پیاسی جھیلیں

  نوری  کی  خوبصورتی  پورے  گاؤں  میں  مشہور  تھی۔  کچھ  خاص  تھا  اُس  کے  نقوش  میں جو  اُسے  گاؤں  کی  دوسری  لڑکیوں  سے  مختلف  بناتا  تھا۔۔ گاؤں  میں  ویسے  بھی  کم  ہی  لوگ  تھے،  یہ  ماہی گیروں  کی  بستی  تھی  جو  ٹھٹّہ شہر سے  بھی  ۱۸  کلو میٹر  آگے  کلری  جھیل  کے  کنارے  آباد  تھی۔۔ گاؤں  کے  لوگوں  کے  درمیاں  نوری  کی  غیر معمولی  خوبصورتی  کے  چرچے نوری کے  باپ  کو  کافی  حد  تک پریشان  کر  چُکے  تھے۔ اِس  لئے  اُس  نے  نوری  کا  گھر  سے  نکلنا  بند  کردیا۔۔ نوری  نے  باپ  کے  ساتھ  کام  پہ  جانا  تو  چھوڑ  دیا  مگر  اُسکو  اِس  بات کا  شدید  دکھ  تھا۔۔ کلری  کا  نیلا پانی  اُسکی  زندگی  تھا۔  کلری  اُسکی  پہلی  محبت تھی، اُس  نے  آنکھ  کھولتے  ہی  چاروں  طرف  کلری  دیکھی  تھی اور  بچپن  سے اب  تک  وہ اپنے  پاب  کے  ساتھ  مچھلیاں  پکڑتی  رہی  تھی۔۔ وہ  عام  لڑکیوں کی  طرح  کھیل  کود  سے  رغبت نہیں  رکھتی  تھی،  اُسکی  زندگی  بس  کلری  کے  نیلے  پانی  سے  شروع  ہوتی  تھی اور  اُس  ہی  کے  کنارے  آکر  ٹھہر  جاتی  تھی۔۔ نوری  کے  خوبصورت  چہرے  کو  اداس  دیکھ  کر  باپ  سے  رہا  نہ گیا۔۔ آخر  اُسکی  خوبصورتی  کی  اُسکو  یہ  سزا  دینا  بھی  کہاں  جائز  تھا۔۔ مگر  اُسکو  اِس  طرح  چھوڑا  بھی  نہیں  جا  سکتا تھا۔۔ بہت  سوچ  بچار  کے  بعد  باپ  نے  نوری  کو  رات  کے  وقت  جھیل  پر جانے  کی اجازت  دے  دی۔۔ نوری  کے  لئے  یہ  بھی  بہت  تھا۔۔ سورج کے  چھپ  جانے  کے  بعد  بستی  میں کوئی  بھی  جھیل  کی  طرف  نہیں  جاتا  تھا۔۔ اُن  سب  کے  لئے جھیل  ایک  ذریعہ  معاش  تھی۔۔ اور  رات  جب  تاروں  کی  چادر  اوڑھ  لے  تو وہ  عام  ماہی گیر  جھیل  سے  کچھ  بھی  حاصل  کرنے  کی استطاعت  نہیں  رکھتے تھے۔۔ 

اور  نوری  کے  لئے  اُس  وقت  بھی  وہ  جھیل  سب  کچھ  تھی۔۔ اب  نوری  روزانہ  رات  کو  دیر  تک  جھیل  پر  بیٹھی  رہتی۔۔ کبھی  آسمان  پر  بچھے  تارے  دیکھتی اور  کبھی  جھیل  کے  شفاف  پانی  میں اُتر  جاتی۔۔

اُنڑ  قبیلے  کا  سلطان  جام  خیرالدین  جو تاریخ  کے  صحیفوں  میں  جام  تماچی  کے  نام  سے  معروف ہے  اُن  دنوں  جھیل  کی  طرف  آیا  کرتا  تھا۔ ایک  رات  کچھ  دوستوں  کے  ساتھ  گھومتے  پھرتے  شکار  کرتے  اُسکو  دن  ڈھلنے  کا  پتہ  ہی  نہ  لگا۔۔ اور  کشتی  چلاتے  چلاتے  وہ  اُس کنارے  پہنچ  گیا  جہاں نوری  جھیل میں  روشنی  بن  کر  اُتری  ہوئی  تھی۔۔

سلطان  جام  تماچی  کے  دن  و  رات رنگ  و نور کی بارش  میں  بھیگتے  تھے  مگر  نوری  جیسا حسن  نہ  کبھی  دیکھا  نہ  سُنا۔۔ اُسکے  جسم سے  روشنی  کی  کوئی  پھوار  نکل  کر  پوری  جھیل  کو  روشن  کررہی  تھی۔۔ سلطان  اُس ہی  گھڑی نوری کے  حسن کا  اسیر  ہوگیا تھا۔ اب  وہ  روز  روز  وہاں  آنے  لگا  تھا۔۔ کئی  روز وہ  چھپ  کر  نوری  کو  دیکھتا  رہا،  اور ایک دن  اپنی  ساری  ہمت  متجمع  کر  کے  نوری  کے سامنے  آگیا۔۔ جام  تماچی  کی  پرشدت  محبت  نے جلد ہی نوری  کو  اپنی خوش قسمتی  کا  یقین دلادیا۔۔ اور  اب  وہ  بھی  جام  تماچی  کے انتظار  میں لمحات  گننے لگی۔۔ 

لوگوں  پر  دھیرے دھیرے  یہ  راز  کھلنے  لگے  کے  نوری  اور  جام  تماچی  رات  گئے جھیل  پر  ملتے  ہیں۔  اور  ایک  دن جام  تماچی  کی راہ  دیکھنے  نوری  تیرتی  ہوئی جھیل میں دور  تک  نکل  گئی  اور  جھیل  کے  گہرے  نیلے  پانی  نے  اُسے  ہمیشہ  کے  لئے  اپنا  بنا  لیا۔۔ شاید  جتنی  محبت  نوری  کو  جھیل  سے  تھی  اُتنی  ہی  محبت  جھیل  کو  بھی  نوری  سے  تھی۔۔ اسی  لئے ۷۰۰ سال  گزر  جانے  کے  بعد  جھیل  کے  بیچ و بیچ  نوری  جام  تماچی  کا  مزار موجود ہے  جہاں  روزانہ سورج  ڈھلنے  سے  پہلے  پہلے  ہزاروں  کی  تعداد  میں  لوگ آتے  ہیں۔۔ 

اس  کہانی  نے  کلری  جھیل  کے  کنارے  جنم  لیا ، اور اب  تک اُسکی  لہروں  میں  زندہ  ہے گو اِس  بیچ  کلری  ترقی  کے  کئی  ادوار  سے  گزری  اور  اب  عرفِ عام میں  اِسے  کینجھر  کہا  جاتا  ہے۔ کینجھر ۱۰۰ مربع میل  کے  رقبے  پر  پھیلی  ہوئی  ہے  اور  دیکھنے  والے  کو  حدِ نگاہ  تک  پانی  ہی  پانی  نظر  آتا  ہے۔ برٹش  سرکار  نے  اِس  جھیل  کی  حدود  میں  توسیع  کر کے کینجھر  کو پاکستان میں  میٹھے  پانی  کی   سب  سے  بڑی  جھیل  ہونے  کا  اعزاز  دلایا۔  برٹش  سرکار کا  دعوی  تھا  کہ  اگر اِس  خطے  کی  آبادی  ۶  کروڑ  تک  بھی  بڑھ  جائے  تو  کینجھر  کا  پانی  اِس  آبادی  کے  لئے  کافی ہوگا۔

کینجھر  جھیل  کا  پانی  دریائے  سندھ  میں آ  کر  ملتا ہے  اور  اِسی بنیاد  پر  یہ  کہا  جا سکتا  ہے  کہ  شہرِ کراچی  کی  آبادی  کو  سیراب  کرنے  والی  بھی  کینجھر  جھیل  ہی  ہے۔،  اِسکی  شہرت  کی  ایک  اور  وجہ  یہاں  آنے  والے  آبی  پرندے  ہیں۔  ۱۹۸۰  میں  کئے  جانے  والے  اعداد و شمار  کے  مطابق  کینجھر  پر لگ بھگ ایک  لاکھ چالیس  ہزار  آبی  پرندے  آتے  رہے  ہیں، جن میں سے کئی  قسم  کی  مرغابیاں یہاں آج  بھی  دیکھی  جاتی  ہیں۔ یہی  وجہ  ہے  کہ  کینجھر  سیاحوں  کے  من پسند  مقاموں میں  سرِ فہرست  ہے  مگر  حکومتِ پاکستان  سیاحت،  ثقافت  اور  ہمارے  وراثتی  وسائل  کے  شعبات  میں کبھی  دلچسپی  نہیں  لی۔ چند  افلاس  کے  مارے  ماہی  گیروں  نے  اور  کچھ  نابلد موسمی  سیاحوں  نے  مرغابیوں  کا  شکار  کر کر  کے  اُنہیں  اِس  علاقے سے  ناپید  کردیا   ہے  اور  پچھلے  کئی  سالوں  میں  اِس  جھیل  پر  بمشکل  چند  ایک مہاجر آبی  پرندے  نظر  آئے  ہیں۔

  پاکستان  میں  ہونے  والی  موسمیاتی  تبدیلیوں  نے  میٹھے  پانی  کی  جھیلوں کو  جس  تباہی  کا  نظارہ  بنایا ہے  اُس  سے  عام  انسان  شاید  واقف  نہ  ہوں  لیکن  ماہی گیروں  کے  لئے  یہ  زندگی  اور  موت  کا  مسئلہ  رہا  ہے 
سندھ  میں  موجود آٹھ جھیلوں  میں  سے  پانچ  موسمیاتی  تبدیلی  کی  نذر  ہوگئی  ہیں۔  منچھر  جھیل  پر  آباد  ماہی گیر  بھی  بھوک  اور  مفلسی  کی  مثال  بن  کر  رہ  گئے 
 دیگر  جھیلوں  کی  بد حالی  کے  بعد  ماہی  گیر  برادری  کی امیدیں  اب  کینجھر 
 سے  وابستہ ہیں۔ 
ماہی گیر  برادری کے  علاوہ  پاکستان  کی  معیشیت  کا ایک  اہم  حصہ  بھی  سمندر اور  جھیلوں  سے  حاصل کی  جانے  والی  غذا  پر  منحصر ہے۔ 
افسوس  یہ  کہ  ماہی گیری ،  معیشیت  اور  ماحولیات  کے علاوہ  یہ  شعبہؑ سیاحت  پر  بھی  اثر  انداز  ہوا  ہے۔۔ پاکستان  کے  پُر فضاؑ مقامات سیاحوں  کے  لئے  ہمیشہ  سے  پرکشش  رہے  ہیں لیکن  موسمی  تبدیلی اور  ناقص حکمتِ عملی  کی  وجہ  سے  سیاحوں  نے  اِس  ملک  کی  طرف دیکھنا  کم کردیا  ہے۔ شعبہ سیاحت  بھی  ملکی  زر مبادلے  میں  خاطر خواہ  اضافے  کا  سبب بنتا  ہے یوں  ہمیں  پھر  ایک  معاشی  کمزوری کا سبب  دیکھنے  کو  ملتا  ہے۔۔ 

حتومتی  سطح  پر بھی شعبہ  ثقافت  سے تعلق  رکھنے  والے لوگ  اِس  موسمی تبدیلی  کو  خطرے  کی  گھنٹی  سمجھتے  ہیں،  اِس  شعبے  کے  مطابق حکومت  اور نام نہاد  این جی اوز اِس  مسئلے  کے لئے  کوئی  لائحہ  عمل  نہیں  بناتی۔ مشہور  کثیرالقومی این جی اوز  بھی  تصاویر  کھینچوا  کر  اور  جگہ  جگہ  تختیاں  لگوا  کر  گھر  کو  روانہ  ہوجاتے  ہیں اور جھیلیں  وہیں  رہ  جاتی  ہیں ، اِس  تشنہ آرزو  کے  ساتھ  کے  اُن  سے  رزق  حاصل  کرنے  والے  کبھی  اُنکے
 تحفظ  کے  لئے  کوئی حتمی  قدم  اُٹھائیں  گے