عیادت

اُردو  کی  کتاب  آمنہ  کو  اِس  سے  پہلے  کبھی  اتنی  اچھی  نہیں لگی  جتنی  اب  لگ  رہی  تھی  وہ  گیارھویں  جماعت  میں  تھی  اور  اب  اُسے  مصنفوں  کی  مشکل  مشکل  باتیں  سمجھ  آنے لگی  تھیں۔۔ اور  آج  تو  کلاس  میں مِس  نے  ویسے  بھی  امتیاز  علی  تاج  کا  زبردست  مزاحیہ  ڈرامہ  آرام و سکون  پڑھایا  تھا۔۔ اور  لڑکیاں  بیمار  شوہر  کے  چڑچڑے  پن  اور  اُنکی  بیوی  کی  مصروفیات کی تفصیل  پڑھ  کر  ہنس  ہنس  کے  دوہری  ہوگئی  تھیں۔ تب آمنہ  کو  پتہ نہیں  تھا  کہ  اِس  ڈرامے  کا  حصہ  دوم  تھوڑے  دنوں  بعد  اُسے  گھر میں دیکھنے  کو  ملے  گا۔

********

ایک دن  اچانک  ہی  دادی  بی  کی  طبیعت اچانک  خراب  ہوگئی ۔۔ امّی  ابّو  آمنہ اور  نعمان  سب بے حد  پریشان  ہوگئے ،  ابّو  اور  امّی  رات  سے  دادی  بی  کے  ساتھ  اسپتال  میں تھے،  آمنہ  اور  نعمان  پریشانی میں  رات  بھر  نہیں سوئے،   پھر  صبح  سویرے  امی  اکیلے  گھر پہنچی۔۔  دروازہ  کھولتے  ہی  نعمان  نے پوچھا  ’’امّی  دادی بی  کہاں  ہیں‘‘ 
  وہ  شام  تک  آجائیں  گی  بس  ڈاکٹرز  اُنکا تسلی  بخش  معائنہ  کرنا  چاہ  رہے  ہیں‘‘  امی  نے تسلی  دی۔۔
اوہ  اللہ  کا  شکر۔۔ آمنہ  اور  نعمان  نے  سکون  کا  سانس  لیا۔
اور  پھر  شام  کو  ابو اور  امی  دادی  بی  کو  گھر  لے  آئے۔  وہ  ایک  ہی  دن  میں  بہت  کمزور  لگنے  لگیں  تھیں۔۔ آمنہ  اور  نعمان  لپک  کر  اُنکی  طرف  گئے۔۔ مگر ابو  نے  دونوں  کو  آہستہ  سے  منع  کردیا۔۔ اور  دادی  بی  کو  فوراً  اُنکے  کمرے  میں  لے  گئے۔۔
آمنہ  اور  نعمان  کو  دادی  بی  کی یہ  حالت  دیکھ  کر  بہت  دکھ  ہوا اُنہیں  تو  ہر  وقت  اُن  سے  ہنسنے  بولنے  کی  عادت  تھی۔۔ ابو  نے  دونوں  کی  لٹکی  ہوئی  شکلیں  دیکھیں  تو دونوں  کو  اپنے  کمرے  میں طلب  کر  کے کہا۔۔
مجھے  اندازہ  ہے  کہ  بی  جان کی  ایسی  طبیعت  دیکھ  کر  تم دونوں  کو  دکھ  ہو رہا ہوگا۔۔ لیکن  دیکھو  اگر ہم  اُنہیں  تھوڑا  سا آرام  دیں  تو وہ  بہت  جلد  پہلے  جیسی  ہوجائیں  گی۔۔ بس  کچھ  دن  تک  تم  لوگ  ہنسنا  بولنا  کم کرو۔۔ گھر  میں  کوئی  شور  و  غل  نہ  ہو۔۔  ٹھیک  ہے۔۔
ابو  کے  سمجھانے  سے  دونوں  سمجھ  گئے
اگلے ہی  دن سے  عیادت  میں  آنے  والے  فون کالز  کا  تانتا  بندھ  گیا۔۔ خاندان  بھر  کو  معلوم  ہوگیا  کہ  دادی  بی  اسپتال  میں  رُک  کر  آئی  ہیں۔۔۔ ہر  آنے  والی  کال  پر  شروع  سے  آخر  تک  پوری  روداد  سنائی  جاتی ۔۔ جو  اب  آمنہ اور  نعمان  کو  رٹ  گئی  تھی۔۔  اکثر  رشتے  دار ضد  کرتے  کہ دادی  بی  سے  فون  پر ہی  بات  کرادی جائے  مگر دادی  آرام  کررہی  تھیں۔۔  نہ  زیادہ  بولتی  تھیں  اور  نہ  بستر  سے  اُٹھتی  امی اور  آمنہ  اُنکی  ہر  ضرورت  کا  خیال  رکھ  رہے  تھے،  مگر  پھر  اچانک  مغرب کے  وقت  پھوپھی  دادی  اپنے  دو  چھوٹے  چھوٹے  پوتوں  کے  ساتھ  گھر  آگئیں۔۔ گیٹ  سے  گھر میں داخل  ہوتے  ہی  اُنہوں  نے  ایک  زور  دار  دھاڑ  ماری  اور  رونا  شروع کردیا۔۔
ارے  پھوپھی  جان  کیا  ہوا ؟  ابو  گھبرا  کے  بولے
ہائے  کیا ہوا میری  بھاوج  کو۔۔ اسپتال  ہو  کے  آئی  ہے  اور  مجھ  ناس  پیٹی  کو  پتہ  ہی  نہ  چلا۔۔ ہائے  اپنے  جنتّی  بھائی کو  کیا  منہ  دکھاؤں  گی ۔۔ میں  نے  تم  لوگوں  کا خیال  نہیں  کیا۔۔
ارے ارے  ایسی  کوئی  بات  نہیں  آپ  نے  ہی  ہمیں  اس  قابل  بنایا  ہے  کہ  اب  ہم  بی  جان  اور آپکی  خدمت  کرنے  کے  لائق  بنے  ہیں، آپ  اندر چلیں  پانی  پئیں ۔۔ بی  جان  بلکل  ٹھیک  ہیں۔۔
ابو  نے  اتنا  کہا  ہی  تھا کہ  پھوپھی  دادی  کے  پوتے  نے  گھر  کے  باہر  لگی  ڈور بیل  کو  بار  بار  بجانا  شروع  کردیا  گویا  یہ کوئی  کھیلنے  کی  چیز  ہو۔۔
امہممم۔۔ بیٹا  چلو  تم  بھی  اندر  چلو۔۔  ابو  اُس  کو  اندر  لے  آئے۔  
اندر  آتے  ہی  ایک  بچہ  مشرق  میں بھاگا  اور ایک  مغرب  میں  یعنی  ایک  کچن  کی  طرف گیا  اور  ٹوکری  میں سے  سبزی  نکال  کر  ادھر  اُھر پھینکنے  لگا تھا  اور  دوسرا کتابوں کی  الماری  کھول کر  کتابیں  نیچے  گرا  رہا  تھا۔۔
پھپھو  دادی  نے  اُن دونوں  کی  حرکتوں  کو  نظر  انداز  کرتے  ہوئے  بولا۔۔ بھابی  جان  کہاں ہیں
ابو  نے  کہا  ۔۔ وہ  اپنے کمرے  میں آرام  کر رہی  ہیں۔

لیکن  اتنی  دیر  میں  شور  شرابا  سن  کر  دادی  خود  باہر  آگئیں۔۔ 
ارے  کیا  ہورہا  ہے  یہ  گھر  میں؟  دادی  کمر  سے  نکلتے  ہوئے  پوچھنے  لگیں۔
ہائے  بھابی جان۔۔ پھوپھو دادی  سب  چھوڑ  چھاڑ  دادی  بی  پر  جھپٹیں۔۔  کیا  حالت  بنا  لی آپ  نے۔۔ وہ  روتے  ہوئے  کہہ  رہی  تھیں۔
ارے  کچھ  نہیں  ہوا  مجھے  شائستہ ۔۔ دادی  نے  اچانک  حملے  سے  سنبھلتے  ہوئے کہا
اللہ  نہ کرے  آپ  کو  کچھ  ہو۔۔ پھپھو  دادی  بدستور  رو  رہی  تھیں۔۔
پیچھے  سے  کچھ  ٹوٹنے  کی آواز  آئی  سب نے  پلٹ کر  دیکھا۔ پھپھو دادی  کے  پوتے  نے برتنوں  کی  الماری  سے  ایک  کپ  نیچے  گرا  دیا  تھا۔۔ 
ایک  تو یہ  کمبخت  ۔۔ توڑ  پھوڑ  کرنے  کو  ہی  پیدا  ہوئے ہیں۔۔ پھوپھو  دادی  غصے  میں  اُنکی  طرف  بڑھیں۔
ارے  ارے  پھوپھو بچے  ہیں۔۔ ابّو  نے  اُنہیں روک  لیا  اور  نعمان  کی  طرف  دیکھ  کر  کہا۔۔ جاؤ تم  ان  دونوں  کے  ساتھ  صحن  میں  جا  کر  کھیلو۔۔
لیکن  ابو  میں ان  کے ساتھ  کیا  کھیلوں  یہ تو  بہت  چھوٹے  ہیں۔ نعمان  نے  پریشانی  سے  پوچھا۔۔
اچھا تم  ان  کے ساتھ  مت  کھیلو  لیکن  انہیں کھیلنے  میں  مدد کرو۔۔ امی  نے  نعمان  کو  آنکھیں  دکھائیں اور پھوپھو  دادی  سے  کہا  ۔۔ بیٹھئے  پھوپھو  میں ٹھنڈا  پانی  لاتی ہوں۔۔ سب  بیٹھ  گئے۔ آمنہ  نے  دادی  بی  کو  گاؤ  تکیے  سے  ٹیک  دے  دیا
ہاں  لے  آؤ  بیٹی  ۔۔ گلا  سوکھ  گیا  ۔۔ ہائے  میری  تو  جان  ہی  نکل  گئی  جب  پتہ  چلا  کہ  بھابی  بیمار  ہیں۔۔
وہ  دوبارہ  شروع  ہوگئیں۔
اب  تو  کافی  بہتر  ہیں۔  اللہ  کا شکر۔ ابو  نے  کہا
لیکن  عیادت  کرنا تو  میرا  فرض  ہے  میں  نے  صبح  ہی  شکیل  سے  کہا  کہ  مجھے  چھوڑ  آئے۔۔ پھر نکلنے  لگی  تو  خیال  آیا  کہ یہ  دونوں میرے  پیچھے  گھر  میں  ادھم  مچاتے  پھریں  گے۔۔ شکیل  کی  دلہن  اِن  دونوں  کے  ساتھ  چھوٹے بچے  کو  کیسے اکیلے  سنبھالے  گی۔۔ اسلئے انہیں  بھی  لے  آئی 
یہ  تو آپ  نے  اچھا کیا  پھپھو۔۔ ابو  کا  جملہ  ٹھیک  سے  ختم  بھی  نہیں  ہوا  تھا  کہ  نعمان  کے  چیخنے  کی آواز  آئی۔۔ دو ننھے  شیطانوں  نے  اُسکو کھیل  کھیل  میں سیڑھی  سے  لڑھکا  دیا۔۔ ابّو  اُس  طرف  بھاگے۔۔ مگر  نعمان  کو  کافی  چوٹ  آگئی تھی۔۔ خون  ابل  ابل  رہا  تھا۔۔ ابو  پریشان  ہوگئے۔۔ دادی بی  بھی پریشانی  سے  صحن تک  آگئیں۔۔
اف  یہ  کیا  ہوگیا۔۔
کوئی  بات  نہیں  بی  جان  آپ  اندر آرام  کریں۔۔ میں  ابھی  پاس  میں  کلینک سے  پٹّی  کروا  لاتا ہوں۔
امّی  کی  تو  کچھ  سمجھ  نہیں  آرہا  تھا  کہ یہ  ہو کیسے  گیا۔۔
پھپھو  نے  ڈانٹ ڈپٹ  کر اپنے  پوتوں  کو  ایک  جگہ  بٹھا  دیا۔۔ ابو  آدھے  گھنٹے  میں  ہی  آگئے۔۔ نعمان  کے  سر  پر  موٹی  سفید  پٹّی  بندھ  گئی  تھی۔۔   
ارے  یہ  کیا  کرلیا  میرے بچے  نے۔۔ دادی  بھی  پریشانی  میں  بیٹھی  انتظار کرتی رہیں۔۔
دادی  یہ  دونوں  بھوت  ہیں۔۔ ایک  سیڑھی  پر  چڑھ  کر  مجھے  کہنے  لگا  کے  میں یہاں  سے  کود  جاؤنگا  میں  اُسکو  بچانے  اوپر  چڑھا  تو  دوسرے  نے  مجھے  پیچھے  سے  دھکا  دے  دیا۔۔ نعمان  روتے  ہوئے کہنے لگا۔
ارے  یہ  تو  ہیں ہی  ناس  پیٹے۔۔ جب ہی  تو ماں  سے  بھی نہیں سنبھلتے۔۔  پھوپھو دادی  کا ریکارڈر  پھر باآوازِ بلند آن  ہوگیا  تھا۔۔ دادی  بی  کو  شدید  کوفت ہوئی۔۔ 
بہو  کھانا  کھا لینا  چاہئے۔۔ نعمان  کو  بھی  بھوک  لگ  رہی  ہوگی۔۔
جی بی  جان۔۔ امی  ایک  دم  کھڑی ہوئیں۔۔
تم  بھی کھانا  کھا کر  جانا  شائستہ ۔۔ دادی بی  نے  کہا۔۔
کیا  پکایا  ہے بہو  نے۔۔ پھپھو  دادی  نے  پوچھا
ماش  کی  دال  اور  دہی  پھلکیاں  بنائی  ہیں اور اماں کے لئے پرہیز  میں لوکی  کا سالن۔۔ امی  نے جواب  دیا۔۔
اچھا  تو  پھر  بیٹا تم  لوگ  ہی  کھاؤ  اصل میں بچے تو روٹی  نہیں  کھا  پاتے مجھ  سے۔۔ اور  ماش  کی  دال  سے  یوں  بھی  میری  طبیعت  بھاری  ہوجاتی ہے۔۔ پھپھو  دادی  نے  کہا
میں پھر  آپ  لوگوں کے لئے  کچھ  اور  بنا  دیتی  ہوں۔۔ پھپھو  دادی  کے  پوتے  دھیرے  دھیرے  وہاں  سے  کھسکنے  لگے۔۔
اری  نہیں  خواہ مخواہ  تمہیں  تکلیف  ہوگی۔۔ پھپھو  دادی  نے کہا
ارے  تکلیف  کیسی۔۔ امی  نے  کہا  اور آمنہ  کے  ساتھ  کچن  میں  جت گئیں۔ 
 نعمان  دادی  کے  پاس  بیٹھا رہا  اور دونوں ابّو کی پھپھو  دادی سے  گفتگو  سنتے  رہے۔
 بچوں  کے  لئے اسنیک  اور  پھپھو  دادی  کے  لئے الگ  سے  سالن  بنانے  میں امی  کو  چالیس  پچاس  منٹ  لگ  گئے۔۔ اور  بھوک  سے  سب  کی  حالت  ابتر  ہوتی  رہی۔۔ دادی  بی مہمان  کے  سامنے  اکیلے  کھانا  کھانے  کے  سخت  خلاف  تھیں ۔۔اسلئے  تحمل  سے  بیٹھی  رہیں۔۔ 
جب  کھانا  لگا  اور  پھپھو  دادی کے پوتوں  کو  ڈھونڈا  گیا  تو  وہ  دونوں آمنہ  اور  نعمان کے کمرے  کو  تہس  نہس  کر  چکے  تھے۔۔ 
امییییییی۔۔ آمنہ کا  منہ  اپنے  کمرے  کی حالت  دیکھ  کر  کھلا  رہ  گیا۔۔
کوئی  بات نہیں آمنہ  ، مہمانوں کے  جانے  کے  بعد  میں تمہارے  ساتھ  مل  کر  کمرہ  ٹھیک  کردوں  گی۔۔ چلو  ابھی  کھانا کھاؤ۔۔ امی  نے  کہا
کھانا  ختم  ہوا۔۔ اور تھوڑی  ہی  دیر  بعد  پھپھو  دادی   کے  بیٹے  اُنہیں  لینے  آگئے۔۔ امی  ابو  نے  اُنہیں  بھی  کھانے کی  پیشکش  کی  لیکن  اُنہوں نے  چائے  کی  فرمائش  کی اور  چائے  کے ساتھ  بس امی  کے  ہاتھ  کے کباب اور  دہی  بڑے  پر  ہی  اکتفا  کیا۔۔
جس  وقت  وہ  لوگ  گھر  سے  رخصت  ہورہے تھے  گھر  کا  کچھ  عجیب سا  ماحول  تھا ۔۔ دادی  بے آرامی،  دیر  سے  کھانا اور دوائی  لینے  کی  وجہ  سے  دوبارہ  کمزوری  محسوس  کرنے  لگیں تھیں۔۔ نعمان  اب  تک  اپنی  ناگہانی  چوٹ  پر  رو  رہا  تھا۔ امی  تھکن  سے  چوُر  تھیں اور اُنہیں  ابھی  برتنوں  کے  ایک  انبار  کو  دھو  کر  ٹھکانے  لگانا  تھا  اور  مجھے  بار  بار اپنے  کمرے  کا  خیال  آرہا تھا  جس  کو میں  نے  ابھی  سمیٹنا  تھا۔۔ 
اُف۔۔ شائستہ  نے  تو  آج  حد کردی۔۔ دادی  نے  سخت  چڑ  کر کہا۔۔ 
کوئی  بات نہیں بی جان۔۔ مہمان  تو رحمت  ہوتے ہیں۔۔ ویسے  بھی  وہ  آپ سے  بہت پیار کرتی  ہیں۔۔ ابو  نے  دادی کا  سمجھایا
مانتی  ہوں  بیٹا۔۔ مگر  محبت  اگر  غلط  طریقے سے  یا غلط  وقت  پر  جتائی جائے  تو  اذیت  بن  جاتی  ہے۔۔ اور  دوسری  بات یہ  کہ  عیادت کے  لئے  مہمان  بن  کر آنے  والوں  کو اس  بات کا  خیال  رکھنا  چاہیے  کہ  وہ  علیل  یا  اُسکے  گھر والوں کے  لئے  کسی  تکلیف  کا  باعث  نہ  بنیں۔ 
جی یہ  بھی  صحیح  کہا  آپ  نے۔۔ چلیں  ہم  اِس  بات  کا  خیال  رکھیں  گے کہ  آج  جو  احساس  ہمیں  ہوا  ہے وہ  ہماری  وجہ  سے  کسی اور کو  نہ  ہو۔۔ ابو  نے  کہا
ہاں  اور عیادت کرنا  تو  سنّت بھی  ہے۔۔ نعمان  نے  ایک  دم  سے  کہا  تو  دادی  بی  اور  ابو  ہنس پڑے