﷺ  نے  اُنہیں  طلب  کیا  وہ  حاضر  ہوئیں  اور  ایک  پیالہ  لایا  گیا۔ محمدﷺ نے  ایک  عورت  سے  عرض  کیا  اِس  میں  قے  کر  چنانچہ  اِس  نے  کی  تو  پیپ  اور خون  اور  گوشت  کے  ٹکڑے  نکلے  جس  سے  آدھا  پیالہ  بھر  گیا  اور  پھر  دوسری  عورت  سے  بھی  یہی  فرمایا  تو  اُس  کے  قے  کرنے سے  بھی  وہی  نکلا  اور  پیالہ  بھر  گیا۔  محمدﷺ  نے  فرمایا  کہ  اِن  دونوں  نے  حلال  چیزوں  کو  ترک  کر  کے  روزہ  رکھ  لیا  اور  جو  چیزیں  اللہ  نے  حرام  کی  ہیں اُنکو  چھوڑنے  کا  روزہ  نہ  رکھا  (بلکہ  اِس  کام  میں  مشغول  رہیں)  اور اِن  میں سے  ایک  دوسرے  کے  پاس  بیٹھی  اور  لوگوں کا  گوشت کھاتی  رہی  یعنی  غیبت  کی۔

سیمی  آپا  کو  لگا  جیسے  مقّرر نے  اُنکی  بات  سُن  لی تھی  اور  وہ  صرف  اور  صرف  اُنہی  کو  تنبیہہ کر رہا  تھا۔۔ مگر جلد  ہی  اُنہوں  نے  اِس  خیال  کو  ذہن  سے  نکال دیا

دروازے  پر دستک  ہوئی ،  ملازمہ  نے  آ کر  بتایا  کہ  اسماؑ  خالہ  آئی  ہیں،  سیمی  آپا  اُنکو  لینے  باہر  گئیں۔

کیسی  ہو  سیمی ؟  اسماؑ  خالہ  نے  آپا  کو  گلے  لگا  لیا

میں ٹھیک  ہوں  خالہ  بہت  خوشی  ہوئی  کہ  آپ  آئیں،  آپا  نے  بتیّس دانتوں  کی  نمائش  کرتے  ہوئے  کہا

بھئی  تم  نے  بلایا  تھا  تو  آنا  ہی  تھا  کب  سے  ملاقات  بھی  نہیں ہوئی  تھی۔  تم  فرح  باجی  کی  بیٹی  کی  شادی  میں  بھی  نہیں آئی  تھیں! خالہ  نے  استفسار  کیا

میَں  اُن  سے  نہیں ملتی  خالہ ،  سیمی آپا  نے  منہ  بنا  کر  کہا،  اور  پھر  فوراً  بات  بدلی۔۔ آئیں  آپ  اندر  چل  کر  بیٹھیں۔۔

حدیث  شریف ﷺ ہے  کہ  جس  نے  اپنے  رشتہ  داروں  سے  قطع  تعلق  کیا  وہ  شخص  جنت  میں  داخل  نہیں  ہوگا

کمرے  میں  داخل  ہوتے  ہی  خالہ  اور  آپا  نے  بیان  کے  یہ  الفاظ  سُنے،  خالہ 

 نے  آپا  کی  طرف  دیکھا  تو  اُنہوں نے  نظریں چُرا  لیں۔

سیمی  آپا  نے اس  دن  سب  کو  اپنی  اکیڈمی کے  لوگوں سے  ملوایا  اور  سب  رشتہ داروں  کو  بتایا  کہ  اکیڈمی  کے  تمام احباب  اپنی  بیٹیوں  کے  رشتے  اُنکے  گھر  کرنا چاہتے  ہیں،  مگر  آپا  نے  شانِ بے  نیازی  سے  یہ  کہہ کر ٹال  دیا  کہ  یہ  فیصلہ  اُنہوں  نے  اپنے  بچّوں  پر  چھوڑ رکھا  ہے

ابو داوٴد  میں  رقم  ایک  حدیث  کا  مفہوم  ہے  یہ  بہت  بڑی  خیانت  ہے  کہ  تم اپنے  بھائی  سے  کوئی  جھوٹ  بات  بیان  کرو  جب  کہ  وہ  اِسے  سچ سمجھتا  ہو 

لیکن  اب اپنی  شان  ظاہر  کرتے ہوئے  یہ  حدیثیں کسے  یاد  رہتی  ہیں 

 کھانا  پُر  تکلف  تھا!  سیمی  آپا  نے  اپنی  عزیز  سہیلی  کو اپنے  ڈرائیور  کے  ساتھ  گھر  چھڑوا دیا اور  آپا  کی  بوڑھی  ساس  کو اُنکے  پوتے  نے  رات کے  ساڑھے گیارہ  بجے  رکشہ  کرا  کر  بھیجا ۔۔۔ مجھے  گھر آنے  تک  اِس  اجتماع  کا  مطلب  سمجھ  نہیں  آیا۔۔ مجھے  اِسکو  منعقد  کرنے  کی  نیت  بھی  سمجھ  نہیں  آئی ۔۔ ہمارے  دن  و رات  پر  دنیا  اتنی  سوار ہے  کہ  سال  میں  ایک بار  دنیا  دکھاوے  کے  یہ  اجتماع  کرنے  سے  ہمارے  پراگندہ  ذہنوں  پر  کوئی  فرق  نہیں  پڑتا!  اور  ماہِ  رمضان  کے  با  برکت  مہینے  میں جب  سرکش  شیاطین  جکڑ  دئے   جاتے ہیں  تب  بھی  ہم  اس  سب  سے  باز  نہیں  آتے  پتہ  ہے  کیوں؟  کیونکہ  ہم  اپنے  نفس  کے  غلام  ہیں،  ہم  اِس  قدر سر کش  ہوگئے  ہیں  کہ  سرکش  شیاطین  بھی  ہمارے  آگے  پانی بھرتے  ہیں! اور  پھر ہم  روتے  ہیں کہ  بیٹی  کا  رشتہ  نہیں  ہورہا،  کاروبار ٹھیک  نہیں  چلتا،  بچے  بیمار  رہتے  ہیں!! اور  اس  سب  کا  قصور ہم  لوگوں  کی  بری  نظر ، جادو  اور  بد عملیات پر  بڑی  آسانی  سے  ڈال  کر  بری  الذمہ  ہوجاتے  ہیں،  کاش  کہ  ہم  اپنے  اعمال  پر  بھی  ایسی  ہی  نظر  رکھیں  جیسی  اپنی  بہوؤں  کے  نوالوں پر  رکھتے  ہیں!  کاش  ہم  استغفار بھی  اُتنی  کثرت  سے  کریں  جتنا  دوسروں  کی  غیبت  کرتے  ہیں۔

کاش  ہم  آئینوں میں اپنا  دل  دیکھ  پاتے  اور  دیکھتے  کہ  ہماری  بد اعمالیوں  کی  وجہ  سے  وہ  کس  قدر  سیاہ  ہوگیا  ہے  تو  بہت  سے  لوگوں کی مشکلیں  حل  ہوجاتیں۔۔  

لیکن  ہم  ساری  زندگی  دوسروں  کو آئینہ  دکھانے  میں  صَرف  کر  دیتے  ہیں  تو  خود  اُسکی  فرصت  ہی  نہیں  ملتی  اور کچھ  ہم  خود  کو  اتنا  کامل  تصور  کرنے  لگے  ہیں  کہ  ہم  تو  کبھی  غلط  ہو  ہی  نہیں  سکتے

اللہ  نے  ہمیں  ایک بار پھر بخیریت  رمضان  کے  اتنے  مقدس  اور  با برکت مہینے

  تک  پہنچایا ہے  اللہ  کرے  کہ  ہم  سب  اِس  بار  خود  کو ریاکاری  سے  پاک  کر  لیں ،  اللہ  کو  راضی  کرنے  میں  کامیاب  ہوجائیں۔ ہمارے  دل  اور  ہمارے  گھر  اللہ  کی  رحمت  سے بھر  جائے 

اللہ  ہم  سب  کو  ہمارے  نیک  مقاصد  میں  کامیاب  کرے  اور  ہمیں  معاشرے  کی  فلاح  کے  لئے  فعال  کردار  ادا  کرنے کی  توفیق  دے۔  آمین 

تختہؑ دار

آج  کل طیّبہ  کو  روز  مرّہ  کے  کام  کرنے  میں   بھی  بہت  دُشواری  ہوتی  تھی  اُسکا  جسم  کمزور  تھا  اور  اُسکا  دل  اُس  سے  کہیں  زیادہ  بوجھل!  کبھی  کبھی ایسا  ہوتا  ہے  کہ  انسان  کے  اِرد  گرد  کا  ماحول  اُسکی  زندگی  کے  خوشگوار  ترین  لمحات  کو  اُسکی  زندگی  کے  مشکل  ترین  وقت  میں  بدل  دیتے  ہیں  اُسکے  ساتھ  بھی  کچھ  ایسا  ہی  ہو  رہا  تھا۔  وہ  تیسری  بار  تخلیق  کے  عمل  سے  گزر  رہی  تھی  یا  شاید  یہ  کہنا صحیح  ہوگا  کہ  وہ  تیسری  مرتبہ  کسی  کی  خواہشوں  کا  بوجھ  ڈھو  رہی  تھی۔  وہ  دو  بار  بیٹیوں  کو  جنم  دینے  کی  سنگین  غلطی  کر  چکی  تھی!  اور اس  بار  اُسکے  شوہر  نے  اُسکو  صاف  لفظوں  میں کہہ  دیا  تھا  کہ  تیسری  بیٹی  کا  مطلب صرف  اور  صرف  ’’طلاق‘‘  ہے۔۔ 

اپنے  شوہر  سے  اُس  ہی  کی  اولاد  پیدا  کرنے  کے  لئے  ایسی  بات  سننا۔۔ ایک  عورت  اور  ایک  ماں  کے  لئے  کتنا  تکلیف  دہ  ہے  یہ  کوئی  شخص  شاید  اندازہ  نہیں  کر  سکتا۔۔ اُسکو  آجکل  لگتا  تھا  کہ  وہ  دنیا  کی  سب  سے  بیکار  اور  غیر اہم  شے  ہے  اُسے  یاد  تھا  میکے  میں  بھی  اسکی  کوئی  خاص  حییثیت  نہ تھی، اماں  کے  آٹھ  بچوں میں  وہ  سب  سے چھوٹی  تھی  وہ  اکثر  سوچتی  تھی کہ  شاید  اتنے  زیادہ  بچے  ہوجانے  کے  بعد  ماں  کے  پاس  بھی  محبت  کم  پڑ  جاتی  ہے۔۔ گھر میں  سب  سے  بڑی  آپا  تھیں  اور  اُنکے  بعد  اماں  نے  متواتر  سات  سال  تک  بیٹوں  کو  جنم  دیا  اور  وہ  سات  بھائیوں  کے  بعد  پیدا  ہونے  والی  شاید  بہت  اَن  چاہی  اولاد  تھی! آپا  گھر میں  سب  سے  بڑی  تھیں اُنہوں  نے  اماں  کے ساتھ  گھر  اور  سات  بھائیوں  کو  سنبھالا  ہوا  تھا اُنکی  حیثیت  ہر  لحاظ  سے  امتیازی  تھی۔۔ شادی  کے  بعد  بھی  اُنہوں  نے اماں  اور  گھر  کے  معاملات  پر  اپنا  حق  جمائے  رکھا  اور  دوسروں  کا  حق  غصب  کئے  رکھا  آپا  کے  سامنے  طیبّہ  کی  کوئی  حیثیت  نہ  تھی  اور  اُسکو  اِس  بات  کا  احساس  جب  ہوا  جب  آپا  نے  اُسکے  لئے  وہ  پسند  کیا  جو  وہ  اپنے  لئے  مسترد  کر چُکی تھیں! طیّبہ  بی۔اے  کے  امتحانوں  میں  مصروف  تھی  جب  اُسے  اپنے  بھائی  سے  پتہ  چلا  کہ  اُسکے  لئے  زاہد  علی  کا  رشتہ  آیا ہے،  وہ  زاہد  علی  جس  نے  کوئی  آٹھ  یا  نو سال  پہلے  آپا  کے  لئے  رشتہ  بھیجا  تھا  ۔۔ اور  جو  طیبّہ  سے  کم و  بیش  سترہ  سال  بڑا  تھا!  آپا  نے  اُسکے  لئے  بہت  سہولت  سے  انکار کر  دیا  تھا۔۔ لیکن  طیبہّ  کا  انکار  اُن  ہی  آپا  نے  گھر میں  ہنگامہ  ڈال  رکھا  تھا۔۔ اُنکو  اُسکے  اعتراض  کی  کوئی  وجہ  نظر  نہ  آتی  تھی  اور  آٹھ  سال  پہلے کئے  جانے  والے  اُنکے  انکار  کی  وجہ  پوچھنے  کی  طیّبہ  میں  ہمت  نہیں  تھی!  اُس  نے  کبھی  اُن سے  یا  کسی  سے  جرح  نہیں  کی  تھی!  لیکن اس بار  یہ  بزدلی  اُسکو  تختہؑ دار  تک   لے  گئی!  اُسے  نا چار اِس  شادی  کے  لئے  ماننا  پڑا  تھا۔۔  کیونکہ  اُسے  اماں  ابا  کی وہ مجبوریاں  دکھائی  گئیں  جو  شاید  صرف  اِس  شادی  کو  کروانے  کے  لئے  ہی  وجود  میں  آئی  تھیں،  اُسکو  زاہد  کے  حوالے  سے  بھی  کئی  سبز  باغ  دکھائے  گئے!  جیسے  کہ  اُسکی  بے تحاشا  دولت، اور  یہ  کہ  ماں  پاب  کے  انتقال  کے  بعد گھر  میں  سب  سے  بڑا  ہونے  کی  وجہ  سے  اُسکی  مستحکم  پوزیشن  اور  طیبّہ  سے  شادی  کرنے  میں اُسکی  اس  قدر دلچسپی!  آپا  اور اماں  نے  اُسے  کوئی  دوسرا  آپشن  نہیں دیا!  اُسے  ہاں کرنا  ہی  پڑا۔۔ اُسے  یاد  تھا  کہ  شادی  کے  ہنگاموں  کے  بیچ  سب  کے  ساتھ  ہنسی  مذاق  کرتی آپا  نے  کہا  تھا کہ ’’بڑی  عمر  کے  مرد  اپنی  بیویوں  کا  بہت  خیال  رکھتے  ہیں‘‘  اور  شادی  کے  بعد  ہر  گزرتے دن  اُسے  یہ  احساس  ہوتا  تھا  کہ  آپا  کتنی  غلط  تھیں  اپنی  زندگی  کا  ایک  بڑا  اور  مشکل  حصہّ  اکیلے  طے  کرنے والے  لوگوں  کی  زندگی  میں بعد ازاں  داخل  ہونے  والوں  کی  کوئی  اہمیت  نہیں  ہوتی  یا  شاید  زاہد  جیسے  مرد  کے  لئے  نہیں  تھی اُس  نے  یہ  شادی  صرف  ایک  روٹین  کے  کام  کی  طرح  کی تھی ،  اور  اُس  کا  طیّبہ  سے  شادی  کرنے  کا  اصرار  صرف  اِسلئے  تھا کہ  وہ آٹھ  سال  پہلے  کئے جانے  والے آپا کے  اِنکار  کا  بدلہ  لے  سکے! اُس  نے  طیبّہ  کو  میکے  جانے  سے  منع  کر  دیا  اور  میکے  والوں  کو تو  شاید  اِس  ہی  بات  کا  انتظار  تھا! وہ  جلد  ہی  سمجھ  گئی  تھی  کہ  اب  اُسکی  زندگی  آسان  نہیں  ہوگی   

پھر  اُسکی  زندگی  کا  وہ  مرحلہ  آیا  جہاں  وہ  اپنی  ساری  محرومیاں  بھول  کر  سراپا  شکر  بن  گئی تھی۔۔  عورت  کے لئے ماں  بننے  سے  بڑھ  کر دنیا  میں کچھ  ہو  ہی  نہیں  سکتا!  اور  اپنے  احساسات  کا  اندازہ  کرنے کے  بعد  اُسکو  اپنی  اماں  سے  بھی  ساری  شکایتیں  ختم  ہوگئیں۔۔ اُن  نو  مہینوں  میں  اُسے  زندگی  اتنی  بار  حسین  لگی  تھی  جتنی  اُس  سے  پہلے  کبھی  نہ لگی  تھی  اور  نہ  ہی  کبھی  لگنی  تھی! کیونکہ  اُسکی  خوشیوں  کی  عمر بہت  چھوٹی  تھی۔۔ جس  دن  اُس نے  گُل رُخ  کو  جنم  دیا اُسکو  احساس  ہوا  کہ  وہ  پہلے  سے  زیادہ  بے وقعت  ہوگئی  ہے،  اُسکی  حیثیت  مزید  کم  تر  ہو گئی  ہے۔۔  اُس  دن  طیبّہ  نے  ایک  نظر اپنی  صحتمند  اور  خوبصورت  بچی  کو  دیکھا  اور  دوسری  طرف  چوکھٹ  پکڑ  کر  روتے  ہوئے  زاہد کو!  وہ  غم  سے  نڈھال  تھا ، اُس  کے  لئے  یہ  کسی  گالی  کے  مترادف تھا  کہ  وہ  بیٹی  کا  باپ  بن  گیا  ہے 

طیبّہ  سمجھ  نہیں  پا  رہی  تھی  کہ وہ  اپنی  بیٹی  کی  مجرم  ہے  یا  اپنے  شوہر  کی! اُسکو زندگی  میں  پہلی  بار  چاروں  طرف  اندھیرا  نظر  آیا  تھا  تب  وہ  یہ  نہیں  جانتی  تھی  کہ  ایک  دَن   یہی  بیٹی اُسکی  زندگی  کو  جگنوؤں  سے  بھر  دے  گی۔۔  اُسکو  بیٹے  اور  بیٹی  کی  یہ  تفریق  نہیں  معلوم  تھی  اُسے  تو  صرف  یہ  پتہ  تھا  کہ اب  دنیا  میں  کوئی  ایک  رشتہ  تو  ہے  جو  صرف  اُسکا  ہے!! اُسکی  زندگی  میں  ایک  محبت  شامل  ہو  ہی  گئی تھی

اور  اِس  محبت  کو اُسے  دنیا  کی  کڑی  دھوپ  سے  نہیں  خود  اُسکے  باپ  کی  نفرت  سے  بچانا  تھا! زاہد  دن  بھر  اُن  دونوں  کو  کوستا اور  دوسروں  کے  سامنے  خاموش  رہتا ۔۔ پتہ نہیں زاہد  کے  دنیا  دکھاوے  کی وجہ  سے  یا  گل  رخ کے نصیب  کی  وجہ  سے  کہ  اُسکو  اپنے  سارے  مالی  حقوق  ملتے رہے۔ 

  کپڑے ، اُسکی خوراک اور  پھر  اُسکی  اسکولنگ  لیکن  اُسکو  اپنے  بہت  سے  حقوق  کے   لئے  ترسنا  پڑا  تھا!  باپ  کی  محبت  کے  لئے  جو  ہر  بچے  کا  حق ہے  اُسکی  توجہ  اُسکے  التفات  کے  لئے،  گل رخ  کی زندگی  میں  یہ  کمی  ہمیشہ  کے  لئے  ایک  زہریلے  خنجر  کی  طرح گھپی  رہنی  تھی۔

یہ  دُکھ  طیبّہ  کے لئے  آسان  نہ  تھا! اور  اُسکو  زندگی  اُس  دن  بہت  بری  لگی  تھی  جب  وہ  ایک  اور  لڑکی  کو  ایسی  مشکل  زندگی گزارنے  کے لئے  دنیا  میں  لے آئی  زاہد  نے  اُسکی  شکل  تک  نہ  دیکھی  

طیّبہ  کی  گردن پر  پھندا  مزید  تنگ  ہوگیا  تھا۔۔

گل رخ  کے  بر عکس  ماہ رخ  بے  حد  کمزور تھی  اُسکو  پیدائشی  طور  پر  کئی  جسمانی  کمزوریاں  تھیں  جسکی  وجہ  سے  ڈاکٹرز  نے  اُسکا  خاص  خیال  رکھنے  کی  تلقین  کی  تھی!  لیکن  اس  بار  یہ  بہت  مشکل  تھا  زاہد  کا  روّیہ  بد  ترین  تھا۔۔ وہ  بچیوں  پر  ہاتھ  اُٹھانے لگا تھا!  اکثر  وہ  لاتے گھونسے مارنے  سے  بھی  گریز  نہیں  کرتا  تھا۔۔ کبھی گود  میں  اُٹھاتا  تو  اُنہیں  چٹکیاں  کاٹتا  اور  وہ چیخیں  مار  مار کر  روتیں  رہتیں۔۔ طیّبہ  کے  لئے  کبھی کبھی  یہ  سب  بہت  ناقابلِ  برداشت  ہوجاتا  تھا  لیکن  اُسکے  پاس  کوئی  راہِ فرار  نہیں  تھی!  اور  اُسکے  لئے  یہ  خیال  ہی  روح  فرسا  تھا  کہ  کہیں  تیسری  بار بھی  وہ  کسی ننھی  جان  کو  اِس  دوزخ  میں  نہ  جھونک  دے !! زاہد  نے  صاف  لفظوں  میں  طلاق  کی  دھمکی  دے  دی  تھی!  اور  اب  اُسکا  رابطہ  اُسکے  میکے  والوں  سے  بھی  بحال  کروا  دیا  تھا  تاکہ اُسے  وہیں  چھوڑ  آئے!  اُسکی  ہر سانس  دعا  بن  گئی  تھی  دعا  اِس  بات  کی نہیں  کہ  اُسکا  بیٹا  ہوجائے  بلکہ  اِس  بات  کی  کہ  اِس  بار  بیٹی  نہ  ہو

ہر  گزرتا  دن  اُسکی  تکلیف  کو  مزید  بڑھا  رہا تھا 

اُسکے  سر  پر  تلوار  لٹک  رہی  تھی

وہ  پچھلے  سات  گھنٹوں  سے  لیبر  روم  میں  تھی  اور  اسپتال  کے  کاریڈور میں  اُسکی آپا،  اماں اور  دونوں  بچیاں  اپنے  نصیب  کے  فیصلے  کا  انتظار  کر  رہی  تھیں ۔۔ آنے  والی  زندگی  نے  یہ  فیصلہ  کرنا  تھا کہ  وہ در  در  کی  ٹھوکریں  کھائیں  گی  یا  گھر میں  ہی  اپنے  باپ  کی  نفرت  سہتی  ہوئی  بڑی  ہوجائیں  گی۔۔ آپا  اور  اماں  مستقل  ٹہل  رہے تھے!  زاہد  اِن  سات  گھنٹوں  میں  سات  ہزار  بار  یاد  دلا  چکا  تھا  کہ  بیٹی  ہوئی  تو  طلاق  دے  دوں گا۔۔ ایک  ایک  لمحہ  کتنا  طویل  تھا ہر  آتی  جاتی  سانس  کتنی  بھاری  تھی!  بچیوں  کے  معصوم  چہرے ،  طیبّہ  کی  ساری  زندگی  اور  زاہد  کی     پست  ذہنیت کس  کس  بات  کا  افسوس  کرتے! 

اتنے  میں  ڈاکٹر  نے  دروازہ  کھولا

شاید  اُس  لمحے  اماں  اور آپا کا  سانس  تک رُک  گیا  تھا! 

وہ  آہستہ  آہستہ  قدموں سے  چلتی  ہوئی  آرہی  تھی  اماں  اور  آپا  کے  پاؤں  من من بھر کے  ہوگئے  تھے............’’زاہد  علی‘‘  اُس  نے  آکر پکارا

یکدم  کاریڈور میں  حبس کا  شدید  احساس  ہوا  ایسا  لگا جیسے  سانس تک  لینے  کو  ہوا  میسر  نہیں ہے

تمہارا  بیٹا  ہوا  ہے!‘‘   وہ  کیا  کہہ  رہی  تھی  شاید  اعصاب  اتنے  شل  تھے  کہ  آواز  نہیں  آئی  

زاہد  کی  آنکھوں میں تارے  چمکنے  لگے! ...’’میرا  بیٹا؟؟‘‘  وہ  بڑبڑایا 

اُسکی  آواز  ذہن  کے  تہ  خانوں  سے  ابھی  شعور  میں  پہنچی  ہی  تھی  کہ  ایک  اور آواز  ابھری ’’لیکن  وہ  ٹانگوں  سے  معزور  ہے

‘‘ہم  نے  اُسے  آبزرویشن میں  رکھا  ہے  دیکھتے  ہیں کہ  کیا  کر  سکتے  ہیں

اسے  لگا  تھا  کہ  اسپتال  کی  چھت  اُسکے  سر  پر  آ گری  ہے  یا  شاید آسمان؟  یا شاید  کسی  نے  کانوں  میں  سیسہ  ڈال  دیا تھا!  یا  شاید  اب کی  بار  تختہؑ  دار  پلٹ  گیا تھا!  

خوبصورت

میَں  جب  پہلی  مرتبہ  اُس  سے  ملی  تھی  مجھے  اُسکی  جان  دار  مسکراہٹ  بہت  پُرکشش  لگی  تھی۔۔ مگر  آہستہ  آہستہ  مجھے  اندازہ  ہوا  کہ  اُسکی ہر  بات  بہت  متاثر  کُن  تھی! چاہے  وہ  اُسکی سوچ  کی  طرح  اُسکا  دراز  قد،  اُسکے  دل  کی طرح  اُسکا  اُجلا  چہرہ اور  اُسکی  درد  بھری  روشن  آنکھیں! بس  یہی  ایک  چیز  تھی  جو  اُسکے  دل  کی  اصلی  حالت  کی  چغلی  کر جاتی  تھی۔  اکثر  ہنستے  ہوئے  اُسکی  آنکھیں  اُسکا  بلکل  ساتھ  نہیں  دیتی  تھیں

  یہ  اُسکی  ظاہری  خوبصورتی  اور اُسکی  متاثر  کُن  شخصیت  ہی  تھی  جسکی  وجہ  سے وہ  منفرد  تھی!  لیکن  اُسکو جاننے  کے  بعد  مجھے  احساس  ہوا کہ اُسکا  دِل  اُن  سب  چیزوں  سے  زیادہ  خوبصورت  ہے  جن  چیزوں  کی اب  تک  میں مداح  تھی

 مجھ  پر  یہ  انکشاف  بے  حد  حیران کُن  تھا  کہ  وہ  اولاد  جیسی خوبصورت  نعمت  سے  نوازی  جا  چکی  ہے!  اور  جب  وہ  اپنی  بیٹی  کو  پیار  سے  گلے  لگاتی  یا اپنے  چہرے  کے  زاویے  بگاڑ  کر  اُسے غصے  سے  دیکھتی،  اُسکی  فکر میں  اِدھر  اُدھر  دوڑتی  تو  اُسے دیکھ  کر  بخوبی  اندازہ  لگایا  جا  سکتا  تھا  کہ  اُسکی  دنیا  کا  محور  وہی  ایک  معصوم  بچی  ہے۔۔!  عورت  کے کتنے سارے  روپ  ہیں۔۔ پیدا  ہونے  سے  لے  کر مرنے  تک  اُس  کی  زندگی  ماں  باپ  کی  عزت  بھائی  بہنوں  کی  محبت ،  شوہر  اور  سسرال کی  ذمہ داریاں  اور  پھر  اولاد  کی  خوشیوں  کے  گرد  گھومتی  رہتی  ہے اور اِسی  کی  نذر  ہوجاتی  ہے  کمالِ  حیرت  یہ  ہے  کہ  عورت  اپنی  زندگی  کا  ہر رنگ  اور  ہر سُکھ  انہی  ذمہ داریوں  میں   ڈھونڈ  لیتی  ہے۔۔ اور ایک  بات  تو  ہم  سب جانتے  ہیں  کہ عورت  کے  چاہے  کتنے  ہی  رُوپ  ہوں ماں  بننے  کے  بعد وہ  صرف  ماں ہی بن  کر رہ  جاتی  ہے!  اِس  ایک  رشتے  کے  دنیا  میں  آنے  کے  بعد  ہر چیز  بہت  ثانوی  حیثیت  اختیار  کر  جاتی  ہے، شاید  اسی  لئے  اللہ  تبارک  و تعالیٰ  بھی  کہتا  ہے  کہ   وہ  اپنے  بندے  کو  ستّر  ماؤں سے  زیادہ  پیار  کرتا  ہے۔۔ یہی  ایک  بات  ماں  کی محبت  اور  اُسکا  رُتبہ  سمجھانے کے  لئے  کافی  ہے! 

وہ  بھی  ایسی  ہی  ہے  اُس  کے  لئے  بھی  زندگی  میں  سب  سے  زیادہ  ضروری  اُسکی  بیٹیاں  ہے،  مجھے اُسکی  آنکھوں  سے  جھانکتے  آنسو  کبھی کبھی  بےحد  وحشت  میں  مبتلا  کر  دیتے  تھے اور  مھجے شدت  سے  اپنی  بے  بسی  کا احساس  ہوتا  تھا، میَں  اُسکے لئے  کر  ہی  کیا  سکتی  تھی؟  میںَ  اُسکی  تھی ہی  کون؟

اُسکو  کیا  دُکھ تھا؟ ’’دکھ‘‘  شاید  بہت چھوٹا  لفظ  ہے!  وہ  ایک  ایسے  دوراہے  پر تھی  جہاں  دونوں  طرف  اُسکی  ہار  تھی،  معاشرے  نے  عورت  کو  کب  جیتنے  دیا؟  اُسکو  رسم ، رواج،  اصول،  دین  اور  ماں  باپ  کی  ذمہ داریوں  کی  دہائیاں  دے  کر  ایک  ایسے شخص کے  ساتھ  باندھ  دیا جاتا  ہے  جو  اب  اُسکی  زندگی  میں مجازی خدا کی  حیثیت  رکھتا  ہے  چاہے اُس  میں  خدا  جیسی 

 کوئی  بات  ہو  یا  نہیں  اور  چاہے  وہ  اپنی  بیوی  کو  انسان  سمجھے  یا  نہیں

اور  جب  عورت ایسے  جھوٹے  خدا  کی  بندگی سے  آزاد  ہونا  چاہے  تو  معاشرہ  اُسے  نادیدہ  زنجیروں  میں  جکڑنے  کی  کوشش  کیوں  کرتا  ہے۔۔

 عورت کے  لئے  ہم  ہمیشہ  گھُٹ  گھُٹ  کر  جینے  والی  زندگی  کا  راستہ  ہی  کیوں  چھوڑتے  ہیں؟

معاشرہ  عورت کو  سانس  لینے کا حق  کیوں نہیں  دیتا؟ 

عورت  اگر  اپنے  ساتھ  ہونے  والی  ناانصافیوں  کے  لئے  آواز  اُٹھائے  تو  لوگ کہتے  ہیں  کہ  بچوں  کی  زندگی برباد ہوجائے گی  وہ  بغیر  باپ  کے  کیسے  پلیں  گے  کیا  کوئی  اُنکے  باپ  سے  یہ  کہتا  ہے  کہ  تمہارے  برے  رویّے  کی  وجہ  سے  تمہارے  بچوں پر  برا  اثر  پڑے  گا؟  تمہارا  گھر  ٹوٹ  جائے  گا؟ 

دین  تو  عورت  کو اُسکے  جائز  حقوق  پر  سمجھوتا  کرنے  کو  نہیں  کہتا۔۔ دین  تو  بارہا  مردوں  کو  تنبیہہ  کرتا  ہے  کہ  عورتوں کی  حق  تلفی  نہ  کرو  ورنہ تمہاری  پکڑ  سخت ہے!!  تو  پھر  ہمارا  معاشرہ  کہاں  بھٹک رہا  ہے؟

میَں  اپنی  اُس  نئی  سہیلی  کی  ہمت  کی  داد  دیتی  رہی  جو صرف اپنا  گھر  بسائے  رکھنے  کی  خاطر  اپنی  عزتِ  نفس  کو  کچلتی  گئی!   ذہنی  اور  جسمانی  تکلیفوں  کو  برداشت کئے  گئی   یہاں  تک  کے  اُس کے  صبر  کی  حد  پار  ہوگئی اور اُب  اُسکے  پاس  زندہ  رہنے  کی  ایک  ہی  صورت  تھی  کہ  وہ  خود  کو  اُس  جہنم  سے  آزاد  کردے  وہ  ایک  ایسے  تعلق  کو  اپنی  اور اپنی  اولاد  کی  زنگی  سے  نکال  دے  جس  میں  صرف  اذیت  ہی  اذیت  ہے!  اور  یہ  فیصلہ  کرنا  ایک  عورت  کے  لئے  کتنا مشکل  ہے  کہ  جس  مرد  کے  لئے  وہ  اپنے  ماں باپ  کو  چھوڑتی  ہے  جسکی  اولاد  پیدا  کرتی  ہے اُس  سے  اتنی  نا  اُمید  ہو جائے  کہ  اپنا  راستہ  بدل  لے  اور  ہم؟  ہم  کیا  کرتے  ہیں؟  ہم  اُس  عورت  کے  اندر  چلنے  والی  توڑ پھوڑ  کا  احساس  کرنے  کے  بجائے  اُسکو  زمانے  بھر  کے  دلائل  دیتے  ہیں  کہ  وہ  کس  قدر غلط  ہے  اور  اُسکے  بچوں  کو  باپ  کی  کتنی  ضرورت  ہے!!  میرے خیال  میں بچوں  کو سب  سے  زیادہ  ایک  صحتمند  ماحول  کی  ضرورت  ہے  اور  اگر  اُنکا  باپ  اُن  سے  اتنی  ہی  محبت  کرتا  تو اُنکی  ماں  کو  کبھی  تکلیف  نہ  پہنچاتا! میرے  لئے  میری  وہ  دوست، وہ  لڑکی،  وہ ماں  دنیا  کی  سب  سے  خوبصورت  عورت  ہے  جو  روزانہ  صبح  اپنی  اولاد  کی  خوشی  اور  سکون  کے  لئے  دعا  کرتی  ہے  اُنکے  اچھے  مستقبل  کے  لئے  خود  کو  قابل  بنانے  گھر سے  نکلتی  ہے ،  اُسکا  مسکراتا  چہرا اُسکے  بچوں  کے  لئے  دنیا  کی  سب  سے  قیمیتی  متاع  ہے اور  اُسکی  آنکھوں میں  آنے  والے  آنسو  بار  بار اُسے  باور  کراتے  ہیں  کہ  اُسے  اپنے  بچوں  کی  حفاظت  کرنی  ہے۔۔   اُن  روشن  آنکھوں  سے جھانکتا  خوف  دیکھ  کر  مجھے  معاشرے  کے  بدصورت  چہرے  سے  بےحد  نفرت  ہوتی  ہے! جہاں  ایک  عورت  کو  اپنے  حصے  کی  جائز  خوشیاں  نہ  ملیں اور  ایک  ماں  کو  اپنی  اولاد  کو اپنے  پاس  رکھنے  کے  لئے لڑنا  پڑے۔

میںَ ایسی  ہر  عورت  کے  لئے کہتی  ہوں  کہ بے شک  اللہ  کی  مدد قریب  ہے 

 اور  وہ  اپنے  بندوں  پر  ظلم  نہیں کرتا۔۔

اللہ  ہم  سب  کو  ہمارے  نیک  مقاصد  میں  کامیاب  کرے  اور  ہمیں  معاشرے  کی  فلاح  کے  لئے  فعال  کردار  ادا  کرنے کی  توفیق  دے۔  آمین 

مرضِ مہلک

کہتے  ہیں  سائنس  کی  ترقی  کا  انسان  کو  سب  سے  زیادہ  فائدہ  یہ  ہوا  ہے  کہ اُس  نے جان  لیوا  بیماریوں  کا  علاج  دریافت  کر  لیا!  پہلے  زمانے  میں  تپِ دق  کے  مریضوں  کو  دور  دراز  جنگلات  میں  چھوڑ  آتے  تھے  اور  اب وہ  کچھ  عرصے  کے  علاج  سے  ہی  سالہا سال  صحت  مند  زندگی  گزارتے  ہیں۔۔ اِسی  طرح  جذام ، دمہ،  اور  دل  کے  مختلف  عارضے  بھی  جو  کسی  زمانے  میں  بے  حد  تکلیف دہ  اور جان  لیوا تھے  اب  با آسانی  چند  ادویات  کے  حملے  پر  انسانی  جسم  چھوڑ  بھاگتے  ہیں۔ اور  سننے  میں  تو  یہ  بھی  آتا  ہے  کہ  دنیا  بھر  کہ  ملحد  سائنسدان  موت کا  علاج  ڈھونڈ  رہے  ہیں، اُنکا  مقصدِ عین  یہی  ہے  کہ  کچھ  ایسا  ہاتھ  لگ  جائے  جس  سے  انسان  کو  ہمیشہ  کے  لئے  امر  بنا دیا جائے۔۔  خیر  یہ  مسافت  تو  اُنکی  رائیگاں  ہی  جائے  گی  کیونکہ موت  اور روزِ  آخرت  پر میرا  پورا  بھروسہ  ہے۔۔

سائنس  نے  بہت  ترقی  کر  کے  مختلف  وباؤں  کے  پھیلنے  سے  پہلے ہی  انسانوں  کو  ویکسین  لگوا  دی  ہے اب  ہم  بہت  سی  بیماریوں  سے  بچ  گئے  ہیں۔۔ ہم  نے  انسانی  جسم  کو اُن  بیماریوں  کے  خلاف  تیار  کر لیا  ہے۔۔  حیران  کن  بات  یہ  ہے  کہ  اتنا  جدید  اور  ترقی  یافتہ  ہونے  کے  باوجود  بھی  انسان  میں  بس  ایک  کمی  رہ  گئی  وہ  اپنا  بہت  زیادہ  خیال  رکھنے  کی  چاہ  ہی  کرتا  رہا  مگر  خیال  نہ  رکھ  پایا۔۔  اور  یہ  بات میں  اِسلئے  کہہ سکتی ہوں  کیونکہ  میں نے  ایک  ایسے  جراثیم  کو  مہلک  مرض  بنتے  دیکھا ہے  جسے  لوگ  بہت  معمولی  سمجھ  کر اپنے  آس  پاس  بھٹکنے  دیتے  ہیں نہ  کبھی  خود  کو  اُس  سے  پاک رکھتے ہیں  اور  نہ  ہی  دوسروں  کو  اُس  سے  بچنے  کی احتیاطی  تدابیر  بتاتے ہیں۔  ایسی تکلیف  دہ  بیماری  سے  تباہ  ہوتی  زندگیاں دیکھ  کر  کم  از  کم  مجھے  انسانیت  پر  بہت  افسوس  ہوتا  رہا

لیکن  لوگ  اِس  مرضِ  مہلک  سے  چھٹکارا  پانا  ہی  نہیں  چاہتے  یا  شاید  وہ  جان  ہی  نہیں  پاتے  کہ  وہ  کب  اِس  کا 

 شکار  ہو  گئے اور کیسے  یہ  مرض  رفتہ  رفتہ  اُنکی  صحتمند  زندگی  پر حاوی  ہوتا رہا۔

میں  نے  پہلی  مرتبہ  ایک  بہت  قریبی  دوست کو اِس  بیماری  میں مبتلا  دیکھا  اُسکی  تکلیف  مجھ  سے  دیکھی  نہ  گئی  لیکن  اُسکے  مرض کی  حقیقت جاننے  کے  بعد  مجھے  احساس  ہوا  کہ  میرے  آس  پاس  کتنے  ایسے  لوگ  ہیں جو 

 خود  کو  مختلف  بیماریوں  میں مبتلا  سمجھتے  ہیں مگر  دراصل  بیماری  تو  سب کی  ایک ہی  ہے

اُسکی  اور  میری  دوستی  کو چھ سال  ہوگئے  تھے۔۔ وہ  ایک  بہترین  دوست  اور  بہت اچھی  لڑکی  تھی۔۔ اُسکے  پاس  اللہ  کا  عطا  کردہ  سب  کچھ  تھا  اپنا  گھر،  محبت  کرنے  والے  ماں  باپ،  خیال  رکھنے  والے  بہن  بھائی  ہر  قسم  کی  آزادی  تھی  جس  کا  اُس  نے  کبھی  غلط  فائدہ  نہ  اُٹھایا  کیونکہ  اُسکی  تربیت  بہترین  خطوط  پر  کی  گئی تھی،  وہ  تعلیمی  میدان  میں  اوّل  تھی اُسکے  پاس  شاید  اُداس  ہونے  کی  کوئی  وجہ  تک  نہیں  تھی  مگر  ایک  دن  وہ  مرے  پاس  آکر  بہت  روئی  ۔۔ اس  قدر روئی  کہ  مجھ  سے  سنبھالے  نہ  سنبھلی۔۔ مجھے  لگا  جیسے  وہ  میرے  گلے  لگے  لگے  ہی  دم  توڑ  دے  گی  اور میں  دیکھتی  رہ  جاؤں گی  میں  بے  بس  تھی  کیونکہ  اُسکو  بھی  وہی  بیماری  تھی،  وہی  مرضِ  مہلک  تھا  جسے  وہ  چھوٹا  سمجھ  رہی  تھی  مگر  میں  ایک  ان دیکھے  بوجھ  تلے  دھنستی  جا  رہی  تھی۔۔ 

کئی  دن  گزرے ۔۔ ابھی  یہ  واقعہ دماغ  سے  صحیح  طرح  محو  بھی  نہ  ہوا  تھا  کہ  ایک اور  جاننے  والی  خاتون  کی  حالت  غیر  معلوم  ہوئی  میں نے  عرض  کیا  تو  معلوم  ہوا  کہ  اُنہیں  بھی  وہی  بیماری  تھی  فرق  یہ  تھا  کہ  وہ  بیماری  کی  آخری  اسٹیج  پر  آ  چُکی  تھیں  اُنکا  سب  کچھ  ختم  ہو  چکا  تھا اور  سب  کچھ  ختم  ہونے  کے  بعد  اُنہیں  اپنے  مرض  کی  حقیقت  معلوم  ہوئی!  کیا  تھا؟  کچھ  بھی  تو  نہیں؟  سب  کچھ  تھا  اُن کے  پاس  مگر اُس  سب  کچھ  کے  باوجود  جو  نہ  تھا  وہ  تھی  ’’شکرگزاری‘‘ وہ  اللہ  کا  شکر  ادا  کرنے  کے  بجائے  اُن  چیزوں  کا  شکوہ  کرنے  لگی تھیں جو  اُنکے  پاس  نہیں  تھیں۔۔ اور  شکووٴں  سے  بھی  کبھی  نعمتیں بڑھی  ہیں؟  صد  افسوس  کہ  سب  چھن  گیا۔۔

میری  جس  عزیز  دوست  کے  پاس  میری  نظر  سے دنیا کی  ہر  نعمت  موجود تھی  اُسکی  نظر اُن  سب  نعمتوں  کو  چھوڑ کر   اُس  ایک  نعمت  پر  جا  ٹھہری  تھی  جو  اُسک  پاس  نہیں  تھی۔۔ اُس  نے  موجودہ  نعمتوں  کے  شکر  کے  بجائے  اللہ  سے  ایک  شکوے  کا  رشتہ  بنا  لیا اور ہر  وقت  کے  بے  جا شکووٴں  سے  تو  خلیج  ہی  بڑھتی  ہے! 

اور  وہ  میری  جاننے  والی  خاتون  اُن  کے  پاس  بھی  ایک  حلال  کمانے والا  شوہر  اور  کتنی پیاری  بیٹی  تھی  مگر  انسان  بے  جا  خواہشات  کر کے   اپنی  زندگی  کے  سکون  کو  کس  قدر برباد  کرتا  ہے، وہ  میرے  سامنے  بیٹھی  اپنی  زندگی  کی  کمیوں  پر  رو  رہی  تھیں وہ  ایک  ایسے  مرضِ  مہلک  کی  شکار  تھیں  جو  اُنکا  سب  کچھ  برباد  کر  چکا  تھا
اُنکو  ناشکری  وائرس  لگ  گیا  تھا ناشکُری  ایک  مہلک  مرض  ہی  تو  ہے!  لیکن  ہمیں  اپنی  اس  کوتاہی  کا  اندازہ  تب  ہوتا  ہے  جب  ہمارا  سب  کچھ  ہماری  ناشکری  کی  وجہ  سے  ہم  سے  چھن  چکا  ہوتا  ہے

ایک  دوست  پریشان  ہے  کیونکہ  اُسکی  تنخواہ  کم  ہے،  دوسرا  پریشان  ہے  کہ ڈگری  ہونے  کے  باوجود نوکری  نہیں  ملتی  اور  تیسرے  کو  یہ  دکھ  ہے  کہ  وہ  تعلیم  ہی  حاصل  نہ  کر  سکا  اور ایک  وہ  مزدور ہے  جو  تپتی  دھوپ  میں  اینٹیں  سر  پر  رکھتا  ہے  اور  اللہ  کا  شکر  ادا  کرتا  ہے  کہ  اُسکا  رزق  بند  نہیں  ہے !

 ایک  وہ  شخص  ہے  جو ۵ لاکھ  کی  گاڑی  میں بیٹھ  کر  اُداس  ہے  کیونکہ  اُسے  ۲۵ لاکھ  کی  گاڑی  چاہئے  اور  دوسرا  اپنی  خستہ  حال  بائیک  پر  ۳  بچوں  کو بٹھا  کر  اُسکول  لے  جاتا  ہے  اور  اللہ  کا  شکر ادا  کرتا  ہے  کہ  اُس  کے  ہاتھ  پاوٴں  سلامت  ہیں  اور  اُسکے  بچے  محفوظ  ہیں! 

کوئی  دکھی  ہے  کہ  اُسکی  چار  بیٹیاں  ہیں  بیٹا  کوئی  نہیں  اُسے  اللہ  سے  بے  حد  شکوہ  ہے  کہ  سب  بھائیوں  کو   بیٹے  دئے  مجھے  کیوں  نہیں ۔۔ اور  وہیں  برابر  میں  بیٹھا  بے  اولاد  شخص کی آنکھیں  اُسکی  چار  بیٹیوں  کو  ساتھ  میں کھیلتا  دیکھ  کر  بھر  آتی  ہیں۔۔

ہم  سب  نے  اپنی  زندگیوں  کو  اتنی  لا  حاصل  تمناوٴں  کے  ساتھ  باندھ  دیا  ہے  کہ ہماری  موجودہ  نعمتوں  کو  دیکھنے کی  تو  ہمارے  پاس  فرصت  ہی نہیں!  ہماری  شکایتیں  ختم  ہوں  تو  ہم  شکر  کے  لئے  ہاتھ  اُٹھائیں !!  انسان کی  سرشت  ہی  ناشکری  ہے!  ہم  خواہشوں  کے  دلدل  میں خود  کو  پھنسائے  رکھتے ہیں  اور  جب  کوئی  نعمت  چھین  لی  جاتی  ہے  تو  احساس  ہوتا  ہے 
 کہ  ہم  نے  کیا  کھویا
اللہ  تو  بار بار  کہتا  ہے  کہ  شکر  نعمتوں  کو  بڑھاتا ہے لیکن  ہم  نفسانی خواہشات  کے  پیچھے  اتنے  اندھے  ہیں کہ  ہم  اپنی  زبان  سے  دن  میں  کتنی  بار اللہ  کو  ناراض کرتے  ہیں
اِس  لئے  خدانخواستہ  کوئی  نعمت  آپ  سے  چھن  جائے  اُسے  سے  پہلے  ہی  اپنے  رب  کا  شکر ادا  کریں  اور  کرتے  چلے  جائیں! میَں  یہ  نہیں  کہتی  کہ  زندگی  سے  خواہشات  کو  بلکل  نکال  دیں  یا  آگے  بڑھنے  کے  بارے  میں  نہ  سوچیں !!  ضرور سوچیں اللہ  سے  ضرور  دعا  کریں  کہ  وہ  آپکو  مزید  نوازے  مگر  اپنی  خواہشوں  کے  غلام  نہ  بنیں۔۔ اُنکو  اپنی  زندگی  کا  لطف  ہر  گز  نہ  خراب  کرنے  دیں! ورنہ  انسان  کی  مثال  بھی  اُس  کتّے  جیسی  ہو جائےگی  جو  پانی  میں  اپنا  عکس  دیکھ  کر  سمجھتا  ہے  کہ  کنویں  کے  اندر  بھی  کوئی  کتا  ہے  جس  کے  منہ  میں  بوٹی  ہے  اور  اُسکو  حاصل کرنے  کے  چکر میں وہ  اپنے  منہ  کا  نوالہ  بھی  گنوا  دیتا  ہے!  ہم  ایسی  کہانیاں بہت  سنتے  ہیں  اپنے  بچوں  کو  بھی  سناتے  ہیں!  مگر  جو  شعور  اِن  سے  حاصل کرنا  چاہیئے  وہ  نہیں  کرتے!
اللہ  ہم  سب  کو  اپنے  شکرگزار  بندوں  میں  شامل  کر  لے اور ہم  سب  کو  ہمارے  نیک  مقاصد  میں  کامیاب  کرے  اور  ہمیں  معاشرے  کی  فلاح  کے  لئے  فعال  کردار  ادا  کرنے کی  توفیق  دے۔  آمین    

’’اشتہاری محبت‘‘

کہتے  ہیں  ہر  آنے  والی  نسل  پچھلی  نسل  کے  مقابلے  بہت  بہتر  اور  جدید  ہوتی  ہے۔  اور  ہر  بار  نئے  انقلابات  لا  کر  زمانے  کو  نئی  جِلا بخشتی  ہے ۔۔۔ سائنس  ہو  یا  ادب  یہ  بات  کئی  دفعہ  سچ  ثابت  ہوئی  ہے  کہ  ہر  آنے  والی  نسل  نے  پچھلی  نسل  کے  تجربات  اور  مشاہدات  کی  ہی  بناؑ  پر  نئے  قوانین  کی  بنیاد  رکھی  اور  بہت  بہتر  رکھی ،  اور  یہی   ہر زمانے  میں  انسان  کی ترقی  کی  وجہ  ہے۔  آگے  بڑھنا  قدرت  کا  قطعی  اُصول  ہے۔

      ہر  نئی  نسل  نے  زمانے  کو  نئے  طریقے  سکھائے ،  پرانی  ثقافتوں  کو  جدید  ثقافتوں  میں  بدلا،  پرانی  زبان  کو  نئی  جدّت  دی  اور  پرانے  طرز و  روایت  کو  بھی  بدل  ڈالا  ۔۔۔ نسل در نسل  ہونے  والی  معمولی  نوعیت  کی  ان  تبدیلیوں  نے  آہستہ  آہستہ  ایک  مکمل  منفرد  صورت  اختیار  کر  لی اور  کچھ  کے  چہرے  اِس  قدر مسخ  ہو  گئے  کہ  اُنکی  پرانی  پہچان  مکمل  طور  پر  فراموش  ہوگئی۔  اور  ایسا  ہی  ایک  جذبہ  جو  آج  زیرِ  بحث  ہے  جس  نے  اپنی  صورت  بڑی  برق  رفتاری  سے بدلی  ہے وہ  بلاشبہ  ’’محبت‘‘ ہے۔  صدیوں  سے  انسانوں  نے  محبت  کو  دو  قسموں میں  کلاسیفائی  کیا  ۱۔ حقیقی  محبت  جو  انسان  اپنے  خالق  سے  کرتا  ہے  اور  اسکا  موازنہ  دنیا  کی  کسی  اور محبت  سے  نہیں  کیا  جا  سکتا  اور  ۲۔ مجازی  محبت یعنی  وہ  جو  اِس  دنیا  میں  رہتے  ہوئے  دنیاوی  تعلقات  سے  ہوجاتی  ہے  جیسے  اولاد  کے  لئے  ماں  کی   محبت ، بہن کے  لئے  بھائی  کی،  بیوی  کو  شوہر  سے وغیرہ وغیرہ۔۔۔

لیکن  پچھلے  کچھ  سالوں میں  محبت کی  ایک  نئی  قسم  متعارف  ہوئی  ہے  جو  پچھلی  دونوں  قسموں  سے  زیادہ  پائی  جانے  لگی  ہے۔ اور  اسکی  وجہ  سے  لوگوں  کی  زندگی  میں  باقی  دونوں  محبتوں  کا  وجود  نہ  ہونے  کے  برابر  رہ  گیا  ہے۔ دنیا  اِسے  کس کس  نام  سے  پکارنے  لگی  ہے  اُسکا  تو  الگ  ہی  بیان  ہے  ہم  اِسے  ’’اشتہاری  محبت‘‘  کہہ  سکتے  ہیں۔

بے  شک  محبت  کے جذبے  کو  تاریخی  حیثیت  حاصل  ہے  متعدد افسانے،  کہانیاں  اور کردار  اِس  جاودانی  جذبے  کی  ترجمانی  کرتے رہے  ہیں۔  ہماری  نسل  کا  المیہ  یہ  ہے  کہ  ہم  نے  اِس  مقدس  اور  لازوال  جذبے  کو  بہت  چھوٹے  ڈبّے  میں  فِٹ  کر  دیا  ہے اور  اسکی  تعریف  اب  پارکوں  اور  ریستورانوں  میں  بیٹھے  نوعمر  لڑکے  لڑکیوں ،  سوشل  میڈیا  پر  ریلیشن شپ  اِسٹیٹس  تک  مفقود  ہوگئی  ہے  اور اسکی  اصل روح  مطلب پرستی  کی  اس  دنیا  میں  کہیں  لا  پتہ  ہوگئی  ہے ۔۔ مہنگے  تحائف،  وقت  گزاری  اور  لغویات محبت  کی  جدید  تعریف  بن  گئے  ہیں۔  نئی  نسل  کی  متعارف  کردہ اِس  تعریف  نے  ذہنوں ،  رویّوں،  اور  زندگی  کے  دیگر  معاملات  پر بے  حد  گہرا  اثر  ڈالا  ہے۔  اور  یہ  اثر  ظاہر  ہے  کہ  مثبت تو  ہر  گز نہیں  ہے!

محبت  وہ  واحد  جذبہ  ہے  جس  پر  دنیا چل  رہی  ہے! اللہ  تبارک  و  تعالٰی  نے  اپنے  حبیب ﷺ کی  محبت  میں  دونوں  جہاں  بنائے،  وہ  اپنے  بندوں  سے  محبت  کرتا  ہے  اور  اسی  لئے  اُسکی  بے شمار  خطاؤں کے  باوجود  اپنی  عطائیں  کم  نہیں  کرتا۔  اُسکو  معاف  کردیتا  ہے،  انسان  گِر  جائے  تو  اُسے  پھر  اُٹھا  لیتا  ہے!  اِس  ہی  محبت  کی بناؑ  پر  اللہ  انسان  کے  دل  میں  دوسرے  انسانوں    کے  دل  میں  بھی  ایک  دوسرے  کے  لئے  محبت  ڈال  کر  احسان  ہی  تو  کرتا  ہے۔۔ اللہ  سبحان  و  تعالٰی  اگر  عورت  کے دل  میں مامتا  کی  صورت محبت  نہ  ڈالتا  تو  کیا وہ  اتنی  مشقت  اُٹھا  کر  اولاد  پیدا  کرتی؟  کیا  اپنی  نیندیں  حرام  کر  کے  اپنے  بچے  کو  سلاتی؟  اگر  اللہ  مرد  کے  دل  میں  محبت  نہ  ڈالے  تو  کیا  وہ  اہلِخانہ  کا  پیٹ  پالنے  کے  لئے دن  دن  بھر  مزدوری  کرے؟ یہ  تو صرف  چند  مثالیں  ہیں ۔۔ یہ  محبت  کی  ایسی  مثالیں  ہیں  جن  پر  دنیا  قائم  ہے!  جس  سے  یہ  نظامِ حیات  قائم  ہے۔۔ لیکن  ہمیں  ان  محبتوں کے  اصل  معنی  بھول  گئے  ہیں۔

اگر  زندگی  سے  اس  محبت کا  وجود  اور  اسکی  سچائیاں نکال  دی  جائیں  تو  زندگی  صرف  ایک  خاردار  راہداری  بن  کر  رہ  جائے ۔۔ ضرورت  اس  امر  کی  ہے  کہ  یہ  نئی  نسل  محبت  کے  حقیقی  معنوں  کو  جانیں  اسکی  گہرائیاں  اور  اس  میں  چھپا  سکون  دریافت  کر  لیں،  یہی  زندگی  کی  اصل  منزل  ہے اسکو  جاننا  اِسلئیے  بھی  ضروری  ہے کیونکہ محبت سراسر  ایثار  کا  نام  ہے  جس  سے  یہ  نسل  محروم  ہے۔۔

اللہ  ہم  سب  کو  ہمارے  نیک  مقاصد  میں  کامیاب  کرے  اور  ہمیں  معاشرے  کی  فلاح  کے  لئے  فعال  کردار  ادا  کرنے کی  توفیق  دے۔  آمین