ہال تالیوں سے گونج رہا تھا، خواتین کا عالمی دن تھا اور کالج میں ایک بہت بڑا سیمنار منعقد ہوا تھا، گل رخ زاہد کالج میں پڑھائی کے ساتھ ساتھ تمام سرگرمیوں بھی نہ صرف آگے تھی بلکہ اوّل تھی، کالج کا کوئی پروگرام اُسکے بغیر مکمل نہیں ہوتا تھا۔ ڈین سے لے کر کالج کے مالی تک سب اُسے جانتے تھے۔۔
وہ ابھی ابھی اپنی میزبانی کے فرائض پورے کر کے اسٹیج کو پینل ڈسکشن کے پینلسٹ کے لئے چھوڑ آئی تھی ۔۔ ڈسکشن شروع ہوا ساس بہو کے جھگڑوں سے لے کر تیزابی حملوں تک ہر چیز پر بات ہوئی۔ پینل میں عورتوں کے حقوق کی ایک علمبردار ، ایک اسسٹنٹ کمشنر ایک پروفیسر ایک خاتون صحافی شامل تھیں۔۔
سوال جواب کا سلسلہ شروع ہوا۔ ایک مہمان خاتون نے اسسٹنٹ کمشنر پوچھا
ہمارے محلے میں ایک عورت کا شوہر اُسکو مارتا پیٹتا تھا، اس نے گھر چھوڑ دیا اور ایف آئی آر کٹوائی ۔۔ شوہر نے پولیس والوں کے سامنے معافی مانگی، قسمیں کھائیں کہ سدھر گیا ہے، بیوی مان گئی اور گھر چل دی۔ اگلے دن پتہ چلا کہ شوہر نے بیوی کا قتل کردیا۔ ایسے معاملوں میں پولیس کیا پروٹیکشن دے گی؟
اُنہوں نے رسانیت ہے کہا، دیکھیں پولیس کا کام تو بس اتنا تھا کہ اُنہوں نے ایف آئی آر کاٹی اور شوہر کو طلب کیا، اب ہمارے یہاں بیویاں بھی تو فوراً مان جاتی ہیں ۔۔ پولیس اُنکے گھر تک تو ساتھ نہیں جا سکتی۔
ہال میں خاموشی ہوگئی۔
اینی اَدَر کوئسچن؟ اسسٹنٹ کمشنر نے پوچھا
گل رخ نے ہاتھ کھڑا کیا
یس؟ اسسٹنٹ کمشنر کی آنکھوں میں تعجب ابھرا
میم! جو شوہر اپنی بیوی کو مارے اور اُسکے حقوق تلف کرے تو بیوی ایف آئی آر کٹوا سکتی ہے۔ لیکن اگر کوئی باپ اپنی بیٹی کو اُسکے جائز حقوق نہ دے تو اُسکے لئے کیا سزا ہے۔ گل نے سوال ختم کر کے آس پاس دیکھا۔ سب اُس ہی کو دیکھ رہے تھے۔ ہال میں خاموشی تھی۔ اسسٹنٹ کمشنر بغیر پلکیں جھپکے اُسے دیکھ رہی تھیں شاید وہ اُسکے سوال کی گہرائی کو جاننا چاہتی تھیں
قانون کی نظر میں اِس مقدس تعلق کے استحصال کی کوئی دفع ہو یا نہیں میرے نزدیک ایسے شخص کی جگہ دنیا اور آخرت میں تختہء دار ہے۔
اسسٹنٹ کمشنراسٹیج سے اُتر گئیں۔ ہال ایک بار پھر تالیوں سے گونج رہا تھا۔ اور گل کی آنکھوں میں آنسو بھر گئے تھے۔ دار پر تو ہم بھی لٹک ہی رہے ہیں! اُس نے دل میں سوچا
ہر انسان کی زندگی تختہء دار ہے یا شاید گل رخ کے آس پاس صورتحال یہی تھی، طیبہ کی زندگی اُسکی مجبوریوں اور اسکے ساتھ ہونے والی حق تلفی کی داستان تھی، وہ اُنیس سال سے ایک اَن دیکھی سوُلی پر لٹک رہی تھی۔ نہ جان نکلتی تھی نہ وہ اس عذاب سے نکلتی تھی، زاہد علی کے لئے اُسکے نفس کی ایک اندھی خواہش سزا بن گئی تھی۔ وہ اپنے معزور بیٹے کو اُسکے پیروں پر کھڑا کرنے کے لئے کچھ بھی کر سکتا تھا مگر یہ اُسکے ہاتھ میں نہیں اللہ کے اختیار میں تھا، اُسکی خواہش الاؤ بن کر اُس کے آس پاس جل رہی تھی اور اِسکی تپش سے گل رخ اور ماہ رخ کا بچپن، اُنکی زندگی اور اُنکی شخصیت جھلس رہی تھی۔ جس دن سے مرتضیٰ پیدا ہوا تھا، زاہد علی کے لئے گل رخ اور ماہ رخ مزید ناقابلِ برداشت ہوگئی تھیں، ڈاکٹرز نے امید دلائی تھی کہ یہ معزوری ایک قسم کی کمزوری ہے جو کہ مستقل علاج سے کسی حد تک صحیح ہوسکتی ہے، اور تب سے زاہد علی کی زندگی کا مقصد مرتضیٰ کی مکمل صحت یابی تھی۔ کچھ لوگ دبے لفظوں میں یہ کہتے تھے کہ اللہ نے اُسے طیبّہ کے ساتھ کئے گئے ظلم کا بدلہ دیا ہے۔ کوئی طیبہّ سے پوچھتا کہ معزور اولاد اُسکے لئے بھی سزا سے کم تو نہیں۔ اُسکی دعائیں لمبی ہوگئی تھیں ، اُسے یاد نہیں تھا کہ وہ آخری بار سکون سے کب سوئی تھی، کونسا دن بغیر روئے گزارا تھا۔ اُسکی زندگی میں اور زاہد علی کے گھر میں مسکرانے کی کوئی وجہ نہیں تھی۔
جہاں گھر اور خاندان کے باقی بچے ماں باپ کی محبت اور شفقت کے سائے میں پل رہے تھے وہیں گل رخ اور ماہ رخ کو ہر وقت نفرتوں کا سامنا تھا، باپ کی نفرت کے پیشِ نظر باقی خاندان والوں نے بھی اُن دونوں کو تکلیف پہنچانے میں کوئی کسر نہیں چھوڑی ۔۔ وہ یہی سنُتے بڑی ہوئی تھیں کہ وہ مرتضیٰ کے نصیب کا کھاتی ہیں، کیونکہ اگر وہ نہیں ہوتا تو اُنکی ماں کو اُن دونوں کو پیدا کرنے کے جرم میں طلاق دے دی گئی ہوتی، بہت بچپن میں یہ باتیں سمجھ نہیں آتی تھیں اور جب سمجھ آنے لگیں تو اِن سب کی اتنی عادت ہوگئی تھی کہ فرق نہیں پڑتا تھا۔ زاہد علی ان پر کچھ خرچ نہیں کرتا تھا ، طیبہ کی آپا اپنی بچیوں کے پرانے کپڑے انہیں دے جاتیں ، گھر کے باقی بچوں کے مقابلے طیبہ کے بچوں کا رہن سہن الگ تھا جو نہ صرف اُسکی خود اعتمادی کو ضرب لگا رہا تھا، بلکہ بچوں کی شخصیت بھی بہت حد تک متاثر کرتا تھا۔ باپ محبت نہ کرے تو باپ کے گھر والے کیوں کریں ، اسی وجہ سے وہ خاندان کی التفات کی حقدار بھی نہیں بن سکیں اور ہمیشہ الگ تھلگ رکھی گئیں۔ صرف ایک جگہ یہ خاندان ساتھ تھا کیونکہ سب کے بچے ایک اسکول میں پڑھتے تھے، اور شاید اِسی لئے گل اور ماہ رخ کی اسکولنگ اچھے سے ہو گئی تھی۔ طیبہّ جب بھی رزلٹ ڈے پر اُن دونوں کے اسکول جاتی، ٹیچرز دونوں بچیوں کی شاندار کامیابی کا تذکرہ کر کے ایک بار ضرور پوچھتیں
’اور اِن دونوں کے فادر اِس بار بھی نہیں آئے‘
اُنہیں بہت ضروری کام تھا میں اُنہیں گھر جا کر بتاؤں گی تو بہت خوش ہونگے۔ طیبہ ہر سال یہی جواب دیتی لیکن گل رخ جانتی تھی کہ وہ کبھی خوش نہیں ہونگے اُنکے لئے گل رخ کا وجود کوئی معنی نہیں رکھتا تھا،
زاہد علی خود کو خدا سمجھتا تھا، اُسے لگتا تھا کہ طیبہ اور دونوں بچیوں کا نصیب، اُنکا رزق، اُنکی خوشیاں اُسکی مرضی کی محتاج ہیں، فرعون بھی ایسا ہی سمجھتا تھا۔۔ لیکن ہر فرعون کے لئے اللہ ایک موسیٰ بھیجتا ہے جسکے قتل کے فرعون ہزار منصوبے بنا لے مگر اللہ اُس ہی فرعون کے گھر میں اُس موسیٰ کو پروان چڑھاتا ہے، اور اُسکے مقابل لا کر کھڑا کردیتا ہے۔ گل رخ وہی موسیٰ تھی۔
زندگی گل رخ کی بھی مشکل ہی تھی مگر اللہ نے اُسکو اُن مشکلوں میں راستہ ڈھونڈنے والی بنایا۔۔ گرتی، سنبھلتی، ٹھوکریں، کھاتی اُسکو سب منظور تھا بس رکنا منظور نہیں تھا، بہت زیادہ ڈرانے سے بھی اکثر انسان نڈر ہوجاتا ہے ، گل رخ کے ساتھ بھی کچھ ایسا ہی ہوا تھا،
لیکن طیبہ کے لئے یہ مشکل تھا جس عورت نے ساری زندگی لوگوں کے خوف میں گزاری ہو وہ ایکدم اللہ پر توکل کر کے لوگوں کا مقابلہ کرنا نہیں سیکھ سکتی۔۔ لیکن اللہ نے یہ کام بھی گل رخ کے ہاتھوں ہی کروانا تھا۔
میں پڑھائی نہیں چھوڑوں گی۔ پڑھائی چھوڑ دی تو کیا کروں گی۔ میرے سب ٹیچرز کہتے ہیں میں بہت آگے جا سکتی ہوں! اُس نے طیبہ سے کہا
اُس نے گورنمنٹ کالج سے بارھویں کا امتحان پاس کرکے اندازہ کرلیا تھا کہ
اُسکی مزید تعلیم پر زاہد علی چند ہزار بھی نہیں خرچ کرنا چاہتا۔ بارھویں تک بھی وہ اپنی چچا زاد کے طفیل آگئی تھی جسکو اکیلے کالج جانے میں مسئلہ تھا تو چچا نے تجویز کیا کہ وہ اور گل اکھٹے ہی جایا کریں اور اِس طرح گل کا ایڈمشن ہوگیا یا یوں کہہ لیں کہ اللہ نے یہ صورتحال بنا کر اُسکا ایڈمشن کروایا، اب چونکہ اُس چچا زاد کو پڑھائی سے کوئی دلچسپی نہیں تو گل کو یہ محاذ سَر کرنا تھا۔
اُس نے گورنمنٹ کالج سے بارھویں کا امتحان پاس کرکے اندازہ کرلیا تھا کہ
اُسکی مزید تعلیم پر زاہد علی چند ہزار بھی نہیں خرچ کرنا چاہتا۔ بارھویں تک بھی وہ اپنی چچا زاد کے طفیل آگئی تھی جسکو اکیلے کالج جانے میں مسئلہ تھا تو چچا نے تجویز کیا کہ وہ اور گل اکھٹے ہی جایا کریں اور اِس طرح گل کا ایڈمشن ہوگیا یا یوں کہہ لیں کہ اللہ نے یہ صورتحال بنا کر اُسکا ایڈمشن کروایا، اب چونکہ اُس چچا زاد کو پڑھائی سے کوئی دلچسپی نہیں تو گل کو یہ محاذ سَر کرنا تھا۔
تم اپنے باپ سے پوچھ لو۔ طیبہ نے صاف کہا
ٹھیک ہے۔ گل رخ نے بھی ٹھان لی تھی
میں نے یونیورسٹی میں ایڈمشن لینا ہے۔ اُس نے رات کے کھانے کے وقت زاہد علی سے بولا
میرے پاس تمہارے لئے فضول پیسے نہیں ہیں۔ زاہد علی نے بھی صاف جواب دیا
میں نوکری کر لوں گی۔ گل رخ سوچ کر بیٹھی تھی
تم صرف سڑکوں پر بھیک مانگنے کے قابل ہو؟ مانگو گی؟ زاہد علی نے اپنی ازلی نفرت کا اظہار کیا
جس لڑکی کا پاب آپکے جیسا ہو اُسے اپنے جائز حقوق کے لئے یہ بھی کرنا پڑتا ہوگا۔ اُس نے ترکی بہ ترکی جواب دیا۔
زاہد علی نے غصے میں پلیٹ زمین پر پھینکی اور تھپّڑوں سے گل رخ کے گال سُجا دیے۔ طیبہ اُسے بچانے کے لئے آگے بڑھی تو زاہد علی گل رخ کو چھوڑ کر طیبہ پر آنکھیں نکال کر کہا۔
اگر تم نے اسکی طرف داری کی تو دو منٹ میں فارغ کردوں گا۔ زاہد علی نے چٹکیاں بجا کر بولا
ابھی کرو۔ پیچھے سے گل رخ کی آواز آئی
کیا؟ ۔ زاہد علی نے پلٹ کر پوچھا
ابھی کے ابھی میری ماں کو فارغ کرو! ۔ گل رخ نے کہا، طیبہ کی سانس ٹھہر گئی۔
زاہد علی کے پیروں کے نیچے سے زمین تو نکل ہی گئی تھی کچھ اور سمجھ نہیں آیا تو اُس نے جواب میں مغلظات بکنی شروع کردی۔
گل رخ اپنی بات پر قائم رہی۔
اگر طلاق دینی ہی ہے تو اب اِس بیس سال پرانی دھمکی کو پورا کرو ، ابھی کے ابھی طلاق لکھ کر دو تاکہ ہم یہ گھر چھوڑ کر جائیں اور اپنی مرضی سے جئیں۔
اور زاہد علی کی بیس سال پرانی دھمکی کی حیثیت آج سب پر کھل گئی، ’’یہ آزادی تو میں تمہاری ماں کو کبھی نہیں دوں گا کہ وہ اپنی مرضی اور سکون سے رہے‘‘ کہہ کر زاہد علی کمرے سے نکل گیا۔
سب اپنی اپنی جگہ پر منجمد تھے۔
تمہارا دماغ تو خراب نہیں ہے؟ اگر ابّو واقعی امی کو طلاق دے دیتے۔ تم اتنی خودغرض ہو کہ اپنی پڑھائی کے اِس وقتی شوق کے لئے کچھ بھی کر گزرو گی۔ ماہ رخ نے شدید غصے میں گل کو سنانا شروع کردیا۔
وہ ایسا کرتے نہیں کیونکہ اُنہوں نے اس لفظ کو امی کے لئے ایک خوف بنا کر رکھا ہوا تھا، اگر وہ یہ کرنا چاہتے تو بہت پہلے کردیتے، یہ مردوں کی اُس کٹیگری سے تعلق رکھتے ہیں جو عورت کو ساری زندگی اپنا محتاج بنا کر رکھنا چاہتے ہیں، طلاق دے کر کبھی آزاد نہیں کرتے۔ گل نے آرام سے کہا
ماہ رخ لاجواب ہوگئی تھی اور طیبہ اب تک سکتے کی سی حالت میں تھی۔ اُس نے اپنی ساری زندگی ایک ایسے خوف کی بھینٹ چڑھا دی جسکی کوئی حقیقت نہیں تھی! اُس نے گل رخ جیسی ہمت کیوں نہیں کی؟ اُسکا کتنا کچھ ضائع ہوگیا تھا۔۔ ایک دکھ تھا جو اُسکے جسم کے ہر پور میں اُتر رہا تھا۔ اب وہ کیا کرے یہی سوچ رہی تھی کہ گل نے آ کر اُسکا ہاتھ پکڑ لیا۔
امی آپ بھی مجھ سے ناراض ہیں کیا؟ میں نے کچھ غلط نہیں کیا۔
طیبہ نے اُسکے چہرے کو دیکھا، ابھی بہت دیر نہیں ہوئی تھی، یہی وہ لڑکی تھی جس نے پہلی بار طیبہ کو خود سے محبت کرنا سکھایا تھا، اِس ہی لڑکی نے اُسے یہ احساس دیا تھا کہ وہ بھی کسی کے لئے ضروری ہے، اور آج اِس ہی لڑکی نے طیبہ کو دوبارہ زندہ کردیا ہے، طیبہ کو اِس کی محبت کا حق پورا کرنا تھا۔ ماں اپنی اولاد کو کتنا کچھ دیتی ہے۔ کوئی شے اُسکا بدل نہیں ہوسکتی مگر کبھی کبھی اولاد ماں کو ایسا کچھ دے دیتی ہے کہ جس کا تشکر کوئی الفاظ نہیں ہوسکتے۔ ماں کو یہ اعزاز ہے کہ وہ اولاد کو زندگی دیتی ہے لیکن آج گل رخ نے اُسے زندگی کے کچھ لمحے دیئے تھے۔
اگلے دن سے گل نے نوکری ڈھونڈنی شروع کردی تھی، زاہد علی کچھ نہیں کہہ سکا تھا کیونکہ وہ جانتا تھا کہ گل نہیں ڈرے گی، وہ گل سے نظر نہیں ملاتا تھا، وہ جان گیا تھا کہ گل اُسے اور اُسکے اندر چھپے ایک ڈرپوک مفاد پرست کو پہچان گئی ہے جو صرف کمزوروں پر زور چلا سکتا ہے۔ اور گل رخ کمزور نہیں تھی۔
یونیورسٹی شروع ہوگئی تھی اور گل رخ نے ایک ٹیوشن اکیڈمی میں نوکری بھی حاصل کرلی تھی، جس کے بعد ایک سرکاری ینیورسٹی کی فیس ادا کرنا کچھ مشکل نہیں تھا، مشکل تھا تو بس یہ وقت کاٹنا، صبح سے دوپہر ڈھلے تک وہ یونیورسٹی میں رہتی اور پھر اکیڈمی چلی جاتی۔
آج بہت سال بعد۔۔ گل رخ ایک پڑھی لکھی اور کامیاب عورت ہے وہ کوئی اسسٹنٹ کمشنر نہیں بنی، لاکھوں نہیں کمایا۔۔ لیکن وہ جو بھی بنی اُس میں اُس نے عزت کمائی، اثر و رسوخ حاصل کیا، لوگوں کی خدمت کی ، مدد کی، پیار کیا، اور ہر بار اعزاز و اکرام ملنے پر اللہ کا بہت شکر ادا کیا کہ اُس نے گل رخ کی زندگی کو کسی کے شر کی بھینٹ نہیں چڑھنے دیا۔ اُسکو یہ سب اُسکی محنت کے صلے میں ملا ہے۔ آج جب لوگ اُسے دیکھ کر کہتے ہیں کہ آپ کے باپ کو تو بہت فخر ہوگا آپ پر۔۔ کاش ہماری بیٹی بھی گل رخ جیسی ہو، پتہ نہیں کیوں دل میں ایک پھانس سی چبھتی ہے۔ زاہد علی کی توجہ گل رخ کی خواہشوں میں کہیں نہیں تھی۔ اور اب بھی نہیں ہے۔ نہ اُس نے کچھ بھی اُسے نیچا دکھانے کے لئے کیا،
اُس نے مشکلوں سے ہارنے کے بجائے اُنہیں اپنی طاقت بنایا، ستارے
گردشوں میں آکر ٹوٹ بھی جائیں تو ستارے ہی رہتے ہیں۔
اُس نے بچپن سے جوانی تک صرف لعن طعن سُنی تھی لیکن آج جب وہ بولتی تھی تو لوگ سنتے رہ جاتے تھے، بڑے بڑے عالمی ادارے اُسکی معلومات اور اُسکی خود اعتمادی سے متاثر ہو کر اُسکو اپنے پروگرامز میں بلانے لگے تھے، ایک دنیا اُسکے نام سے واقف تھی، ملکی اور غیر ملکی اخباروں میں اُسکے لکھے ہوئے کالم دنیا بھر میں پڑھے جاتے تھے
اُس نے رونے کے بجائے، شکایت کے بجائے محنت کے راستے کا انتخاب کیا ۔۔ محنت کا راستہ آسان نہیں ہوتا لیکن اسکا پھل ایک ایسی زندگی ہوتی ہے جسکا کوئی عام انسان تصور نہیں کرسکتا، محنت انسان کو قابل اور خود اعتماد بناتی ہے ، اور اُسے اس لائق بناتی ہے کہ وہ اپنے اور دوسروں کے کام آسکے۔۔
اُس نے مشکلوں سے ہارنے کے بجائے اُنہیں اپنی طاقت بنایا، ستارے
گردشوں میں آکر ٹوٹ بھی جائیں تو ستارے ہی رہتے ہیں۔
اُس نے بچپن سے جوانی تک صرف لعن طعن سُنی تھی لیکن آج جب وہ بولتی تھی تو لوگ سنتے رہ جاتے تھے، بڑے بڑے عالمی ادارے اُسکی معلومات اور اُسکی خود اعتمادی سے متاثر ہو کر اُسکو اپنے پروگرامز میں بلانے لگے تھے، ایک دنیا اُسکے نام سے واقف تھی، ملکی اور غیر ملکی اخباروں میں اُسکے لکھے ہوئے کالم دنیا بھر میں پڑھے جاتے تھے
اُس نے رونے کے بجائے، شکایت کے بجائے محنت کے راستے کا انتخاب کیا ۔۔ محنت کا راستہ آسان نہیں ہوتا لیکن اسکا پھل ایک ایسی زندگی ہوتی ہے جسکا کوئی عام انسان تصور نہیں کرسکتا، محنت انسان کو قابل اور خود اعتماد بناتی ہے ، اور اُسے اس لائق بناتی ہے کہ وہ اپنے اور دوسروں کے کام آسکے۔۔
اور آج زاہد علی ایک کمزور بوڑھا ہے، جسکی زبان میں لرزہ آگیا ہے، لوگوں کو وہ وقت بھی یاد ہے جب وہ سزا کے طور پر اپنی بیٹیوں کو دو دو دن بھوکا رکھتا تھا۔ اور آج اُسکی بیٹیوں کے پاس سارے جہان کی نعمتیں ہیں۔ وہ لوگ جو اُسکے رعب و دبدبے کی وجہ سے بھول کر بھی اُسکی بیٹیوں سے پیار نہیں جتاتے تھے وہ اب زاہد علی پر ہنستے ہیں، جو لوگ یہ کہتے تھے کہ گل رخ اور ماہ رخ اپنے بھائی کے نصیب کا کھاتی ہیں وہ اب کہتے ہیں کہ زاہد علی بد نصیب ہے جو اپنی بیٹیوں کی حق تلفی کرتا رہا۔ اوراُسکے لئے یہ بھی ایک سزا ہی ہے کہ اُںکی کامیابیوں میں آج اُسکا کوئی کریڈٹ نہیں۔۔
No comments:
Post a Comment