بزرگ کی دعا

نئے  نئے محلے  میں  منتقل  ہوئے  ۱۵  دن  ہوئے  تھے۔۔ کسی  سے  زیادہ  بات  چیت نہیں تھی  ویسے  بھی  میں  زیادہ  بولتا  نہیں ہوں ۔۔ مجھے  بہت  زیادہ  بولنے والے  لوگ نہیں پسند  خاص  کر  کے  بیکار  بولنے والے۔۔ نہیں نہیں ! میں کوئی  بہت  گہرا  انسان  نہیں  ہوں۔۔ لیکن  بننے  کی  ہمیشہ  ایکٹنگ  کرتا  ہوں۔۔ لیکن  ہمیشہ  کوئی  نہ  کوئی  حماقت  مجھے گھر  والوں  کے سامنے شرمندہ  کر  کے  رکھ  دیتی  ہے۔۔  اماں  کہتی ہیں  اگر  اتنا  ہی  عقلمند  اور  باشعور  بننے  کا  شوق  ہے تو  اچھا  بولنے  والے  لوگوں میں  اُٹھا  بیٹھا  کر ۔۔ یا  پھر  تُو  اچھی  کتابیں  پڑھا  کر۔۔ بھئی  اماں کو  کون  سمجھائے  کہ  کتابوں  سے  معرفت  نہیں ملتی۔۔  میں  تو  چاہتا  تھا  کہ  کوئی  جادوئی  چراغ  ہاتھ  لگ  جائے  اور  میں ایک  دم  سے  لوگوں  کی زندگی  میں  بہت اہم ہوجاؤں  جہاں  سے میں  گزروں کچھ  لوگوں  کی  نظر  تعظیم  سے  جھک  جائے  اور  کچھ  کی  رشک  سے  اٹھ  جائے۔۔ لیکن  ایسا  کرنے کے  لئے  مجھے  اپنی  ڈھیلی  ڈھالی  شخصیت  کو  بدلنے  کی  ضرورت  تھی۔ لوگوں سے  میں  زیادہ  بات  اسلئے  نہیں  کرتا  تھا  کہ  کسی  کو  پتہ  نہ  چل  جائے  کہ  مجھے  کچھ  نہیں  آتا۔۔ لیکن  اب  ایسا  کب  تک!  میں  بھی  چاہتا  تھا  کہ ہر  کوئی  میرے  آگے  پیچھے  پھرے۔۔ مگر  ایسی  مقناطیسی  شخصیت  کے لئے  کچھ  رہنما  اصول  تو  چاہئے  تھے  اور  رہنما  اصولوں  کے  لئے  کوئی  راہبر۔۔ خیر  میں  اکیلا  ہی  چلا  جانبِ  منزل۔۔ روز  اِسی  طرح  صبح  سے  شام  ہوجاتی  تھی۔۔ 

نیا  نیا  محلہ  تھا۔۔ میں  بائیک  خوامخواہ  ہی  گلیوں  میں گھماتا  رہتا  تھا۔۔ اور  کچھ  دن سے  میں  ایک  عجیب  سی  چیز  دیکھ  رہا  تھا۔  ایک  باریش  بزرگ ۔۔   سفید  براق  کپڑوں  میں سڑک  کے  کنارے سفید  کپڑا  بچھائے صبح  سے  رات  گئے  تک بیٹھے  رہتے  ہیں۔۔ اور  کوئی  اُنہیں  ہٹانے  کی  کوشش نہیں کرتا  تھا۔۔  نہ  ہی وہ  کسی  کو  ضرر  پہنچاتے  تھے۔۔ اور اُس  سے  بھی  زیادہ  حیرت  مجھے  جب  ہوئی  جب  میں  نے  دیکھا کہ  ایک دن  ایک  باوردی  پولیس والا اپنا  ڈنڈا  ایک  طرف  رکھ  کر۔۔ آکے  بہت  عقیدت  سے  اُنکے  قدموں  کے  پاس  بیٹھ  گیا  اور  دعا  لے  کر  چلتا  بنا۔۔ مجھے  ان  بزرگ سے ایک  دم  ہی  بہت  روحانیت  پھوٹتی  ہوئی  محسوس  ہونے  لگی۔۔ مجھے  یوں لگا  ہو  نہ  ہو  یہی  روحانی 

 ہستی  مجھے  میرے  خواب تکمیل  کرنے  میں  مدد دے  گی۔

بس  میں  نے  موقع  تلاش  کرنا  شروع  کر دیا  اور  کئی  دن  کی محنت  کے  بعد  میں  نے  اندازہ  لگا  لیا  کہ  رات  ایک بجے  کے  بعد  دوکانیں بند  ہوجاتی  ہیں  اور  کوئی  بھی  سڑک  پر  نظر  نہیں  آتا۔۔میں  نے  اچھے  خاصے  پیسے  بھی  رکھ  لئے تھے  تاکہ  اگر وہ کچھ  مطالبہ  کریں تو  میں فوراً  پورا  کردوں  اور ان  سے  بھرپور  فائدہ لوں۔۔ میں  موقع  دیکھ  کر  اُن  کے پاس  جا  بیٹھا اور  ڈرتے  ڈرتے  سلام  کیا۔۔ 
وعلیکم اسلام  علی،  بہت  دن  لگا دیئے  ہمت  متجمع  کرنے  میں۔۔ بابا  نے کہا۔
اور  میرے  پیروں  کے  نیچے  سے  زمین  نکل  گئی
آپکو  میرا نام  کیسے  پتہ۔۔ 
لو!  اتنے  دن  سے تمہارے  لئے ہی تو یہاں  بیٹھا  ہوں  بیٹا۔۔
جی؟
ہاں۔۔ جب  کسی  کی  ضرورت  پوری  ہونی  ہوتی  ہے  تو  کوئی  نہ  کوئی  وسیلہ  بنتا ہے۔۔ کہو  تمہیں  کیا مدد چاہئے۔۔
بابا ٹھہر ٹھہر  کر  بول  رہے تھے۔۔ اور  میں سحرزدہ  سا  سن رہا  تھا۔۔
جی۔۔ وہ  ،  میں ۔۔ پتہ  نہیں۔۔ میرا  مطلب۔۔ مجھے  سب  کچھ  چاہئے 
سب کچھ؟ 
ہاں  سب کچھ۔۔ بہت  ساری  عقل، پیسہ،  اور  ایسی  شخصیت  کے  لوگ  مڑ مڑ  کر مجھے  دیکھیں۔۔
ہممم اور  اسکے  لئے  تم  کیا کرنے کو  تیار  ہو۔۔
میں؟  میں چاہتا  ہوں  آپ  میری  مدد کریں۔۔
مطلب  تم  صرف  مدد کے بھروسے  یہ  سب  حاصل  کروگے۔۔
ہاں۔۔ ورنہ اور کیا  طریقہ  ہے۔۔
طریقے  تو  بہت  ہیں۔۔ یہ جاہ و حشمت  محنت  اور  قربانیوں  سے  بھی  حاصل  کی جاتی  ہے۔۔ 
قربان  کرنے  کے  لئے  میرے  پاس  کچھ  نہیں۔۔ اور  محنت  کرنے میں  بہت  وقت  لگ  جائے گا۔۔
اچھا  تو  تمہارے  پاس  وقت بھی  کم  ہے۔۔
(بابا کی  باتوں  سے  الجھن  تو  شدید  ہورہی تھی لیکن  صرف  اس  امید  میں  کہ  راتوں  رات  کامیاب  ہونے کا  کوئی  طریقہ  ہاتھ  لگ جائے  وہ  سنتا رہا)
جی  بابا! 
الجھو  نہیں!  مدد کرنے  سے  پہلے  جاننا  تو پڑتا  ہے  کہ  مدد کیسے  اور  کس  حد  تک  کرنی  ہے۔
(وہ  دل  ہی  دل میں  حیران  ہوا  کہ  بابا  نے  اُس  کے  دل  کی  بات  جان لی تھی)
خیر۔۔ کیا تم  بلکل  ہی  تہی  دست  ہو؟ 
نہیں !  پیسہ  تو بہت  ہے۔۔ لیکن عقل ، قسمت  اور  شخصیت  پیسے  سے  نہیں خرید  سکتے
بات  تو  تم  نے  خوب  کہی  لڑکے۔۔
بس  بابا  آپ  میری  مدد کریں۔۔
ہممم۔۔! ٹھیک  ہے ۔۔ میں  تمہیں  ایک  تعویز  دئیے  دیتا  ہوں۔۔
علی  کی  آنکھوں  میں  چمک  اتری۔۔
کیا  اُس  سے  میری  زندگی  ایک  دم  بدل  جائے  گی۔۔
امید  تو  یہی  ہے۔ مگر  اُسکا  اثر  لینے  کے  لئے  تمہیں  بھی  اندر  و  باہر  سے  ستھرا  ہونا  ہوگا۔۔
ستھرا؟  میں  تو  شام میں  ہی نہایا ہوں۔۔
ہممم۔۔ وہ  جسم  کی  صفائی  ہے۔۔ اور  ایک  صفائی  انسان  کے  باطن  کی  بھی ہوتی  ہے۔۔ 
اففف اب  اُس  میں  کتنا  وقت  لگے  گا۔۔
یہ  تو تم  پر  منحصر تھا لیکن  کیونکہ  تمہیں  جلدی  ہی  اسلئے  میں  کچھ  کرتا  ہوں۔۔
بابا نے  اپنے  سفید  بے داغ  کرتے  کی  جیب  میں  کچھ  ٹٹولا۔۔ حیرت  تھی  کہ  سارا  دن  سڑک  کے  کنارے  بیٹھنے  کے  باوجود اُنکے  کپڑے  صاف  ستھرے  تھے۔۔ میری  عقیدت ہر لمحہ  بڑھ  رہی  تھی۔۔
لو  بیٹا۔۔ پہلے  تو  یہ  تعویز  لو۔۔ اسکو  اپنی  مٹھی  میں  دبا  لو۔۔ اس میں لکھا  رقعہ  تمہاری  زندگی  بدل  دے  گا 
میں  نے  بہت  تعظیم  سے  اُسکو  تھاما  اور  کچھ  محسوس  کرنے  کی  کوشش کی۔۔ 
کچھ دیر  مزید  ڈھونڈنے  کے  بعد  بابا  نے  برفی  کا  ایک  ٹکڑا  نکالا۔۔ 
اللہ کا  نام  لے  کر  کھا  لو  بیٹا !  اللہ  تمہاری  ہر  مراد  پوری  کرے گا۔۔
اور  اُسکو  منہ  میں  رکھ کر  لگا  جیسے  واقعی  میرے  سارے  جسم  میں  ایک  عجیب  سا  سکون پھیل  گیا  تھا۔۔ تعویز  اب  تک مٹھی  میں بند  تھا۔۔ اور میں  اُسکی  روحانیت  محسوس کررہا  تھا ۔۔ میرے اعصاب  ڈھیلے  پڑ  رہے تھے۔۔ 

بہت  ہی  تیز  روشنی  میری آنکھوں  پر پڑ  رہی  تھی۔۔ ذہن  کسی  ملگجے  اندھیرے  سے  باہر نکل  رہا تھا۔۔ اور  عجیب  سی  آوازیں  کان  کے  پردے  سے  ٹکرا  رہی  تھیں۔۔ بہت مشکل  سے  آنکھیں  کھولیں  تو  دیکھا کہ  لوگ  آس  پاس  کھڑے  کچھ  باتیں کررہے  ہیں۔۔ دماغ  بھاری  ہورہا  تھا۔۔ 

اور  پھر  میَں  ایک  جھٹکے  سے  اُٹھ  بیٹھا  لوگ پیچھے  ہٹ  گئے۔۔ دیکھا  تو  جسم  پر کپڑے  بھی  اتنے  ہی بچے  تھے  کہ  سڑک  سے  گھر  پہنچ  جاؤں۔۔ کچھ  سمجھ  نہیں آیا  پھر  احساس  ہوا مٹھی  میں  ابھی  تک  کچھ  بند  ہے۔۔ دیکھا  تو  ہرے  کپڑے  میں  ایک  تعویز تھا۔۔ یکایک  رات  کا  واقعہ  دماغ  میں  گھوم گیا  اور  دماغ  بھک  سے  اڑ  گیا۔۔ 
غم  و  غصے  سے  میری  حالت عجیب  ہوگئی۔۔
اور  مجھے  یاد  آیا اُس بابا  نے کہا  تھا  کہ  تعویز میں  لکھا  رقعہ  میری  زندگی  بدل  دے  گا۔۔
تعویز  کھول  کر  دیکھا  تو  اندر ایک  کاغذ  لپٹا  رکھا  تھا  جس  پر  ایک  عبارت  تحریر  تھی

آج  کا  واقعہ بھی  اگر  تمہیں محنت  اور  اللہ  پر  یقین  کی  طرف  نہ لوٹا  سکا  تو  تمہیں  زندگی  میں  کوئی  چیز  نفع  نہیں  دے  سکتی۔