سال ۱۹۸۵
۱۲ مارچ
آج میں شام کی فلائٹ سے پاکستان چھوڑ آیا۔ ایک عجیب سا احساس ہے دل میں۔ جانے کیوں میں وہ خوشی محسوس نہیں کر پا رہا جو مجھے کرنی چاہئے تھی، آخرکار مجھے اتنی اچھی نوکری مل گئی ہے۔ تنخواہ بھی زیادہ ہے اور پھر بیرونِ ملک میں تو سکون ہی سکون ہوتا ہے، پاکستان جیسے مسائل وہاں کہاں۔۔ لیکن پھر بھی ایک عجیب سا خالی پن ہے۔۔ شاید میں جس گھر میں اپنے دوست اکرم کے ساتھ کمرہ بانٹ رہا ہوں اُس میں سنّاتا بھی اس قدر ہے کہ دل ہولانے لگے اور گھر میں کتنی رونق تھی۔۔ شاید میں شور شرابے کا عادی ہوگیا ہوں۔۔ گھر میں جب گڑیا شور مچاتی تھی تو میں کیسے جھنجلا جاتا تھا۔ اب لگ رہا ہے کہ اُس کے شور کا انتظار کررہا ہوں۔۔ اور سفر کر کے تھوڑا تھک بھی گیا ہوں۔۔ مجھے آرام کر لینا چاہیے۔ کل اُس کمپنی کا چکر بھی لگانا ہے جہاں پر نوکری لگی ہے۔
۲مارچ ۵
حیرت ہوتی ہے کہ اللہ نے انسان کا رزق کس طرح پھیلایا ہوا ہے۔۔ اور اُسکو حاصل کرنے کے لئے انسان کیا کیا کرتا ہے۔۔ مالک کا احسان ہے کہ نوکری پکی ہے، لوگ بھی بھلے ہیں لیکن کتنی اجنبیت ہے ہوتی ہے نئے شہروں میں۔۔ نہ لوگ آپ کے اپنے ہوتے ہیں نہ زبان ۔۔ گھر آ کر بھی میں ایسے ہی پڑا رہتا ہوں ۔۔ اکرم نائٹ ڈیوٹی کرتا ہے تو ایک طرح سے میں اکیلا ہی رہتا ہوں۔۔ گھر یاد آتا ہے۔۔ یہاں سے بار بار فون بھی نہیں کیِا جا سکتا۔۔ خط کا جواب آنے میں بھی دنوں لگ جاتے ہیں، چھوٹو اماں کو بہت تنگ کرتا ہوگا، خط پوسٹ کرنے میں دن لگا دیتا ہوگا۔۔ اماں بہت یاد کرتی ہونگی ۔۔ روتی بھی ہونگی ۔۔ کتنی محنت کی ہے اُنہوں نے اور ابّا نے مجھے بڑا کرنے میں۔۔ اب میری باری ہے کہ میں اُنہیں کچھ کر کے دکھاؤں ، اُنہوں نے ہمارے لئے زندگی لگا دی اب میں بھی کچھ سال محنت کر کے اُن کے سارے ادھورے خواب پورے کردوں گا۔۔
اپریل ۵
ہفتے کو مجھے اچانک ہی شدید بخار چڑھ گیا۔ اکرم کو ڈیوٹی سے آ کے مجھے سوتا دیکھ کر تشویش ہوئی ۔۔ ہاتھ لگایا تو میرا ماتھا تپ رہا تھا۔۔ یہاں میڈیکل بہت مہنگا ہے اکرم اپنے ساتھ پاکستان سے پیناڈول لے کر آیا تھا۔۔ پتہ نہیں چھپا کر لایا تھا یا نقلی ڈاکٹری نسخہ لکھوا کر۔۔ ۳ وقت وہ کھانے سے بخار تو اُترتا رہا مگر شدید بخار کے اثر کی نقاہت سے میری حالت بری ہوگئی ۔۔ رات کو جب میں دودھ ڈبل روٹی کھا کے سویا تو اماں بہت یاد آئیں ۔۔ بے اختیار میری آنکھوں سے آنسو نکل گئے۔۔ گھر میں ہوتا تو اماں کبھی اِس طرح نہ پڑنے دیتیں دلیہ ، یخنی، اور پتہ نہیں کیا کیا
بنانے میں جُت جاتیں۔۔ رات بھر سرہانے بیٹھی رہتی۔۔
خیر، ابھی تو اماں کا یہاں آنا تقریباً ناممکن ہے۔ سوچا نہیں تھا پردیس میں رہنے والے اتنے مجبور ہوجاتے ہونگے۔
بنانے میں جُت جاتیں۔۔ رات بھر سرہانے بیٹھی رہتی۔۔
خیر، ابھی تو اماں کا یہاں آنا تقریباً ناممکن ہے۔ سوچا نہیں تھا پردیس میں رہنے والے اتنے مجبور ہوجاتے ہونگے۔
مئ۲۱
رمضان شروع ہونے والے ہیں، پتہ نہیں کیسے گزاروں گا اکیلے، سحری میں کیسے اُٹھوں گا۔۔ اماں کے ہاتھ کے پراٹھے بہت یاد آئینگے۔۔ کراچی میں تو کیا رونق ہوتی ہے سحر اور افطار میں۔۔ کبھی کبھی لگتا ہے میں نے خود کو پنجرے میں بند کرلیا ہے۔۔ اچھی نوکری اچھی اورآسودہ زندگی کا خواب لے کر پردیس آیا تھا۔۔ لیکن تب یہ نہیں پتہ تھا کہ زندگی تو گھر والوں کے ساتھ ہوتی ہے۔۔ آپ کے آس پاس ہنستے مسکراتے چہرے ہی آپکی زندگی کی اثاث ہوتے ہیں۔۔ کیا فائدہ کہ سونے کے نوالوں سے پیٹ بھرتے رہو اور دل اداس رہے۔ کاش میں وہیں رہ کر اِتنے پیسے کما لیتا کہ گھر نہ چھوڑنا پڑتا۔
جولائی ۱۳
آج میں بہت رویا۔۔ عید کے دن بھی گھر والوں سے بات نہیں ہوسکی ، اماں کا خط اب تک نہیں پہنچا ہے۔۔ کچھ بھی اچھا نہیں لگ رہا۔۔ آنسو صفحے پر گر رہے ہیں۔۔ اِس مہینے میں کچھ بھی کر کے اماں کو ٹیلیفون لگوانے کے لئے الگ سے پیسے بھیجوں گا۔۔
اگست ۲
آج اماں کا خط ملا بہت پریشان ہیں چھوٹے نے پڑھنا بلکل چھوڑ دیا ہے۔۔ سارا سارا دن باہر گھومتا رہتا ہے۔۔ ابا کمزور ہوگئے ہیں اُسکے پیچھے پیچھے نہیں بھاگ سکتے۔۔ اتنی بے بسی محسوس ہورہی ہے۔۔ اماں کو ضرورت ہو گی میری۔۔ میں ہوتا تو کان کھینچ لیتا اُسکے ۔۔ باہر بھی نکل کر دیکھتا کہ کہاں گھومتا پھرتا ہے۔۔ اس وقت تو سمجھ کام ہی نہیں کررہی۔۔ اللہ اُسکی حفاظت کرے۔۔ کہیں وہ کسی بری صحبت میں نہ پڑجائے۔۔
ستمبر ۲۰
آج تو خوشی سے میرا بس نہیں چل رہا کیا کردوں۔۔ ابھی تک لکھتے ہوئے ہاتھ کانپ رہے ہیں۔ گھر میں ٹیلیفون لگ گیا۔۔ کتنے دن لگے اِس سب میں پھر اماں کا خط آیا اُس میں نمبر بھیجا تھا۔۔ آج میں نے چھ مہینے بعد اماں اور گڑیا کی آواز سنی۔۔ ایسا لگا جیسے وہ لوگ میرے سامنے ہی ہیں۔۔ اللہ کا شکر ہے کہ اب خط کے انتظار میں مرنا تو نہیں پڑے گا جب بھی دل چاہے گا جا کر بات کر لوں گا۔۔
نومبر ۹
اماں کا لمبا چوڑا خط ملا۔۔۔ گھر کی ضرورتوں کی لمبی فہرست ہے۔۔ گڑیا نے بھی اِس بار بہت سی فرمائشیں کر ڈالیں۔۔ اچانک ہی بہت سا بوجھ کندھوں پر بڑھ گیا ہے۔۔ سوچا تھا اِس بار تھوڑے پیسے بچا کر کپڑے لوں گا۔۔ ویسے بھی یہاں جاڑا شروع ہونے والا ہے۔۔ مزدور آدمی ہوں تو شکر ہے دفتر میں وردی ہی چلتی ہے۔۔ لیکن اُسکے علاوہ تو کچھ کپڑے چاہیے تھے۔۔ خیر۔۔ اکرم نے بتایا کہ پاکستان کی طرح یہاں بھی لُنڈہ بازار ہوتے ہیں جہاں سے کم قیمت میں رئیسوں کی اُترن مل جاتی ہے۔۔ اِس بار میں اور پیسے بچا کر اماں اور گڑیا کو بھیج دوں گا۔۔
دسمبر ۱
آج جب اکرم نے مجھے پیسے بھیجتے ہوئے دیکھا تو بڑی عجیب سی بات کہی۔۔ مجھے اُسکی بات اوّل تو بری لگی تھی۔۔ لیکن میں نے اُسے کچھ کہا نہیں ۔۔ اب سوچ رہا ہوں کہ اُسکی بات میں کس حد تک گہرائی ہے۔۔ اُس نے کہا کہ اگر میں یونہی ضرورتیں مار مار کے پیسے بھیجتا رہوں گا تو وہاں اسی رفتار سے ضرورتیں بڑھتی رہیں گی۔۔ ایسا کیسے ہوسکتا ہے۔۔ ؟ میں نے اُسے حیرت سے دیکھا تو وہ بولا کہ بھائی تم کونسا یہاں پیسوں میں کھیلتے ہو۔۔ لیکن جس طرح تم گھر والوں کو بھیجتے ہو پاکستان میں سب کو یہی لگتا ہوگا۔۔ میں نے اُسے کچھ نہیں کہا۔۔ میں یہاں اسی لئے تو آیا تھا کہ اُنہیں پیسہ کما کے دوں۔۔ میں رکھ کر کیا کروں گا۔۔ ہر شخص کی اپنی سوچ ہے۔۔ اکرم کی سوچ پر تعجب ہے۔۔
سال ۱۹۸۶
فروری ۳
اس ملک کے سارے موسم دیکھ لئے ہیں ۔۔ ایک سال ہونے والا ہے یہاں رہتے ہوئے۔۔ کتنا بدل گیا ہوں ایک سال میں۔۔ اماں تو شاید اب مجھے پہچانیں بھی نہیں۔۔ میں اب دو شفٹوں میں کام کرتا ہوں ۔۔ بیچ میں تھوڑا وقفہ ملتا ہے لیکن۔۔ دن کا زیادہ تر حصہ مزدوری میں ہی نکل جاتا ہے۔۔ منیجر نے بولا ہے کہ اگر تمہاری کارگردگی ایسی ہی اچھی رہی تو پانچ سال کے بجائے تین سال کے بعد ایک چھٹی دلوا دوں گا۔۔ پھر میں شاید پاکستان جا سکوں۔۔
مارچ ۸
اب تو کئی کئی دن تک فون کرنے کی فرصت نہیں ملتی جس وقت میں فارغ ہوتا ہوں اُس وقت تک گھر میں سب سو چکے ہوتے ہیں۔۔ پرسوں اماں سے بات ہوئی تو اُنہوں کہا کہ ابا ٹھیک نہیں ہیں ۔ ڈاکٹر نے کہا ہے کہ دل کا مکمل معائنہ کروائیں۔۔ اماں اور چھوٹو ان کا خیال رکھ رہے ہیں۔۔ ابا کو بستر پر دیکھ کر چھوٹو بھی سنجیدہ ہوگیا ہے اور اماں کی بات بھی سننے لگا ہے۔۔ بس اب وہ ایسا ہی رہے اور ابا کی صحت جلد ٹھیک ہوجائے
جون ۲۲
دو دن سے میں ہوش میں نہیں تھا ۔۔ مجھے لگ رہا ہے پوری دنیا تہ و بالا ہوکر رہ گئی ہے۔۔ پرسوں اماں کا خط ملا کہ ابا کی حالت بہت زیادہ خراب ہے۔۔ بھاگا بھاگا ایس ٹی ڈی تک پہنچا۔۔ اور فون کیا تو پتہ چلا کہ ابا نہیں رہے۔۔ ایک منٹ کو لگا کہ میری بھی روح پرواز کر گئی ہے۔۔ مگر میں ابھی اِس دوزخ میں جلنے کے لئے زندہ چھوڑ دیا گیا ہوں۔۔ کہ اُن کے آخری وقت میں میَں اُنکے ساتھ نہیں تھا۔۔ ابا کہ لحد کی مٹی بھی نہ چھو سکا۔۔ میں بکھر گیا ہوں۔۔ میرے بھیجے ہوئے نوٹ میری کمی پوری نہیں کرپائے۔۔ ابا چلے گئے۔۔اور مجھے ہمیشہ کےلئے اِس ادھورے پن کے ساتھ چھوڑ گئے۔۔
اگست۲۱
یہاں اب دل نہیں لگتا، گھر پر زیادہ زیادہ فون کرتا ہوں۔۔ اماں کم کم بولتی ہیں۔۔ میرا دل چاہ رہا ہے کہ میں وہیں چلا جاؤں ۔۔ ہر چیز سے دل اُچاٹ سا ہونے لگا ہے۔
۳۰ اکتوبر
اماں کی عدّت ختم ہوگئی۔۔ آج میں نے اماں سے کہا کہ میں واپس آجاؤں گا تو اُنہوں نے مجھے بہت ڈانٹا کہنے لگیں کہ میں پاگل ہوگیا ہوں۔۔ گھر میں ابھی بہت مسئلے ہیں ۔۔ چھوٹو یونیورسٹی جاتا ہے۔۔ گڑیا کی شادی بھی کرنی ہے۔۔ گھر کی اوپر کی منزل بھی بنانی ہے ۔۔ میں شاید اتنا خود غرض نہیں ہوسکتا کہ اماں کو اتنی پریشانیوں کے ساتھ ایک پیسوں کا مسئلہ بھی دے دوں۔۔ یہیں رہ لوں گا کچھ اور عرصے۔۔ پتہ نہیں اللہ نے میرے لئے کیا لکھا ہے۔۔
۱۵ نومبر
کمپنی کا منیجر بدل گیا۔۔۔ پرانے منیجر کو کہیں اور نوکری مل گئی۔۔ نیا منیجر بہت غصیلہ ہے۔۔ بات بات پر مزدوروں کی عزت اُتار دیتا ہے۔۔ شکر ہے اب تک میری باری نہیں آئی۔۔ اکرم نے شادی کرلی۔۔ پتہ نہیں کیا ہوگیا ہے اُسے۔۔ نہ گھر والوں کو بتایا نہ کچھ۔۔ کہتا ہے گھر والے تو مجھے نوٹ چھاپنے کی مشین سمجھ کر سارے عمر یہیں تنہا کمانے کو چھوڑ دیتے ۔۔ اور خود وہاں میرے پیسے سے سب اپنی زندگی سنوارتے۔۔ کیسی عجیب سی سوچ ہے اُسکی۔۔ میرے اِس چھوٹے سے کمرے میں اکرم کے جانے کے بعد۔۔ ۲ اور ساتھی آگئے ہیں۔۔ مگر ان ہی سب چکروں میں ۔۔میَں نے کتنے ہی دن اماں کو فون نہیں کیا ۔۔۔ آج اماں کا بڑا طویل خط ملا۔۔ سلیم ماموں نے اپنے بیٹے کے لئے گڑیا کا رشتہ مانگ لیا۔۔ نعمان میرا ہی ہم عمر ہے۔۔ سن کر سکون کا احساس ہوا کہ گڑیا کہ لئے اچھا گھر اور اچھا بَر مل گیا ہے۔۔ لیکن اماں نے جہیز میں دینے کی چیزوں کا بڑی تشویش سے ذکر کیا ہے۔۔ کوشش کروں گا گڑیا کی شادی میں کسی چیز کی کمی نہ ہو۔۔ اللہ اُس کے نصیب اچھے کرے
سال ۱۹۸۷
۲۲ جنوری
لگتا ہے زندگی اِسی طرح گھر کے بارے میں ڈائری لکھتے لکھتے گزر جائے گی۔۔ جب سے اماں نے گڑیا کے رشتے کا بتایا ہے ایک ایک روپیہ جوڑ رہا ہوں۔۔ میرا منیجر کسی کو زیادہ منہ نہیں لگاتا مگر وہ بھی مجھے دو شفٹ کرتے دیکھ کر بولا کہ اتنی مشقت کر کہ کیوں خود کو جلا رہا ہے۔۔ کیا کوئی دکھ ہے جو جینے نہیں دیتا ۔۔ میں نے کہا صاحب غمِ روزگار سے بڑا بھی کوئی غم ہوگا۔۔ وہ بولا مانتا ہوں۔۔مگر اس غم کو اپنے لئے آگ مت بنا۔۔ جھلس جائےگا۔۔
میں نے کہا آگ تو پاک بھی کردیتی ہے نا؟ جیسے پانی نہ ہونے پر آگ سے تیمم کر لیتے ہیں بس میری قسمت بھی ایسی ہی ہے۔۔ میرے پاس پانی جیسی آسائش نہیں ہے کہ دھل کر صاف ستھرا ہوجاؤں۔۔ مجھے اِس آگ میں جل کر ہی پاک ہونا ہے۔۔ پتہ نہیں میں نے یہ سب کس دھن میں کہہ دیا شاید کسی نے پہلی بار مجھ سے میرے بارے میں پوچھا تھا اِسلئے۔۔ کہیں اُسے یہ نہ لگا ہو کہ میں شکوہ کررہا تھا۔۔ بخدا میری ایسی کوئی نیت نہیں۔۔ بس میری زندگی کا سچ ہی یہ ہے۔۔
۱۳ مارچ
جب سے پردیس آیا ہوں جانے کتنی بار رویا ہوں مگر آج جو میں نے محسوس کیا ہے اُسکے لئے دنیا میں شاید کوئی لفظ نہیں بنے۔۔ سلیم ماموں چاہتے ہیں اِس جون میں گڑیا کی رخصتی کرلیں۔۔ آج اماں کو فون کیا تو اُنہوں پوچھا کہ میں سب تیاریوں کے لئے اتنی رقم بھیج سکتا ہوں یا نہیں۔۔ میں نے اماں سے بولا کہ مجھے جون میں چھٹی نہیں مل سکتی۔۔ تو اماں نے کہہ دیا کہ کوئی بات نہیں۔۔ بس شادی میں کوئی کمی نہ ہو ۔۔ کہہ رہی تھیں ماموں کو بہت امید ہے کہ تُو اپنی بہن کی شادی بہت شاندار کرے گا۔۔ میں نے پھر احساس دلایا کہ میرے بغیر وہ شادی کیسے کرسکتی ہیں تو اُنہوں نے کہا کہ پیسہ ہو تو سب ہوجاتا ہے۔۔ اور باقی باہر کی بھاگ دوڑ میں چھوٹُو مدد کر ہی دے گا۔۔ مجھے معلوم نہیں تھا کہ پیسے میں اتنی طاقت ہے کہ وہ ایک بھائی کا نعم البدل بھی بن سکتا ہے۔۔ گڑیا کی شادی میں میری حیثیت صرف ایک بنک کی سے ہے۔۔
۳۰ جون
آج گڑیا رخصت ہوگئی ہوگی۔۔ یقیناً کوئی کمی نہیں رہی ہوگی۔۔ دو ڈھائی سال میں جوڑی گئی سب رقم میں نے اماں کو بھیج دی تھی۔ گڑیا کے سب ارمان پورے ہوگئے ہونگے۔۔ آنکھیں بار بار بھیگ رہی ہیں ۔۔ دل ڈوب ڈوب کے اُبھر رہا ہے۔۔ اکلوتی بہن کو دلہن بنے نہیں دیکھ سکا۔۔ بہت پیار کرتا ہوں اُس سے۔۔ گھر میں ہوتا تھا تو کتنا لڑتا تھا اُس سے لیکن اُس کے کسی کام کو کبھی منع نہیں کیا۔۔ اُسکی ناراضگی میں کبھی تصور میں بھی برداشت نہیں کرسکتا تھا۔۔ تب کسے پتہ تھا کہ میں گڑیا کی شادی تک میں شریک نہیں ہو پاؤں گا۔۔ کاش وہاں ہوتا۔۔ سب کے چہروں کی خوشی دیکھ پاتا اُس خوشی کا حصہ بن پاتا۔۔ میرے نصیب میں یہ خوشی کیوں نہیں لکھی تھی۔۔؟
۵ دسمبر
پچھلے مہینے مینجر چلا گیا۔۔کہتا تھا عمر ہوگئی ہے بیماریاں بھی کئی لگ گئیں اب دل نہیں چاہتا کہ کام کروں۔۔ اور جاتے جاتے ٹھیکیداری کے لئے میرا نام تجویز کرگیا۔۔ میں مزدور سے مینیجر بن گیا ہوں۔۔ تنخواہ بھی بڑھ گئی ہے۔۔ بہت عرصے بعد کچھ اچھا محسوس ہوا۔
سال ۱۹۸۸
۲۳ اپریل
گڑیا کا بیٹا ہوا ہے۔۔ خوشی سے پیر زمین پر نہیں ٹک رہے۔۔ چھوٹی سی گڑیا میری نظروں میں گھوم گئی۔۔ چھوٹو نے اپنا کام شروع کردیا۔۔ بہت خوشی ہوئی۔۔ اماں نے اچھی بچت کی سارے فرائض کتنے اچھے سے پورے ہوگئے ہیں۔۔ ایک ہی دن میں دو خوش خبریاں مل گئیں۔۔ اللہ ہمارے گھر کو ایسے ہی شاد آباد رکھے۔۔
۲ مئ
اماں نے چھوٹو کا رشتہ پکا کردیا۔۔ کہہ رہی تھیں ضد پکڑ کر بیٹھ گیا تھا۔۔ تین دن تک کچھ کھایا پیا بھی نہیں۔۔
اُسکو اپنے دوست کی بہن پسند آگئی تھی۔۔ اماں کی آواز میں عجیب سی شرمندگی تھی۔۔ اچھا کیا اُنہوں نے شادی تو کرنی ہی تھی اُسکی۔۔ اچھا ہوا کہ اُس نے کوئی غلط قدم نہیں اُٹھایا۔
۱ جولائی
آج اماں کو فون کیا۔۔ اماں نے بتایا کہ کل چھوٹے کا ولیمہ ہوگیا۔۔ میں نے بدقت مبارک باد دے کر فون رکھ دیا۔۔
۹ اگست
اماں بہت رو رہی تھیں۔۔ کہہ رہی تھیں کہ نعمان اور ماموں کی مشترکہ دکان میں آگ لگ گئی ہے۔۔ فاقوں کی نوبت آگئی ہے۔۔ گڑیا اپنے چند ماہ کے بیٹے کے ساتھ گھر آگئی ہے۔ گڑیا نے بھی بات کی اُس کی بھی ہچکیاں بندھ گئیں۔۔ کہہ رہی تھی نعمان صدمہ برداشت نہیں کرپا رہے ہیں پاگلوں جیسی حالت ہوگئی ہے۔ اُس نے مجھے کہا ہے کہ میں کچھ کروں۔۔ لیکن میں نے ابھی اُسکے بچے کی پیدائش پر خوشی خوشی میں اپنے جمع شدہ پیسوں میں سے کچھ زیادہ ہی خرچ کردئے تھے۔۔ میں اپنے مالک سے بات کروں گا۔۔ کاش کہ کوئی وسیلہ بن جائے۔۔
۱۹ اگست
میری بہترین کارگردگی پر مجھے کمپنی سے نقد انعام ملا۔۔ مجھے تو یقین ہی نہیں آرہا۔۔ شاید یہ پیسے گڑیا کے لئے ہی آئے ہیں۔۔ لیکن یہ بھی اتنے نہیں ہیں۔۔ میں نے مالک کو سب صورتحال بتائی۔۔ اُس نے کہا ہے کہ وہ کمپنی کے اکاؤنٹ سے ایڈوانس میں تھوڑی تنخواہ دلوا دے گا۔ لیکن اُسکے لئے مجھے مزید ۵ سال کا عہدنامہ سائن کرنا ہوگا جس کے تحت میں متواتر ۵ سال تک پاکستان نہیں جا پاؤں گا۔ پاکستان میں ویسے بھی مجھ سے زیادہ اِن نوٹوں کی ہے ضرورت ہے۔۔ میں نے معاہدے کے لئے حامی بھر لی۔۔ میرا پاسپورٹ مزید ۵ سال کمپنی کے پاس رہے گا۔۔ میں نے واپسی پر ہی پیسے پاکستان روانہ کردئے ۔۔ آج اماں کو فون کر کے پوچھا۔۔ کہہ رہی تھیں کہ گڑیا گھر چلی گئی اور مجھے بہت دعائیں دے رہی تھی۔۔ میں دعاؤں کا کیا کروں گا۔۔ وہ خوش ہے بس کافی ہے۔
سال ۱۹۹۳
جس وقت جہاز کراچی میں اُترا فجر کی اذان ہو رہی تھی۔۔ ۸ سال پہلے پردیس جا کر جو اجنبیت سی محسوس ہوئی تھی وہ بے رخی آج کراچی کی فضاؑ میں محسوس ہوئی۔۔ سب بدل سا گیا ہے۔۔
گھر پر اُترا ہوں تو گھر کو پہچان نہیں سکا۔۔ یقین نہیں آیا کہ یہ جو شکل اِس گھر نے بدلی ہے یہ میرے دن رات کی محنت ہے۔۔ ڈور بیل کے پاس رُکا تو ٹھٹک کر رہ گیا۔۔ نام کی تختی پر جلی حروف میں چھوٹو نے اپنا نام لکھوایا ہوا تھا۔۔
دروازہ کھلا تو حیرت کا ایک اور عجیب جہاں تھا۔۔ اُن سب کے لئے یہ ایک سرپرائز تھا۔۔ اماں پہلے تو مجھ سے لپٹ کر بہت روئیں۔۔ لیکن میں اپنے آنسو خشک کر آیا تھا۔۔ میں تنہائی میں اتنا رو لیا تھا کہ رونے کے لئے نہ آنسو بچے نہ دکھ۔۔
آہستہ آہستہ احساس ہوا کہ میرے لئے اب وہاں اور بھی زیادہ کچھ نہیں بچا تھا۔۔ سب کی اپنی دنیا تھی۔۔ جس میں میری کوئی جگہ نہیں تھی۔۔ اور میں پردیس واپس آگیا۔۔
